لأنك الحكاية

٩

" مَن يقرر أن لك في هذه الدنيا خطُ للنهاية.. شخصٌ يقرر بيديه أن يمحو هذا الخط ويكتُب لك نقطة نهاية فقط.. شخص يقرر أن تتوقف ساعة حياتك،،حتى وإن كُتب لك عمراً جديداً ستحيا فيه ذليل مطأطأ الرأس.. تخجل من حياتك للأبد"..

الفاضل قلبه كان حيتقطع على اخته وكأنها بتموت بقى يصرخ بصوت عالي عملتي شنو لي اختي سااامية ساامية اصحي،، انا جيت لقيتهم واقفين في راس سامية ردة فعل طبيعية مني جيت جارية اشوف الحاصل الفاضل لزاني ووقعت في الأرض جا قال لي انتي السبب عملتي لي اختي شنو والله الليلة سامية يحصل ليها شي انا باخد حقها بي يدي مفهوم..
بقيت واقفة بعيد جابوا ليها السرير واحمد كان قلقان على أمه وحاجة عشة بتبكي وتتحسبن علي..

انا الوحيدة ال ما فاهمة حاجة ،،سامية بعد دقايق فتحت عيونها اول ما فتحت فتشتني بي عيونها وقالت للفاضل مرتك سرقتني وقالت بتقتلني احميني منها انا اختك وعندي اولاد دي ما بتخاف الله فيني..

احمد جا جنبها وقال ليها يا امي الكلام ده مافي داعي ليهو استهدي بالله كدا فاطمة ما عندها معاك مشكلة ما عارف مالك معاها..

قالت ليهو الله ياخدها ويدمر حياتها حتى انت اكلت ليك عقلك..
احمد مشى للفاضل اخده بعيد وبعد مسافهه الفاضل جاني كنت واقفة بعيد ساقني من يدي وقال لي ارح البيت جوا..
دخلنا البيت وقعدني في السرير.. قال لي عايني يابت الناس انا عشت معاك في البيت زي اختي انا قصة العرس دي كرهتها بي سبب واحدة عرستها زمان.. وللامانة ما شوفت منك غلط مستحملاني وبتخدمنيني لكن سرقتك لي اختي دي ما قادر انساها..
قاطعته قلت ليهو والله والله ما سرقت منها حاجة.. اختك ما دايرة ليك الخير صدقني..
قاطعني قال لي ما بتدوري لي الخير اكتر من بت امي وابوي،،سامية دي فترة ما هي قاعدة في البيت ده اوعك تعايني ليها بعيونك حتى انا ما داير امد يدي عليك لانه كرهت البيت بي سببك ما طايق اقعد معاك عديل..

ارحميني عليك الله وخلي اجازة اختي دي تعدي..

طلع مني وهو بيعرج..
قعدت ابكي وقلت انا عملت شنو في الدنيا دي عشان الفاضل ده يعمل معاي كدا كيف يقول لي انا ما طايق اقعد معاك انا رضيت انه طفولتي كلها تنتهي وخليت اللعب مع صحباتي وعشت في ذلة ماف واحدة في عمري عشاتها ولا في بشر بيتقبلها.. ليه سامية مصممة تقلب حياتي كلها من فوق لي تحت..

مسكت الكيس ال فيهو اوراقي وحضنته علي وبقول يارب ابوي يجيني بكرا بدري ويخلصني من البيت ده.. الحاجة ال بتهون عليّ إنه أبوي جاي حاسة انه ابوي اتغير السنين الفاتت وبيحن علي كل فترة.. ما عارفة ده عشان انا بقيت بعيدة منه ولا هو أصلاً بيحبني.. الحاجة الوحيدة ال ما فارقتني هي امي.. نمت وجاتني في الحلم.. قالت لي اهربي قلت ليك اهربي..
..
"في بيت السيد"..

هاجر= مالها البت دي اسمعني هنا يا السيد انا ما صدقت عرست فتشت ليها العريس ده بي طلوع الروح ما عشان تجي تاني تقعد معاي في بيتي مطلقة.. اها كان جاتك مطلقة بتلقى ليها عريس يسترها وين تاني..