" لو أن الحياة تصبح عادلةً قليلاً، لو أنها تمنحنا حق الرفض والمحاربة من أجل الحقوقة المسلوبة من آبناء الحياة المدللين،، لو لم تقف بصف أبنائها قليلاً.. لكنها الحياة.."
بعد سامية سمعت كلام احمد وأنه يعتذر لي كأنه جنّ جنونها وبقت تقول ليه أنا اعتذر من النصابة دي والله ده الناقص سمح لي امك يا احمد..
احمد قال ليها من غير صوت عالي يمة ما مجبورة فاطمة تشتغل ليك حاجة لو عملت حاجة بي زوقها خلاص.. قاطعته حبوته: ياولدي دي شغلة نسوان امشي الديوان اسي،، فاطنة دي ياهو شغلها في البيت وامك ما..
قاطعها خت يده في راسه وقال ليها حبوبة الله يرضى عليك بت الناس دي ما لعبة في يدك والموضوع ده انتهى!..
سامية استسلمت لي كلام احمد ودخلت البيت من سكات كأنه مفعول سحري كلامه..
وانا كمان مشيت خطوات تجاه بيتي وقفني احمد قال لي فاطمة: معليش!!.
ما جاوبته ومشيت كأني ما سمعت حاجة.. قفلت عليي بيتي وقعدت في آخر السرير وقعدت ابكي..
ده كل ال بقدر اعمله..
..
ده شنو ال عملته ده يا احمد.. طب أهي ولا شكراً ما قالتها ليك.. بس انا ما عايزها تشكرني انا عاهدت نفسي ادافع عنها حتى لو اعتبرها زي اختي..
اخخخ بطل يا احمد تدخل افكار زي دي راسك..
ختيت يدي في راسي وانا بحاول أوقف تفكيري،،فكرت اسافر عشان ال بعمل فيه ده غلط في غلط.
شعور غريب تجاه البت دي حاسي انها مسؤليتي وحاسي انها جزء من حياتي
طول الوقت حاسي انه في حاجة واقفة علي أنا لو ما عملتها ليها فاطمة حتتأذي زي موقف الليلة ده حسيت انه لو امي وحبوبة خلوها تتذل وتخدمهم غصباً عنها ده أذى ليها،،.
..
شوفتي يمة الولد قام فيني كيف زي التور الهايج عشانها هي؟.. بت السكران لو ما خليتها تندم ما بكون انا سامية بت عبدالله لو ما خليتها تخدمني عمرها كلو ما ببقى بتك يمة ووواي منها عاجبها روحها خلقتها السمحة دي بشوهها ليها والله وحياة اولادي اقلب حياتها حجيم..
حاجة عشة= اصبري يا بتي خليك حكيمة ولدك ما تخسريهو عشانها الوليد جاهل وصغير.. وهي ما عاملة للفاضل اخوك حساب انتي بعيدة يابتي لكن انا شايفة معاها الوييل والعجب ابوك البت ما بتسمع كلمة زول والفاضل شغلو كلو بقى ليها لكن حرمان عليها تضوق الجنا..
_يمة شيخي قاااعد ومنتظر البياض طولنا منو بكرا نمشي ليهو فورت دمي بت السكران دي..
=سمح اسي نومي ارتاحي وقروشو قااعدة..شيلي من ملابسها بس بكرا..
..
الصباح صحيت بدري صليت ومشيت عملت الشاي للفاضل ولي ناس البيت اتوقعت سامية تعمل معاي مشكلة لكن بالعكس تتونس وتضحك قلت ده احمد ولدها هو اتكلم معاها..
اليوم كان عادي سامية وامها مشوا زيارة لي قريبتهم وخلوني في البيت مع اولادها الصغار..
اكتشفت اني بحب الأطفال جداً.. وانهم أحلى حاجة في الدنيا بحس معاهم إني امهم واختهم وصحبتهم.. القعدة معاهم تقريباً بي نص العمر حاجة تشيل منك الهم زي البرق..
