💞زواج تقليدي💞
# ﺍﻟﺤﻠﻘﻬﻪ ﺍﻟﻮﺍﺣﺪ ﻭ ﺍﻟﺜﻼﺛﻮﻥ 🌸
ﺍﻭﻝ ﻣﺎ ﺧﺸﻴﺖ ﺳﻤﻌﺖ ﺻﻮﺕ ﺍﻣﻴﻪ ﻓﻲ ﺍﻟﺤﻤﺎﻡ ﻭ ﻋﺮﻓﺘﻪ ﺍﻧﻪ ﻳﺄﺧﺬ ﻓﻲ ﺷﺎﻭﺭ
ﺟﻴﺖ ﻧﺒﻲ ﻧﺨﺶ ﺑﺲ ﺳﻤﻌﺖ ﺻﻮﺕ ﻧﻘﺎﻟﻪ // ﺭﺩﻳﺖ ﻧﺒﺤﺖ ﻭ ﻛﺎﻥ ﻣﺴﺞ ﻉ ﺍﻟﻔﺎﻳﺒﺮ
ﻭ ﻟﻤﺎ ﺑﺤﺘﺖ ﻛﺎﻥ ﻣﻜﺘﻮﺏ " ﻟﻴﺶ ﻣﺎ ﺗﺮﺩ ﻋﻠﻴﺎ ؟ ﺣﺘﻲ ﻟﻮ ﻣﺘﺰﻭﺝ ﻧﺒﻲ ﻧﺤﻜﻲ ﻣﻌﺎﻙ "
ﻋﺮﻓﺖ ﺍﻧﻪ ﻣﻦ ﻫﺬﻙ ﺍﻟﺒﻨﺖ ﻭ ﺑﻤﺎ ﺍﻧﻪ ﻣﺎ ﻋﻨﺪﺵ ﻓﻀﻮﻝ ﺑﻜﻞ ﺟﻴﺖ ﺧﺸﻴﺖ ﻉ ﺍﻟﻤﺴﺠﺎﺕ 🌚
ﻭ ﻫﻨﺎ ﺍﻧﺼﺪﻣﺖ ﻟﺪﺭﺟﺔ ﺍﻧﻲ ﻣﺎ ﻓﻄﻨﺘﺶ ﺍﻧﻪ ﻣﺤﻤﺪ ﻣﺼﺒﻲ ﻓﻮﻕ ﺭﺃﺳﻲ 😳😳
ﻛﺎﻥ ﻣﺤﻤﺪ ﻛﺎﺗﺒﻠﻬﺎ " ﻳﺎ ﺑﻨﺖ ﺍﻟﻨﺎﺱ ﻗﺘﻠﻚ ﺍﻧﻲ ﻣﺘﺰﻭﺝ ﺧﻼﺹ ﻭ ﻛﻴﻒ ﻣﺎ ﺍﻧﺘﻲ ﺷﻔﺘﻲ ﺣﻴﺎﺗﻚ ﺣﺘﻲ ﺍﻧﺎ ﺑﻨﺸﻮﻑ ﺣﻴﺎﺗﻲ ﻭ ﻣﺮﺍﺗﻲ ﻣﺎ ﺗﺴﺘﺤﻘﺶ ﺍﻧﻲ ﻧﺨﻮﻧﻬﺎ ﻣﻌﺎﻙ ﻭ ﻻ ﻣﻊ ﻏﻴﺮﻙ // ﺭﺩﻱ ﻋﻴﺸﻲ ﺣﻴﺎﺗﻚ ﻭ ﻃﻠﻌﻴﻨﻲ ﻣﻦ ﺭﺃﺳﻚ "
ﻧﻘﺮﺍ ﻭ ﺍﻧﺎ ﻣﺘﻨﺤﻪ 😳 ﻣﺤﻤﺪ ﻛﺎﺗﺒﻠﻬﺎ ﻫﻜﻲ ؟ ﻳﻌﻨﻲ ﺷﻨﻮ ؟ ﺟﺪﻳﺎﺕ ﻣﺶ ﻣﻔﻜﺮ ﻓﻴﻬﺎ ؟ ﻭ ﻻ ﻳﺒﻴﻨﻲ ﺍﻧﺎ ؟ ﻣﻌﺶ ﻓﻬﻤًﺖ ﺷﻲ
ﻗﻄﻊ ﺗﻔﻜﻴﺮﻱ ﺻﻮﺕ ﻣﺤﻤﺪ ﻭ ﻣﻦ ﺍﻟﻔﺠﻌﻪ ﺳﻜﺮﺕ ﺍﻟﻨﻘﺎﻝ ﻭ ﻋﺰﻓﺘﻪ ﻉ ﺍﻟﺼﺎﻟﻮﻥ
ﺍﻧﺎ << ﻛﻨﺖ ﻧﺸﻮﻑ ﻣﻨﻪ ﻓﻲ ﺍﻟﺴﺎﻋﻪ ﺑﺲ
ﻣﺤﻤﺪ << ﻭ ﺍﻧﺎ ﻣﺎ ﺳﺎﻟﺘﻜﺶ // ﺑﺲ ﻟﻴﺶ ﻋﺰﻓﺘﻴﻪ ﻫﻜﻲ ؟ !
ﺍﻧﺎ << ﻻ ﺑﺼﺪﻓﻪ ﻃﺎﺡ 😳
ﻣﺤﻤﺪ << ﻓﻲ ﺣﺪ ﻗﺎﻳﻠﻚ ﻣﻦ ﻗﺒﻞ ﺍﻧﻚ ﻣﺎ ﺗﻌﺮﻓﻴﺶ ﺗﻜﺬﺑﻲ ؟
ﺍﻧﺎ << ﺣﻮﻝ ﻣﻦ ﻗﺪﺍﻣﻲ ﺑﺎﻩ
ﻣﺤﻤﺪ << ﺑﺸﺮﻯ ؟ ﻧﺒﻲ ﻧﺴﺄﻟﻚ ؟
ﺍﻧﺎ << ﻧﻌﻢ ؟ ! 😪
ﻣﺤﻤﺪ << ﻣﻦ ﻣﻴﺪﻭ ﺻﺪﻳﻘﻚ ﻫﺬﺍ ؟
ﺭﻏﻢ ﺍﻧﻪ ﻣﺸﺎﻋﺮﻱ ﻛﺎﻧﻦ ﻣﺘﻠﺨﺒﻄﺎﺕ ﻭ ﺣﺎﺳﻪ ﺭﻭﺣﻲ ﻩ ﻧﻤﺮﺽ ﻭ ﻣﻀﺎﻳﻘﻪ ﺑﺲ ﻗﻌﺪﺕ ﻧﻀﺤﻚ 😂 ﻭ ﻋﺮﻓﺖ ﻣﺮﺍﺩ ﺷﻦ ﻣﻔﺘﺮﺵ 🌚😂
ﻣﺤﻤﺪ << ﻣﺎ ﻗﻠﺘﺶ ﻧﻜﺘﻪ ﺍﻧﺎ ؟
ﺍﻧﺎ << ﺍﻭﻝ ﺣﺎﺟﻪ ﺍﻧﺖ ﺑﺮﻭﺣﻚ ﻗﻠﺖ ﺻﺪﻳﻘﻲ ؟ ﺛﺎﻧﻲ ﺷﻲ ﺑﺼﻔﺘﻚ ﺷﻨﻮ ﺗﺴﺎﻝ ﻳﻌﻨﻲ ؟ !
ﺑﺮﻣﺖ ﻧﺒﻲ ﻧﻤﺸﻲ ﺑﺲ ﻣﺴﻜﻨﻲ ﻣﻦ ﻳﺪﻱ ﻭ ﻛﺮﻧﻲ ﺷﻮﺭﻩ
ﻋﻴﻮﻧﻲ ﻓﻲ ﻋﻴﻮﻧﻪ ﺍﻟﻠﻲ ﻛﺎﻧﻦ ﻗﺮﻳﺐ ﻳﻄﻠﻌﻦ
ﻣﺤﻤﺪ << ﺑﺼﻔﺘﻲ ﺭﺍﺟﻠﻚ ؟؟ ﺭ ﺍ ﺝ ﻝ ﻙ // ﻓﺎﻫﻤﻪ ﻭ ﻻ ﻧﻌﺎﻭﺩ ؟ !
ﺍﻧﺎ << ﺑﺎﻫﻲ ﻳﺎ ﺭﺍﺟﻠﻲ ﺷﻮﻑ ﺍﻟﻤﺴﺞ ﺍﻟﻠﻲ ﺟﺎﻳﻚ ﻣﻦ ﺻﺪﻳﻘﺘﻚ ﺃﻧﻈﻨﻲ ؟ !
ﺣﻮﻝ ﻳﺪﻩ ﻣﻨﻲ ﻭ ﻣﺸﻰ ﺧﺬﺍ ﺍﻟﻨﻘﺎﻝ ﻭ ﻃﻠﻊ ﺍﻟﺸﻔﺮﻩ ﻭ ﻗﺴﻤﻬﺎ ﻧﺼﻴﻦ 💔
ﻛﻨّﺖ ﻣﺼﺒﻴﻪ ﻓﻲ ﺫﻫﻮﻝ ﻭ ﻣﺶ ﻋﺎﺭﻓﻪ ﺷﻦ ﻧﺪﻳﺮ
ﻣﺤﻤﺪ << ﺗﻤﺎﻡ ﻫﻜﻲ ؟ !
ﻛﺎﻥ ﺻﻮﺗﻪ ﻋﺎﻟﻲ ﻟﺪﺭﺟﺔ ﺍﻧﻲ ﺧﻔﺖ ﻣﻨﻪ ﺟﺪﻳﺎﺕ ﻭ ﺗﻠﻘﺎﺋﻴﺎ ﻋﻴﻮﻧﻲ ﺩﻣﻌﻦ
ﺟﺎ ﺷﻮﺭﻱ ﻭ ﻳﺒﻲ ﻳﺤﻂ ﺇﻳﺪﻳﻪ ﻉ ﺭﺍﺳﻲ ﺑﺲ ﺍﻧﺎ ﻗﻌﺪﺕ ﻧﻮﺧﺮ ﻭ ﻧﺒﻜﻲ
ﺣﻂ ﻳﺪﻳﻪ ﻉ ﺭﺍْﺳﻪ ﻫﻮﺍ ﻭ ﻏﻤﺾ ﻋﻴﻮﻧﻪ ﻭ ﻗﻌﺪ ﺻﻮﺗﻪ ﻳﻮﻃﻰ ﺗﺪﺭﻳﺠﻴﺎ ﻭ ﻳﻘﻮﻝ
ﻣﺤﻤﺪ << ﻣﺎ ﺗﺒﻜﻴﺶ (( ﻣﺎﺍﺍﺍﺍﺍ ﺗﺒﻜﻴﻴﻴﻴﻴﻴﺶ
ﻭﺧﺮ ﻣﻨﻲ ﻭ ﺭﺩ ﻃﻠﻊ ﺍﺧﺮﻩ :: ﻗﻌﻤﺰﺕ ﻓﻲ ﺍﻟﻮﻃﺎ ﻭ ﻗﻌﺪﺕ ﻧﺒﻜﻲ ﺑﺲ ﺍﻭﻝ ﻣﺮﻩ ﻧﻘﻌﺪ ﻣﺶ ﻋﺎﺭﻓﻪ ﺍﻟﺪﻣﻮﻉ ﻫﺬﻳﻦ ﺩﻣﻮﻉ ﺯﻋﻞ ﻭ ﻻ ﻓﺮﺣﻪ ؟ !
ﺻﺒﻴﺖ ﻏﺴﻠﺖ ﻭﺟﻲ ﻭ ﻗﻌﻤﺰﺕ ﻉ ﺍﻟﺼﺎﻟﻮﻥ
ﻣﺸﻰ ﺍﻟﻮﻗﺖ ﻋﻨﺪ ﻣﺎ ﺟﺖ ﻓﺎﺗﻦ ﺗﻜﻠﻢ ﻓﻴﺎ ﻉ ﺍﻟﻌﺸﺎﺀ
ﻛﻨّﺖ ﺟﻌﺎﻧﻪ ﺑﻜﻞ ﻭ ﻧﺰﻟﺖ ﻣﻌﺎﻫﺎ
ﻓﺘﺤﻴﻪ << ﺍﺣﻤﻴﺪﻩ ﻭﻳﻦ ؟
ﺍﻧﺎ << ﻃﻠﻊ ﻣﺶ ﻋﺎﺭﻓﻪ ﻭﻳﻦ ﻣﺸﻰ
ﺭﻣﺰﻱ << ﺃﻫﻮ ﺟﺎ ﻋﻤﺮﻩ ﻃﻮﻳﻞ
ﻣﻨﺎﺭ << ﻫﻬﻬﻬﻬﻪ ﺣﻤﺎﺗﻚ ﺑﺘﺤﺒﻚ
ﻣﺤﻤﺪ << ﺯﻋﻤﻚ ؟
ﻣﺮﺍﺩ << ﻣﺎ ﺍﻧﻀﻨﻴﺶ
ﻣﺤﻤﺪ << 😒
ﻋﺒﺪﺍﻟﻠﻪ << ﻭﻳﻦ ﻛﻨﺖ ؟
ﻣﺤﻤﺪ << ﻛﻨﺖ ﻧﺠﻴﺐ ﻓﻲ ﻧﻘﺎﻝ ﻟﻴﺎ ﻭ ﻝِ ﺑﺸﺮﻯ
ﻣﻨﺎﺭ << ﻛﻴﻒ ﻭﻳﻦ ﻧﻘﺎﻟﻬﺎ ؟
ﻣﺤﻤﺪ << ﺍﻧﻜﺴﺮ ﻣﻨﻬﺎ ﺍﻟﻴﻮﻡ
ﻣﺮﺍﺩ << ﻭ ﺍﻧﺖ ﻟﻴﺶ ﺷﺎﺭﻱ ؟ 😒
ﻣﺤﻤﺪ << ﻣﻠﻴﺖ ﻣﻨﻪ ﺍﻻﻭﻝ ﻭ ﺍﻫﺎ ﺧﺬﻳﺖ ﺣﺘﻲ ﺷﻔﺮﻩ ﺟﺪﻳﺪﻩ ﻭ ﻣﺎ ﻓﺶ ﺩﺍﻋﻲ ﺍﻟﻌﻴﻠﻪ ﻛﻠﻬﺎ ﺗﺄﺧﺬ ﺍﻟﺮﻗﻢ ﺃﻫﻮ ﻗﻠﺘﻠﻜﻢ ﻣﻦ ﺗﻮﺍ
ﻓﺘﺤﻴﻪ << ﺑﺎﻫﻲ ﻗﻌﻤﺰ ﻛﻮﻝ
ﻣﺤﻤﺪ << ﻻﻻ ﻣﺎ ﻧﺒﻴﺶ
ﺍﻧﺎ << ﺑﺲ ﺣﺘﻲ ﻏﺪﺍﺀ ﻣﺎ ﺗﻐﺪﻳﺖ
ﺗﻲ ﺷﻦ ﺩﺧﻠﻨﻲ ﻓﻴﻪ ﺍﻧﺎ ؟ ! ﻋﻨﻪ ﻭ ﺍﻟﻠﻪ ﻣﺎ ﻗﻌﻤﺰ 🌚 ﺑﺲ ﺃﻫﻮ ﺣﻨﺎﻥ ﺍﻻﻡ ﺷﻜﻠﻪ 💔😂
ﺑﺤﺖ ﻓﻴﺎ ﻭ ﺟﺎ ﻗﻌﻤﺰ ﺟﻨﺒﻲ
ﻗﻌﺪﻧﺎ ﻧﺎﻛﻠﻮ ﺑﺲ ﻫﻮﺍ ﻳﺒﺤﺖ ﻓﻴﺎ ﻭ ﻣﺎ ﻛﻼ ﺷﻲ
ﺻﺒﻴﺖ ﻧﺸﻴﻞ ﻓﻲ ﺍﻟﺘﺒﺎﺳﻲ ﻭ ﻫﻮﺍ ﻃﻠﻊ ﺑﺎﻛﻮ ﺍﻟﺪﺧﺎﻥ ﻭ ﻭﻟﻊ ﺳﺒﺴﻲ
ﻣﺤﻤﺪ << ﻣﻨﺎﺭ ﺩﻳﺮﻳﻠﻲ ﻓﻨﺠﺎﻥ ﻗﻬﻮﻩ
ﻣﻨﺎﺭ << ﺗﻮﺍ ؟ ﻛﻴﻒ ﻩ ﺗﺮﻗﺪ ؟
ﻣﺤﻤﺪ << ﺭﺍﺳﻲ ﻣﺼﺪﻉ ﺩﻳﺮﻱ ﻭ ﺍﻧﺘﻲ ﺳﺎﻛﺘﻪ
ﺣﺘﻲ ﻣﻊ ﺍﺧﺘﻪ ﻣﺎ ﻋﻨﺪﻩ ﺍُﺳﻠﻮﺏ 😒 ﺧﺸﻴﺖ ﺍﻧﺎ ﻭ ﻣﻨﺎﺭ ﻟﻠﻤﻄﺒﺦ ﻭ ﻗﻌﺪﺕ ﺍﺩﻳﺮﻱ ﻓﻴﻬﺎ
ﺍﻧﺎ << ﻣﻦ ﺟﺪﻙ ﺍﻧﺘﻲ ؟ ﻣﺎ ﺃﺩﻳﺮﻳﺶ
ﻣﻨﺎﺭ << ﻓﻜﻴﻨﺎ ﻣﻨﻪ ﺗﻮ ﻳﻨﻔﺼﻞ ﻭ ﻫﺬﺍ ﺑﻌﺪ ﻳﻨﻔﺼﻞ ﻣﻌﺶ ﻳﺴﻜﺖ
ﺍﻧﺎ << ﻃﻔﻲ ﻋﻠﻴﻬﺎ ﺑﺲ
ﻳﻌﻨﻲ ﺑﻐﺾ ﺍﻟﻨﻈﺮ ﻋﻦ ﺍﻟﻠﻲ ﻳﺪﻳﺮ ﻓﻴﻪ ﺑﺲ ﺍﻧﺎ ﻃﻴﺒﻪ 🌚 ﻣﺸﻴﺖ ﺻﺒﻴﺖ ﻃﺎﺳﺔ ﻋﺼﻴﺮ ﻭ ﺷﻠﺘﻬﺎ ﻟﻪ
ﻣﺤﻤﺪ << ﻫﺬﻩ ﻗﻬﻮﻩ ﻣﺜﻼ ؟ !
ﺍﻧﺎ << ﺷﺮﺑﺖ ﻭﺍﺟﺪ ﺍﻟﻴﻮﻡ ﻣﺶ ﻛﻮﻳﺴﻪ ﻋﻠﻴﻚ
ﻣﺤﻤﺪ << ﻣﺶ ﺍﻧﺎ ﻣﺶ ﻫﺎﻣﻚ ؟ ! ﺷﻦ ﺗﻔﺮﻕ ﻣﻌﺎﻙ ﻧﺸﺮﺑﻬﺎ ﻭ ﻻ ﻻ ؟ ! // ﺍﻣﺸﻲ ﻗﻮﻟﻲ ﻝ ﻣﻨﺎﺭ ﺍﺩﻳﺮﻟﻲ ﻓﻨﺠﺎﻥ
ﻛﺎﻥ ﻣﻘﻌﻤﺰ ﻉ ﺍﻟﺼﺎﻟﻮﻥ ﻭ ﻣﻘﺎﺑﻠﻪ ﻣﺮﺍﺩ // ﻃﺒﺴﺖ ﺷﻮﺭﻩ ﻭ ﻗﻠﺘﻠﻪ ﻓﻲ ﻭﺫﻧﻪ
ﺍﻧﺎ << ﻟﻮ ﻣﺎ ﺷﺮﺑﺘﺶ ﺍﻟﻌﺼﻴﺮ ﻭ ﻓﺘﺖ ﺍﻟﻘﻬﻮﻩ ﻩَ ﻧﺒﻜﻲ ! ؟
ﻭ ﻓﻲ ﻟﺤﻈﻪ ﺧﺬﺍ ﻣﻨﻲ ﻳﺪﻱ ﺍﻟﻄﺎﺳﻪ // ﻗﻌﻤﺰﺕ ﻉ ﺍﻟﺼﺎﻟﻮﻥ ﺍﻟﻠﻲ ﺟﻨﺒﻪ
ﻓﻄﻨﺘﻠﻪ ﺻﺒﻰ ﻭ ﻗﻠﺖ ﺃﻛﻴﺪﻩ ﻩ ﻳﻄّﻠﻊ ﻳﺪﺧﻦ ﺍﺧﺮﻩ 😏
ﺑﺲ ﻟﻤﺎ ﺻﺒﻰ ﺟﺎ ﻗﻌﻤﺰ ﺟﻨﺒﻲ ﻭ ﻗﺎﻟﻲ
ﻣﺤﻤﺪ << ﻣﺶ ﺗﺤﺴﺎﺑﻴﻨﻲ ﺧﺎﻳﻒ ؟ ! ﻏﻴﺮ ﺷﺮﺑﺘﻪ ﻋﺸﺎﻥ ﺧﺎﻃﺮﻱ ﻓﻴﻪ ﺑﺲ
ﺍﻧﺎ << ﺍﻫﺎ (( ﺑﺎﻫﻲ ﺗﻤﺎﻡ
ﻣﺤﻤﺪ << ﻭ ﻣﻌﺶ ﺗﻌﺎﻭﺩﻳﻬﺎ
ﺻﺒﻰ ﻣﺮﺍﺩ ﻭ ﺑﻌﺪ ﺭﺩ ﻛﺎﻥ ﻓﻲ ﻳﺪﻩ ﻛﻴﺲ ﻣﻠﻴﺎﻥ ﺷﻮﻛﻮﻻ ﻭ ﻋﻄﺎﻩ ﻟﻴﺎ
ﻣﺤﻤﺪ << ﺷﻨﻮ ﻫﺬﺍ !!
ﺍﻧﺎ << ﺻﺤﻴﺖ ﻭ ﺍﻟﻠﻪ 😍
ﻣﺮﺍﺩ << ﺍﻗﺴﻤﻲ ﻋﻠﻴﻨﺎ ﻣﻨﻬﻦ ﺑﺲ 😂
ﺍﻧﺎ << ﺣﺎﺿﺮ 😂
ﻣﻨﺎﺭ << ﻭ ﺷﻦ ﺍﻟﻤﻨﺎﺳﺒﻪ 😂
ﺍﻧﺎ << ﺍﻧﺎ ﻭﺻﻴﺘﻪ ﻗﻠﺘﻠﻪ ﺟﻴﺒﻠﻲ ﺣﺎﺟﻪ ﺣﻠﻮﻩ 🙊
ﺻﺒﻰ ﻣﺤﻤﺪ ﻭ ﻃﻠﻊ ﻟﻠﺠﻨﻴﻨﻪ // ﺑﺲ ﻣﺶ ﻫﺎﻣﻨﻲ 😌
ﻣﻨﺎﺭ << ﻛﻨﻪ ﻣﺤﻤﺪ ﺍﻟﻴﻮﻡ ؟ !
ﻣﺮﺍﺩ << ﺭﺍﻗﻴﻠﻪ ﻭ ﻣﺶ ﻗﺎﺩﺭ ﻳﺪﺱ 😂
ﻓﺎﺗﻦ << ﻳﺪﺱ ﺷﻨﻮ ؟ !
ﺭﻣﺰﻱ << ﺷﻜﻠﻚ ﺍﻧﺖ ﻭﺭﺍ ﺍﻟﻘﺼﻪ ؟
ﻣﺮﺍﺩ << ﺃﺑﺪﺍ 😂
ﻣﻨﺎﺭ << ﺑﺸﻪ ﺯﻋﻼﻧﻴﻦ ﻣﻦ ﺑﻌﻀﻜﻢ ؟
ﺍﻧﺎ << ﻻﻻ 🌚
ﻣﻨﺎﺭ << ﺑﺎﻫﻲ ﻋﺪﻱ ﻋﻄﻴﻪ
ﺍﻧﺎ << ﺑﺎﻟﻚ ﻣﺎ ﻳﺒﻴﺶ
ﻣﻨﺎﺭ << ﻻ ﻳﺒﻲ
ﺍﻧﺎ << ﻳﻌﻨﻲ ﻻﺯﻡ ﻧﺼﺒﻲ ؟ 😕
ﻣﻨﺎﺭ << ﻣﻌﻨﺎﻫﺎ ﻓﻲ ﺣﺎﺟﻪ ﺻﺎﺡ ؟ !
ﺍﻧﺎ << ﺗﻲ ﻻﻻ 😂
ﻣﻨﺎﺭ << ﻣﻌﻨﺎﻫﺎ ﺍﻣﺸﻲ 😂
ﺍﻧﺎ << ﺍﻧﺒﺎﻩ
ﺧﺬﻳﺖ ﻃﺮﻑ ﻓﻲ ﻳﺪﻱ ﻭ ﻃﻠﻌﺖ ﺑﺮﺍ ﺑﺲ ﻣﺎ ﻛﻨﺶ ﺑﺎﻳﻦ ﻋﻠﻴﺎ
ﻗﻌﺪﺕ ﻧﺒﺮﻡ ﻋﻨﺪ ﻓﻄﻨﺖ ﻟﺤﺮﻛﻪ ﻓﻲ ﻧﻬﺎﻳﺔ ﺍﻟﺠﻨﻴﻨﻪ ﻭ ﻣﺸﻴﺖ ﺷﻮﺭﻩ
ﺍﻧﺎ << ﻣﺤﻤﺪ
ﻣﺤﻤﺪ << ﻧﻌﻢ " ﻭ ﺑﺮﻡ ﻉ ﻃﻮﻝ ﻳﺒﺤﺖ ﻓﻴﺎ ﻭ ﻋﺰﻕ ﺍﻟﺴﺒﺴﻲ ﻭ ﻗﻌﺪ ﻳﻌﻔﺲ ﻋﻠﻴﻪ ﺑﻴﺶ ﻳﻄﻔﻰ "
ﺍﻧﺎ << ﺟﺒﺘﻠﻚ ﻫﺬﻩ " ﻭ ﻣﺪﻳﺘﻠﻪ ﺍﻟﻄﺮﻑ "
ﻣﺤﻤﺪ << ﺧﻠﻴﻚ ﺷﻮﻳﻪ
ﺧﺬﺍ ﻣﻨﻲ ﺍﻟﺸﻮﻛﻮﻻ ﻭ ﻓﺘﺤﻬﺎ // ﻛﺎﻥ ﻳﺒﺤﺖ ﻓﻴﺎ ﺑﻨﻈﺮﻩ ﺍﻭﻝ ﻣﺮﻩ ﻧﺸﻮﻓﻬﺎ
ﻛﺄﻧﻪ ﻧﺎﺩﻡ ﻭ ﻻ ﻣﺶ ﻋﺎﺭﻓﻪ ﻳﻌﻨﻲ
ﻗﺮﺏ ﻣﻨﻲ ﻭ ﻗﺴﻢ ﻗﻄﻌﻪ ﻣﻨﻬﺎ ﻭ ﺣﻄﻬﺎ ﻓﻲ ﻓﻤﻲ ﻭ ﺍﻧﺎ ﺑﺪﻭﻥ ﺁﻱ ﻣﻘﺎﻭﻣﻪ ﻓﺘﺤﺖ ﻓﻤﻲ ﻭ ﻛﻠﻴﺘﻬﺎ
ﻣﺤﻤﺪ << ﺣﻮﻟﺘﻲ ﺍﻟﻤﻮﺿﻮﻉ ﻣﻦ ﺭﺃﺳﻚ ؟
ﺍﻧﺎ << ﺍﻱ ﻣﻮﺿﻮﻉ ؟ !
ﻣﺤﻤﺪ << ﺍﻟﻠﻲ ﺑﻌﺪ ﺷﻬﺮ ؟
ﺍﻧﺎ << ﺍﻫﺎ // ﺗﻮﺍ ﺍﻟﺴﺎﻋﻪ 12 ﻳﻌﻨﻲ ﻧﻘﺺ ﻳﻮﻡ ﻭ ﻗﻌﺪﻥ 29 😌👌
ﺑﺮﻣﺖ ﻭ ﻗﻌﺪﺕ ﻧﻤﺸﻲ // ﻛﺎﻥ ﻳﻨﺎﺩﻱ ﻓﻴﺎ ﺑﺲ ﺩﺭﺕ ﺭﻭﺣﻲ ﻣﺎ ﻧﺴﻤﻌﺶ ﻓﻴﻪ ﻭ ﺧﺸﻴﺖ ﺟﻮﺍ
ﻫﺪﺭﺯﺕ ﻣﻊ ﻣﻨﺎﺭ ﻭ ﻓﺎﺗﻦ ﺷﻮﻳﻪ ﻭ ﺑﻌﺪﻫﺎ ﺭﻛﺒﺖ ﻓﻮﻕ ﻭ ﺑﻌﺪﻫﺎ ﺭﻛﺐ ﻫﻮﺍ
ﻗﺎﻟﻲ ﻭﻳﻦ ﺍﻟﺸﻔﺮﻩ ﻣﺘﺎﻋﻲ ﻋﺸﺎﻥ ﻳﺤﻄﻬﺎ ﻟﻴﺎ ﻓﻲ ﺍﻟﻨﻘﺎﻝ ﺍﻟﺠﺪﻳﺪ
ﻃﻠﻌﺘﻬﺎ ﻣﻦ ﺍﻟﺸﻨﻄﻪ ﻭ ﺭﻛﺒﻬﺎ ﻭ ﺭﻛﺐ ﺷﻔﺮﺗﻪ ﺍﻟﺠﺪﻳﺪ ﻓﻲ ﻧﻘﺎﻟﻪ ﻭ ﺧﺰﻧﻠﻲ ﺭﻗﻤﻪ
ﺟﺎ ﻉ ﺍﻟﺴﺮﻳﺮ ﻭ ﻳﺒﻲ ﻳﺮﻗﺪ
ﺍﻧﺎ << ﻳﺎ ﺍﻧﺎ ﻳﺎ ﺍﻧﺖ ﻓﻲ ﺍﻟﺪﺍﺭ ﺭَﺁﻩ ؟ !
ﻣﺤﻤﺪ << ﻳﺮﺍ ﻛﻨﻚ ﺍﻧﺘﻲ ﻫﻜﻲ ؟ !
ﺍﻧﺎ << ﺗﻌﺎﻝ ﺍﻧﺖ ﺗﺮﻳﺢ ﻭ ﺗﻮ ﻧﻄﻠﻊ ﺍﻧﺎ
ﻣﺤﻤﺪ << ﺍﻃﻠﻌﻲ 😒 ﻉ ﺍﺳﺎﺱ ﺗﻠﻮﻱ ﻓﻲ ﺫﺭﺍﻋﻲ ﻣﺜﻼ ؟ !
ﻭ ﺑﺎﻟﻔﻌﻞ ﺧﺬﻳﺖ ﻣﺨﺪﺗﻲ ﻭ ﻃﻠﻌﺖ ﺑﺮﺍ ﻭ ﺭﻗﺪﺕ 😒
//
//
//
" ﻣﺤﻤﺪ "
ﻛﺎﻧﻦ ﻓﻲ ﻋﺮﻡ ﺃﻓﻜﺎﺭ ﻓﻲ ﺭﺍﺳﻲ ﻭ ﻣﺘﻠﺨﺒﻂ ﺑﺲ ﺍﻟﺤﺎﺟﻪ ﺍﻟﻮﺣﻴﺪﺓ ﺍﻟﻠﻲ ﻋﺎﺭﻓﻬﺎ ﺍﻧﻲ ﻧﺒﻴﻬﺎ ﺗﻘﻌﺪ ﻣﻌﺎﻳﺎ
ﻧﺒﻲ ﺑﺸﺮﻯ ! ؟
ﻗﻌﺪﺕ ﻃﻮﻝ ﺍﻟﻠﻴﻞ ﻭﺍﻋﻲ ﻭ 100 ﺣﺎﺟﻪ ﺟﺖ ﻉ ﺑﺎﻟﻲ
ﻛﻼﻡ ﻣﺮﺍﺩ ؟ ! ﺻﺪﻳﻘﻬﺎ ! ؟ ﺳﻮْﺍﻝ ﻋﺜﻤﺎﻥ ﻋﻠﻴﻬﺎ ؟ !
ﻛﻠﻬﻢ ﻳﺸﻮﻓﻮ ﻓﻲ ﻧﻔﺲ ﺍﻟﺤﺎﺟﻪ ﻓﻴﻬﺎ ؟ ! ﻛﻠﻬﻢ ﻋﺎﺭﻓﻴﻦ ﺍﻧﻬﺎ ﻣﺎ ﻓﺶ ﻣﻨﻬﺎ ﺍﺛﻨﻴﻦ ؟
ﻗﻤﻪ ﻓﻲ ﺍﻟﺠﻤﺎﻝ ﻭ ﺍﻟﻄﺒﻴﻪ ﺭﻏﻢ ﻃﻮﻝ ﻟﺴﺎﻧﻬﺎ
ﺣﺴﺎﺳﻪ ﻭ ﻧﺎﻋﻤﻪ ﻛﻴﻒ ﺍﻟﻮﺭﺩ // ﻣﺶ ﻋﺎﺭﻑ ﻫﻞ ﺑﺪﻳﺖ ﻧﺤﺒﻬﺎ ﻭ ﻻ ﺑﺪﻳﺖ ﻧﺘﻌﻮﺩ ﻋﻠﻴﻬﺎ ﺑﺲ ؟
ﻟﻤﺎ ﻧﻘﺮﺏ ﻣﻨﻬﺎ ﻧﺤﺲ ﺑﺤﺎﺟﻪ ﻭ ﻓﻲ ﻧﻔﺲ ﺍﻟﻮﻗﺖ ﻣﺎ ﻧﺒﻴﺶ ﻳﺼﻴﺮ ﺷﻲ ﺑﻴﻨﺎﺗﻨﺎ ﻋﻨﺪ ﻣﺎ ﺗﻜﻮﻥ ﻫﻲ ﺗﺒﻴﻨﻲ ؟
ﺑﺲ ﻣﻦ ﺍﻭﻝ ﻣﺎ ﺧﺸﺖ ﺣﻴﺎﺗﻲ ﻭ ﻫﻲ ﺩﻳﻤﺎ ﺯﻋﻼﻧﻪ ﻭ ﺗﺒﻜﻲ ﻭ ﻫﺬﺍ ﺍﻟﻠﻲ ﻣﻮﺟﻊ ﻗﻠﺒﻲ 💔
((
((
((
ﻧﻀﺖ ﺗﺎﻧﻲ ﻳﻮﻡ ﻭ ﻟﻘﻴﺘﻪ ﻣﺶ ﻗﺎﻋﺪ // ﺻﺒﻴﺖ ﻛﻴﻒ ﻛﻞ ﻳﻮﻡ ﻭ ﺩﺭﺕ ﺍﻟﻠﻲ ﻧﺪﻳﺮ ﻓﻴﻪ ﻭ ﺑﻌﺪﻫﺎ ﻧﺰﻟﺖ ﻓﻄﺮﺕ ﻣﻌﺎﻫﻢ ﻟﻮﻃﺎ
ﻛﺴﺪﺕ ﺷﻮﻳﻪ ﻣﻊ ﻋﻤﺘﻲ ﺑﻌﺪﻫﺎ ﺭﻛﺒﺖ ﻧﺮﻥ ﻉ ﺣﻨﺎﻥ ﻭ ﻗﻌﺪﺕ ﻧﻬﺪﺭﺯ ﻣﻌﺎﻫﺎ ﻭ ﻓﻄﻨﺖ ﻝ ﻣﺤﻤﺪ ﺧﺶ ﻋﻠﻴﺎ ﺍﻧﺘﻈﺎﺭ ﺑﺲ ﻣﺎ ﻋﺪﻟﺘﺶ 😌
ﻛﻤﻠﺖ ﻫﺪﺭﺯﺗﻲ ﻣﻌﺎﻫﺎ ﻭ ﺣﻄﻴﺖ ﺍﻟﻔﻮﻥ ﻓﻲ ﺍﻟﺸﺤﻦ ﺑﻌﺪﻫﺎ ﻣﺸﻴﺖ ﻧﻐﺴﻞ ﻓﻲ ﺷﻮﻳﺔ ﺍﻟﺪﺑﺶ 🙊😂
ﻣﺸﻰ ﺍﻟﻮﻗﺖ ﻭ ﺍﻧﺎ ﻧﻐﺴﻞ ﻭ ﺳﺮﺣﺎﻧﻪ ﻭ ﻣﺎ ﻓﻄﻨﺘﺶ ﺍﻻ ﻭ ﻣﺤﻤﺪ ﻣﺼﺒﻲ ﻋﻨﺪ ﺍﻟﺒﺎﺏ
ﺍﻧﺎ << ﺑِﺴْﻢ ﺍﻟﻠﻪ 😳😳
ﻣﺤﻤﺪ << ﺍﻧﻔﺠﻌﺘﻲ ؟ ! ﻃﺒﻌﺎ ﻣﺶ ﻣﺘﻮﻗﻌﻪ ﺍﻧﻲ ﺍﻧﺠﻲ ﻓﻲ ﺍﻟﻮﻗﺖ ﻫﺬﺍ (( ﻛﻨﺘﻲ ﻭﺍﺧﺬﻩ ﺭﺍﺣﺘﻚ ﻣﻌﺎﻩ ﻋﺎﺩ
ﺍﻧﺎ << ﻧﻌﻢ ؟ !
ﻣﺤﻤﺪ << ﻭﻳﻦ ﺍﻟﻨﻘﺎﻝ ؟
ﻭ ﻫﻨﺎ ﻓﻬﻤﺖ ﺷﻦ ﻳﻘﺼﺪ 😕
ﺍﻧﺎ << ﻣﻌﺰﻭﻕ ﻓﻲ ﺍﻟﺸﺤﻦ 😏
ﻣﺤﻤﺪ << ﻛﻨﺘﻲ ﺗﺤﻜﻲ ﻣﻌﺎﻩ ؟ !
ﺍﻧﺎ << ﺭﺑﻲ ﻳﺸﻔﻲ 😐
ﻣﺤﻤﺪ << ﺗﺸﻮﻓﻲ ﻓﻴﺎ ﻣﺮﻳﺾ ﻗﺪﺍﻣﻚ ؟ !
ﺍﻧﺎ << ﻻ ﺍﻧﺎ ﺍﻟﻤﺮﻳﻀﻪ ﺍﻟﻠﻲ ﻣﺎﺯﻟﺖ ﻗﺎﻋﺪﻩ ﻣﻌﺎﻙ
ﻭ ﻃﻠﻌﺖ ﻣﻦ ﺍﻟﺤﻤﺎﻡ ﻭ ﻫﻮﺍ ﺟﺎ ﻭﺭﺍﻳﺎ // ﻛﺮﻳﺖ ﺍﻟﻨﻘﺎﻝ ﻣﻦ ﺍﻟﺸﺤﻦ ﻭ ﻓﺘﺤﺖ ﻉ ﺍﻟﻤﻜﺎﻟﻤﺎﺕ ﻭ ﻣﺎ ﻛﻨﺶ ﻓﻲ ﺍﻻ ﻣﻜﺎﻟﻤﺔ ﺣﻨﺎﻥ
ﻣﺴﻜﺖ ﻳﺪﻩ ﻭ ﻓﺘﺤﺘﻬﺎ :/ ﺣﻄﻴﺘﻠﻪ ﺍﻟﻨﻘﺎﻝ ﻭ ﻗﻠﺘﻠﻪ
ﺍﻧﺎ << ﺷﻮﻑ ﻫﻞ ﻓﻲ ﻧﻔﺲ ﻭﻗﺖ ﺭﻧﺘﻚ ﻭ ﻻ ﻻ ؟ !
ﻣﻌﺶ ﺗﺤﻤﻠﺖ ﻟﻌﺐ ﺍﻟﻌﻴﺎﻝ ﺍﻟﻠﻲ ﻗﺎﻋﺪ ﻳﺼﻴﺮ ﻭ ﺭﺩﻳﺖ ﺧﺬﻳﺖ ﺍﻟﻨﻘﺎﻝ ﻣﻨﻪ ﻭ ﺭﻧﻴﺖ ﻉ ﺍﻳﻬﻢ
ﺍﻳﻬﻢ << ﺧﻴﺮ ﻭ ﻣﺮﺣﺒﺎ
ﺍﻧﺎ << ﺍﻳﻬﻢ ﻭﻳﻦ ﻗﺎﻋﺪ ؟ !
ﺍﻳﻬﻢ << ﻣﺮﻭﺡ ﻣﻦ ﺍﻟﺠﺎﻣﻌﻪ / ﺷﻦ ﻓﻲ ؟ !
ﺍﻧﺎ << ﻧﺒﻴﻚ ﺍﺗﺠﻲ ﻭ ﺗﺄﺧﺬﻧﻲ
ﺍﻳﻬﻢ << ﺻﺎﻳﺮ ﻣﻌﺎﻙ ﺷﻲ ؟ !
ﺍﻧﺎ << ﺗﻌﺎﻝ ﺑﺲ
ﺍﻳﻬﻢ << ﺭﺑﻊ ﺳﺎﻋﻪ ﻭ ﻧﻜﻮﻥ ﻋﻨﺪﻙ
ﺍﻧﺎ << ﺗﻢ
ﺳﻜﺮﺕ ﻭ ﺣﻄﻴﺖ ﺍﻟﻨﻘﺎﻝ ﻉ ﺍﻟﺴﺮﻳﺮ ﻭ ﻣﺤﻤﺪ ﺍﻣﺼﺒﻲ ﻭ ﻣﺼﺪﻭﻡ
ﺧﺬﻳﺖ ﺍﻟﺸﻨﻄﻪ ﻭ ﺣﻄﻴﺖ ﻓﻴﻬﺎ ﺩﺑﺶ ﻭ ﻓﺘﺤﺖ ﺍﻟﺒﺎﺏ ﻭ ﻧﺰﻟﺖ ﺑﻴﻬﺎ
ﻛﺎﻧﻮ ﻛﻠﻬﻢ ﻣﻘﻌﻤﺰﻳﻦ ﻟﻮﻃﺎ ﻭ ﺍﻭﻝ ﻣﺎ ﺷﺎﻓﻮﻧﻲ ﻧﺎﺯﻟﻪ ﺏ ﺍﻟﺸﻨﻄﻪ ﻋﻤﻲ ﺻﺒﻰ ﻭ ﺟﺎ ﺷﻮﺭﻧﺎ
ﻋﺒﺪﺍﻟﻠﻪ << ﺍﻥ ﺷﺎﺀ ﺍﻟﻠﻪ ﺧﻴﺮ ﻉ ﻭﻳﻦ ﻳﺎ ﺑﻨﺘﻲ ؟؟
ﻣﺤﻤﺪ << ﻧﺤﻜﻲ ﻣﻌﺎﻙ ﺃﻧﻈﻨﻲ ؟ ! ﺭﺩﻱ ﺍﻟﺨﺮﺍ ﻓﻮﻕ ﻭ ﺍﺭﻛﺒﻲ ؟
ﺍﻧﺎ << ﺷﻔﺖ ﺃﺳﻠﻮﺑﻪ ﻳﺎ ﻋﻤﻲ ؟ ! ﻳﺤﺎﺳﺒﻨﻲ ﺟﺎﻳﻪ ﻣﻦ ﺍﻟﺸﺎﺭﻉ ؟ !
ﻋﺒﺪﺍﻟﻠﻪ << ﺣﺸﺎﻙ ﻳﺎ ﺍﺑﻨﻴﺘﻲ ﻏﻴﺮ ﻓﻬﻤﻴﻨﻲ ﺷﻦ ﺻﺎﻳﺮ
ﻣﺤﻤﺪ << ﻫﺎﺗﻲ ﺍﻟﺨﺮﺍ ﻣﻦ ﻳﺪﻙ " ﻭ ﻗﻌﺪ ﻳﺒﻲ ﻳﺄﺧﺬ ﺍﻟﺸﻨﻄﻪ ﻣﻨﻲ "
ﻋﺒﺪﺍﻟﻠﻪ << ﻣﺤﻤﺪ ؟ ! ؟ " ﻋﻴﻂ ﻓﻴﻪ ﺑﺼﻮﺕ ﻋﺎﻟﻲ ﻋﻨﺪ ﻧﺰﻝ ﻗﺒﻠﻲ ﺑﻜﻢ ﺩﺭﺟﻪ "
ﻓﺘﺤﻴﻪ << ﺃﻛﻴﺪﻩ ﻋﻴﻦ ﻫﺬﻩ ﻭﺍﺿﺤﻪ ﻳﺎﻧﻌﻠﻴﺎ
ﻣﺮﺍﺩ << ﻋﻴﻦ ﻉ ﺷﻨﻮ ﺑﻀﺒﻂ ؟ ! ﻉ ﻗﻠﺔ ﺃﺩﺑﻪ ﻭ ﻻ ﻉ ﺍﻧﻪ ﻣﺶ ﻣﺤﺘﺮﻡ ﺣﺪ ؟ ! 😕
ﺭﻣﺰﻱ << ﻣﺮﺍﺩ ﺃﻃﻠﻊ ﻣﻦ ﺍﻟﻤﻮﺿﻮﻉ
ﻣﺤﻤﺪ << ﺍﺻﻼ ﻛﻠﻪ ﻣﻨﻪ
ﺍﻧﺎ << ﻳﺎ ﻋﻤﻲ ﻧﺒﻲ ﻧﺤﻜﻲ ﻣﻌﺎﻙ ﻗﺒﻞ ﻣﺎ ﺇﻳﺠﻲ ﺍﻳﻬﻢ
ﻋﺒﺪﺍﻟﻠﻪ << ﺗﻌﺎﻟﻲ ﻣﻌﺎﻳﺎ
ﻣﺤﻤﺪ << ﻳﺎ ﺑﺎﺗﻲ ﻣﺶ ﻩ ﺗﻄﻠﻊ ﻣﻦ ﻫﻨﺎ ﺭﺍ ﺗﻲ ﺍﻫﺎ ﺗﺒﻲ ﺗﻤﺸﻲ ﻋﺸﺎﻥ ﺗﺄﺧﺬ ﺭﺍﺣﺘﻬﺎ ﻏﺎﺩﻱ ﻭ ﺗﻬﺪﺭﺯ ﻣﻊ ﻣﻴﺪﻭ
ﻋﺒﺪﺍﻟﻠﻪ << ﺗﺤﺸﻢ ﻉ ﻭﺟﻚ ﻭ ﺳﻜﺮ ﻓﻤﻚ
ﻣﻦ ﺟﺪﻩ ﻫﺬﺍ ؟ ! ﻳﺤﻜﻲ ﻫﻜﻲ ﻗﺪﺍﻡ ﻫﻠﻪ ؟ ! ﻭ ﻳﺎ ﺭﻳﺖ ﺣﺘﻲ ﺻﺎﺡ ﺍﺻﻼ ؟ ! 😳
ﻭ ﺍﻧﺎ ﻣﺎﺯﻟﺖ ﻣﺼﺒﻴﻪ ﺭِﻥ ﻋﻠﻴﺎ ﺍﻳﻬﻢ ﻭ ﻗﺎﻟﻲ ﻭﺻﻠﺖ ﺍﻃﻠﻌﻲ
ﺣﻄﻴﺖ ﺍﻟﻨﻘﺎﻝ ﻉ ﺍﻟﻄﺎﻭﻟﻪ ﻭ ﺑﺤﺘﺖ ﻓﻲ ﻋﻤﻲ ﻭ ﻗﻠﺘﻠﻪ
ﺍﻧﺎ << ﻣﻌﺶ ﻧﻘﺪﺭ ﻧﺘﺤﻤﻞ ﺍﻛﺜﺮ ﻣﻦ ﻫﻜﻲ :: ﻭ ﺗﻮ ﺧﺎﻟﺪ ﻳﺘﻔﺎﻫﻢ ﻣﻌﺎﻙ ﻉ ﺍﻟﺒﺎﻗﻲ
ﻋﺒﺪﺍﻟﻠﻪ << ﻏﻴﺮ ﻭﺳﻌﻲ ﺑﺎﻟﻚ ﻭ ﻛﻞ ﺷﻲ ﻳﻨﺤﻞ ﺑﺎﻟﺘﻔﺎﻫﻢ
ﺍﻧﺎ << ﺃﺳﻔﻪ ﻳﺎ ﻋﻤﻲ
ﻃﻠﻌﺖ ﻭ ﻛﻠﻬﻢ ﺳﺎﻛﺘﻴﻦ // ﻷﻧﻬﻢ ﻋﺎﺭﻓﻴﻦ ﻭﻟﺪﻫﻢ ﻛﻮﻳﺲ 😏 ﻭ ﻟﻮ ﻛﺎﻥ ﺍﻟﺤﻖ ﻣﻌﺎﻩ ﺭَﺁﻩ ﻣﺎ ﺧﻠﻮﻧﻴﺶ ﻧﻤﺸﻲ
ﺭﻛﺒﺖ ﺍﻟﺴﻴﺎﺭﻩ ﻣﻊ ﺍﻳﻬﻢ ﻭ ﻗﻠﺘﻠﻪ ﻳﺸﻴﻠﻨﻲ ﻟﺤﻮﺵ ﺧﺎﻟﺘﻲ
ﻗﻌﺪ ﺳﺎﻛﻦ ﻳﺒﻲ ﻳﻌﺮﻑ ﺷﻦ ﺻﺎﻳﺮ ﻭ ﺍﻧﺎ ﺳﺎﻛﺘﻪ ﻭ ﻉ ﺍﺳﺎﺱ ﺑﻌﺪ ﻧﻮﺻﻞ ﻏﺎﺩﻱ ﻩ ﻧﺤﻜﻲ ﻣﺮﻩ ﻭﺣﺪﻩ
ﻭﺻﻠﺖ ﻏﺎﺩﻱ ﻭ ﺍﻭﻝ ﻣﺎ ﺧﺸﻴﺖ ﺷﻔﺖ ﺧﺎﻟﺘﻲ ﻭ ﻋﺮﻓﺖ ﺍﻧﻪ ﻓﻲ ﺣﺎﺟﻪ ﺻﺎﻳﺮﻩ
ﻣﻌﺶ ﻗﺪﺭﺕ ﻧﻤﺴﻚ ﺭﻭﺣﻲ ﻭ ﻗﻌﺪﺕ ﻧﺒﻜﻲ 💔😭😭
//
//
//
ﻣﺮﺍﺩ << ﺗﺮﻳﺤﺖ ﺗﻮﺍ ؟
ﺭﻣﺰﻱ << ﻣﺮﺍﺩ ؟ !
ﻣﺮﺍﺩ << ﻻ ﻣﺮﺍﺩ ﻻ ﺳﻮ // ﺗﻲ ﺍﺻﻼ ﺧﺴﺎﺭﻩ ﻓﻴﻪ ﺑﻨﺖ ﻛﻴﻒ ﻫﺬﻩ
ﻋﺒﺪﺍﻟﻠﻪ << ﻣﺎ ﻧﺒﺶ ﻧﺴﻤﻊ ﺻﻮﺕ ﻭﺍﺣﺪ ﻓﻴﻜﻢ
ﺭﻣﺰﻱ << ﻭﺳﻊ ﺑﺎﻟﻚ ﻳﺎ ﺑﺎﺗﻲ
ﻋﺒﺪﺍﻟﻠﻪ << ﺟﺎﻳﺐ ﻋﻮﻳﻠﻪ ﺍﻧﺎ ﺗﻲ ﺣﺘﻲ ﺍﻟﻌﻴﺎﻝ ﻣﺎ ﻳﺪﻳﺮﻭ ﻑ ﺍﻟﻠﻲ ﺃﺩﻳﺮﻭ ﻓﻴﻪ
ﻣﺮﺍﺩ << ﻋﻠﻴﺶ ﺗﺠﻤﻊ ؟ ﺷﻦ ﺩﺧﻠﻨﺎ ﻧﺤﻦ ؟ !
ﻋﺒﺪﺍﻟﻠﻪ << ﺍﺩﻟﻌﺘﻮ ﻭ ﺧﺮﺑﺘﻮ // ﺑﺲ ﻣﺎﺯﻟﺖ ﺑﺼﺤﺘﻲ ﻭ ﻧﻌﺮﻑ ﻛﻴﻒ ﻧﺮﺑﻴﻜﻢ
ﺭﻣﺰﻱ << ﻣﺤﻤﺪ ﻭﻳﻦ ﻣﺎﺷﻲ ؟ ! ﻣﺤﺤﺤﻤﺪ ؟ ! ﺍﺳﻤﻊ ﺑﺲ ؟؟؟
//
//
//
ﺣﻜﻴﺖ ﻝ ﺧﺎﻟﺘﻲ ﻛﻞ ﺍﻟﻠﻲ ﺻﺎﺭ ﻣﻦ ﺑﺪﺍﻳﺔ ﻗﺼﺔ ﺭﺍﻧﻴﺎ ﻭ ﻣﻌﺎﻣﻠﺔ ﻫﺒﻪ ﺍﺧﺘﻪ ﻭ ﺍﻟﻠﻲ ﺻﺎﺭ ﺃﻣﺲ ﻭ ﺍﺧﺮ ﺣﺎﺟﺔ ﺻﺎﺭﺕ ﺍﻟﻴﻮﻡ ﻭ ﻛﺎﻥ ﺍﻟﻜﻼﻡ ﻗﺪﺍﻡ ﺍﻳﻬﻢ ﻭ ﻣﺆﻳﺪ
ﻣﺆﻳﺪ << ﺗﻲ ﻫﺬﺍ ﻟﻮ ﻳﺼﺒﻲ ﻉ ﺷﻌﺮ ﺭﺍﺳﻪ ﻣﺎ ﻳﺤﻠﻤﺶ ﺍﻧﻪ ﻳﺮﺩﻙ
ﺍﻳﻬﻢ << ﻭ ﺍﻧﺘﻲ ﻛﻴﻒ ﺗﺤﻤﻠﺘﻲ ﻫﺬﺍ ﻛﻠﻪ ؟ !
ﺍﻧﺎ << ﺭﺩ ﺑﺎﻟﻚ ﺗﺤﻜﻲ ﺣﺎﺟﻪ ﻝ ﺑﺎﺑﺎ ﺃﻓﻄﻦ ﺍﻫﺎ
ﺍﻳﻬﻢ << ﺑﺎﻫﻲ ﻫﻲ ﺻﺒﻲ ﻣﻌﺎﻳﺎ ﻟﻠﺤﻮﺵ
ﻣﺆﻳﺪ << ﺧﻠﻴﻬﺎ ﺗﻘﻌﺪ ﻫﻨﺎ
ﺍﻳﻬﻢ << ﻻﻻ ﻣﺎ ﻳﺼﻴﺮ ﺷﻲ
ﺍﻧﺎ << ﻭ ﺧﺎﻟﺪ ؟ !
ﺍﻳﻬﻢ << ﻣﺶ ﺷﻮﺭﻙ ﺍﻧﺘﻲ
ﻃﻠﻌﺖ ﻣﻊ ﺍﻳﻬﻢ ﻭ ﻣﺸﻴﻨﺎ ﻟﺤﻮﺷﻨﺎ ﻭ ﻛﻨﺖ ﺣﺎﺳﻪ ﺍﻧﻪ ﻓﻲ ﻛﺎﺭﺛﻪ ﻩ ﺗﺼﻴﺮ ﻣﺴﺘﺤﻴﻠﻪ ﻩ ﻳﻤﺸﻲ ﺍﻟﺠﻮ ﻋﺎﺩﻱ
ﻭﺻﻠﻨﺎ ﻏﺎﺩﻱ ﻭ ﻣﻦ ﺍﻭﻝ ﻣﺎ ﺧﺸﻴﻨﺎ ﺍﻳﻬﻢ ﺑﺤﺖ ﻓﻲ ﺃﻣﻪ ﻭ ﻗﺎﻝ
ﺍﻳﻬﻢ << ﻣﺎ ﺣﺪ ﻳﺠﻲ ﺷﻮﺭﻫﺎ ﺧﻴﺮ ﻣﺎ ﺗﺼﻴﺮ ﺣﺎﺟﻪ ﻣﺎ ﺗﻌﺠﺒﻜﻤﺶ ؟ !
ﻓﺎﻃﻤﻪ << ﻏﻴﺮ ﻗﻮﻝ ﺧﻴﺮ ﻭ ﻫﻲ ﺗﻘﻮﻝ ﺷﺎﺣﻨﺘﻚ
ﺍﻳﻬﻢ << ﻳﺎ ﺃﻣﻲ ﺧﻠﻲ ﺍﻟﻴﻮﻡ ﻳﻤﺸﻲ ﻉ ﺧﻴﺮ ﻭ ﻓﻜﻮﻧﺎ ﻣﻦ ﺍﻟﻤﺸﺎﻛﻞ
ﻭﺩﺍﺩ << ﺑﺸﻪ ﺷﻦ ﻓﻲ ؟ !
ﺣﻨﺎﻥ << ﺑﺸﻪ ﺷﻦ ﺻﺎﻳﺮ ؟ !
ﺍﻳﻬﻢ << ﻣﺶ ﺻﺎﻳﺮ ﺷﻲ / ﺧﺎﻟﺪ ﻭﻳﻦ ؟ !
ﺣﻨﺎﻥ << ﻓﻲ ﺍﻟﻌﻤﻞ ﻭ ﻣﺎﺳﻚ ﺍﻟﻴﻮﻡ
ﺍﻳﻬﻢ << ﻭ ﺑﺎﻩ
ﺧﺸﻴﺖ ﻟﺪﺍﺭ ﻭ ﻟﻘﻴﺖ ﺯﻳﻨﺐ ﺭﺍﻗﺪﻩ // ﻧﻮﺿﺘﻬﺎ ﻭ ﻗﻌﺪﺕ ﺍﺗﻘﺼﻘﺺ ﺣﺘﻲ ﻫﻲ
ﺣﻜﻴﺘﻠﻬﻦ ﺷﻦ ﺻﺎﻳﺮ ﻭ ﻗﻌﺪﻥ ﻳﺼﺒﺮﻥ ﻓﻴﺎ ﻭ ﺣﻨﺎﻥ ﺗﻘﻮﻟﻲ ﻓﻲ ﺍﻻﻭﻝ ﻫﻜﻲ ﻭ ﺑﻌﺪﻳﻦ ﺗﻘﻌﺪﻭ ﺗﻤﺎﻡ
ﻣﺸﻰ ﺍﻟﻮﻗﺖ ﻭ ﺍﻧﺎ ﻋﻘﻠﻲ ﻣﺶ ﻣﻌﺎﻳﺎ ﻭ ﻣﺶ ﻋﺎﺭﻓﻪ ﻟﻴﺶ ﻣﺎﺯﻟﺖ ﻧﻔﻜﺮ ﻓﻴﻪ 💔
ﺟﺮﺑﺖ ﻧﺮﻗﺪ ﺑﺲ ﻣﺎ ﺻﺎﺭ ﺷﻲ // ﺭﻛﺒﺖ ﺣﻨﺎﻥ ﺗﻐﻴﺮ ﺩﺑﺸﻬﺎ ﻭ ﻉ ﺍﺳﺎﺱ ﺗﻨﺰﻝ ﺗﺮﻗﺪ ﻣﻌﺎﻧﺎ
ﺑﺲ ﻃﻮﻟﺖ // ﺭﻛﺒﺖ ﻧﺸﻮﻑ ﻓﻴﻬﺎ ﻭ ﻟﻘﻴﺘﻬﺎ ﺗﻬﺪﺭﺯ ﻣﻊ ﺧﺎﻟﺪ 😂🌚
ﺑﺤﺘﺖ ﻓﻴﺎ ﻭ ﻣﻼﻣﺢ ﻭﺟﻬﺎ ﺗﻐﻴﺮﻥ :: ﺳﻜﺮﺕ ﻣﻦ ﺧﺎﻟﺪ ﻭ ﻗﺎﻟﺘﻠﻲ ﻣﻨﺎﺭ ﺧﺸﺖ ﻋﻠﻴﻬﺎ ﺍﻧﺘﻈﺎﺭ
ﺭﺩﺕ ﻋﺎﻭﺩﺗﻠﻬﺎ ﻭ ﻗﺎﻟﺘﻠﻬﺎ ﻋﻄﻴﻨﻲ ﺑﺸﺮﻯ
ﺣﻨﺎﻥ << ﺻﻮﺗﻬﺎ ﻏﺮﻳﺐ ﺭﺃﻩ
ﺍﻧﺎ << ﻫﺎﺗﻲ ﻛﺬﺍ // ﺍﻟﻮﻭﻭ ؟ !
ﻣﻨﺎﺭ << ﺑﺸﺸﺸﺸﺮﺭﺭﺭﺭﻯ
ﺍﻧﺎ << ﺍﻫﻠًﺎ
ﻣﻨﺎﺭ << ﻣﺤﻤﺪ ﻳﺎ ﺑﺸﺮﻯ
ﺍﻧﺎ << ؟ ! ﺷﻦ ﻓﻲ ؟ ! ﻛﻨﻪ ﻣﺤﺤﺤﺤﻤﺪ ؟ ! ؟
ﻣﻨﺎﺭ << . ..
للكاتبه حنين بالحاج
# ﻳﺘﺒﻊ ......
.
حفيدة نيوتن😎🔥
تنزيل وتصميم الغلافات: Rahafaltaher7
