مذكرات متهم

السلام عليكم
                     #البارت الاول
بداية كتاباتي سوف اذكر الاحدات التي حصلت قبل وفاة  مظلوم وبعد وفاته للعلم مظلوم متزوج وعنده 3اطفال ومواليده 1978            
وهذا الاحداث القشة التي قسمت ظهر البعير  بلنسبه اليه

في يوم عادي رجعت من شغلي بليل الساعه 12ونص ولكيت مظلوم تارك غرفته وفارشيله فراش بلهول سلمت عليه وكعدنه نسولف وسالته ليش متنام بغرفتك يم مرتك واطفالك وجان جوابه كلي اني ادخن واخاف على الاطفال من الدخان والصغير مطالع الاربعين جوابه مومقنع لان يدخن برا ويرجع بغرفته شنو الي اختلف هسه كملنه السوالف ودخلت لغرفتي نمت وعرفت فيما بعد انه صاير كلام وزعل بينه وبين زوجته وماعرفنا شنو نوع الزعل والمشكله الي بينهم تخليه يتركهم وينام جوه وكان بمرور الايام يزيد همه وتتعب نفسيته وسالته على الي بداخله بس محجالي الصدك رغم علاقته جانت جدا قويه اني وياه مقربين من بعض كلش المهم بعد مرور شهر او اقل  على حالته النفسيه والنوم جوه بوحده وبشهر ال 2016/2رجعت من شغلي كل معتاد بليل لكيته كاعد وسلمت عليه وكعدنه نسولف وكتله اني جوعان تاكل وياي كال اي جهزولنا  العشاء وتعشينه واتذكر كلي هذا اطيب اكل اكله والله رغم عشانه جان بسيط تركته الساعه ب2ودخلت نمت الساعه 3الفجر امي دكت الباب عليه وكالت اخوك يريدك ماعرف شبيه رحلته شفته مختنك وكلي وديني للمستشفى ضحكت وكتله شبيك يمعود كلشي مبيك كول يا الله شنو شبيك كلي احس شي خانكني ونايم على كلبي وكلي لحد هسه اتذكر كلامه #انته كايم ماتحبني لو تحبني جان اخذتني للمستشفى كتله والله احبك واخذك
رحت كعدت اخويه #خلف لانه عنده سياره واخذناه للمستشفى وصلنه ونزلنه نتمشى عادي دخلنه للطوارىء وعلكوله مغذي واوكسجين اباوع عليه نام وبراحه عبالك صارله سنه منايم
بس حالته ساءت حيل بقينه للصبح حولوه من الطوارئ للعام وحالته بتنازل ومانعرف شنو وهوه بس ينام ومن يكعد واساله شبيك يكول خليني اريد ابقى نايم وارتاح بس يذب حسرات ومهموم صارت الساعه ب2الظر طلعته على مسؤليتي للبيت من رجعته للبيت وشاف اطفاله تحسنت حالته بس العجيب اتذكر زوجته ممهتمه ولاكان زوجهه مريض وهوه هماتين مارادهه يمه وبقينه اني وامي وخلف وزوجتي الي يمه ونشوف مطالبه
صارت ب5العصر وديناه لدكتور يمنه والدكتور كال باجر خلي يروح للمستشفى الكندي اسويله مجموعه تحاليل واجيكه هناك يكون افضل كتبله علاج ورجعنه للبيت وثاني يوم اخذته للمستشفى وخلف ويانه سويناله تحاليل وفتحنه طبله ودخلنه ردهه بقيت وياه للساعه 2الظهروهوه ساكت ميحجي شي ابد ومن يحجي يوصيني باطفاله بس اجه اخويه #نظيرالظهروكالولي روح للبيت ارتاح كم ساعه وتعال رجعت الهم الساعه 6العصر وسالت #نظير على حالت مظلوم وكلي كلش زين وجان كاعد يسولف ويضحك وقبل لتجي انته نام المهم راح نظير للبيت ودخلت اشوفه لكيته نايم وبقيت كاعد يمه وشويه وكعد بس مو مثل ماكال نظير لكيته تعبان ويفقد ومرتاح وبس ينام ومن يصحى يطلب يشوف اطفاله وعرفت هايه علامات الموت وكتله خويه شبيك سلمت روحك للموت
#اتذكر كلي اني اريد اموت واخلص عوفني كافي تعبت المهم الساعه ب 7تقريبن اتصلت باهلي واقاربي واجوني من ضمنهم اختي #هند واخويه #خلف جان هوه سمع صوت هند وكلي هايه خليه تطلع ومااريدهه هنا كتله خطيه جايه على مودك كلي انته متعرفه هايه حيه تذب سم واطردهه منا
وره ربع ساعه فقد تركيزه والله شاهد معرف اي واحد من الي جانو موجودين لا اخواني ولا اختي ولا اقاربي واتذكر فز من نومه وكال كافي سدو الدفتر خلي نروح بس كلامه مو جان النه احنه الموجودين الله اعلم جان يحاجي منو
جان حاجيته ونتبهلي وكلي شوف اني راح اموت اطفالي ذمه بركبتك وكلي ذمه لا يرحون الاطفال الاجدادهم ويربوهم خوالهم خاف زوجتي تترك البيت بعد موتي
وكال خلف لتثق بيه لانه انسان يحب نفسه وخداع وماكر
وهند ساس بلاء والكلبه انظف منها وكلي انته بعدك تريد تعرف شبيه من قهر وصلني للموت كتله اي كلي تلكي بغرفتي بلكنتور بلخانه الفوك دفتر كاتب بي كلشي من راح تقرا تعرف سبب موتي ومنو الي حطمني وخليني اسلم نفسي هيج
كلي عوفني انام اريد ارتاح عفته نام وره اقل ال5دقايق توفه الله يرحمه

#يتبع مذكرات متهم
2022/4/29