مذكرات متهم

البارت السابع

@مذكرات متهم
اخواني اخواتي عيدكم سعيد وكل عام وانتم بالف الف خير ويارب السعاده والفرح الدائمه يارب
البارت السابع
اتصل بينه نظير وبلغني بالي صار وكتله جيب الاطفال همه اطفالنه واحنه الي نربيهم وهذا واجبنه احنه لانه هم اولادنه كال ماشي فد ساعه واروح اجيبهم اني مرحت وياه لانه انتم تعرفون انتهت علاقي بااختي هند وصارلي كم سنه لداخل بيتهه ولا متصل عليهه المهم اتصل اخويه بعد كم يوم وكلي الاطفال يمي كتله ماشي راح اجي اشوفهم مشتاقلهم رحت لبيت اخويه دخلت وسلم وبعد فراق الصار بيني وبن الاطفال لسنوات مشايفهم لكيتهم غير حال اجسامهم ظعيقه شكلهم مال غجر شعرهم هياتهم يعني اختلاف جذري واباوع بعيونهم خوف مظلم وقاسي يعني ماعرفت سبب الخوف شنوه
اخويه كلي بعد الاطفال ويمنه وراح نخلص من المشاكل
كتله اني صدكني منخلص لانه المقابيلنه مو اوادم فتره وهماتين ترجع المشاكل لانه ذولي ناس ماتخاف الله وعدم طمع يمنه مقبل على كلامي وكلي ليش تفكيرك سلبي هيه امهم شمرت الاطفال ومتريدهم بعد المشاكل على شنو ؟كتله راح تذكر كلامي وتشوف منو فاهمهم اكثر اني لو انته المهم
كتله راح اخذ الاطفال يمي كال لا الاطفال يبقون يمي هل مره اني اربيهم
بس البنت الصغير تبجي وخايفه اخذهه يمك كم يوم واني اجي اخذهه كتله ماشي
اخذت البنت والولد بقو يم اخويه رجعت للبيت البنت خايفه دخلت اتلكتنه زوجتي واخذت لبنينه واطفالي تجمعو يمهه واني طلعت من البيت رحت بشغله رجعت وره نص ساعه لكيت البنت تظحك وتلعب وممهتمه ابد وفراحنه ولا جن جانت تبجي ورافظه الجيه عدنه كلت لزوجتي شنو سويتيلهه كالت نسيت اني ام واني هماتين ربيتهه قبل واعرف شلون اسايسهه واخليهه متبجي وتطمن بعيشتهه عدنه
كامت زوجتي اتابع البنت وحتى باول الايام تنيمهه يمهه بحظنهه حتى تعوظهه الحنان الي فقدته وحتى البنت تتعلق بيهه وتنسى هيه عد منو جانت وتبدي حياه جديده ويانه وبلغت اخويه وكتله البنت تعلمت علينه ومتقبل تجيكم خليهه عندي تتربه وتعيش
اني هم بقيت كل يومين والثالث اروح اشوف الاطفال واسال عليهم وعن وظعهم ابيت اخويه وارجع يعني معفتهم متابعهم وره شهر او شهر ونص من جيت الاطفال ابيت اخويه اتصلت اختي صبريه عليه وكلتلي  روح لبيت اخويه نظير مااعرف شصاير روح شوف شكو
والله رحت لبيت نظير ودخلت جوه بلبيت لكيت الوجوه مكلوبه والبيت كله توتر والجو عدهم مو طبيعي
المهم كتله شلونكم اخباركم صاير شي جديد اكو شي اشو مو على بعضكم كالي واتذكر كلامه شوف انته تريد الاطفال اخذهم واذا متريدهم والله اشمرهم بلشارع كتله صاير شي فهمني كلي لا افهمك ولا شي تريدهم اخذهم متريدهم اشمرهم
كتله زين اني اخذهم بس انته مخابرت خلف وشفته يريدهم لو لا كلي خابرته وكال مااريدهم
كتله اشو الحنيه صايره عدكم معدومه والدم عدكم مي وماعدكم غيره على اطفال اخوكم المرحوم شبيكم شغيركم كلي لدوخني الغيره والحنيه خليهه الك والله اذا متاخذهم اصعدهم بسياره واشمرهم بلشارع
كتله لا اني اخذهم وكل هذ الكلام الصار بينه والاطفال كاعدين يمنه يسمعون الحجي الي صار كله
كتلهم يله بابا جيبو اهدومكم وتعالو يمي بلبيت كلي اخويه ذني ملابسهم بعلاكه اخذهن الي صدمني الشي الاول محظر حتى ملابسهم وياهم يعني جان ماخذ قرار قطعي مابي رجعه والشي الثاني كتله شنو ملابسهم بس هايه لعد الفلوس الجنه ندزهه كل شهر الهم ميشترولهم بيهه ملابس كلي مااعرف هيج جبتهم
اخذت الاطفال ورحت لبيتي والقهر مزروع بكلبي زرع على الحال الي وصناله من عدم الحنيه والحب الي جان بينه الي جانت الناس تظرب بيه المثل اقصد حياتنه وطفولتنه الي عشناهه قبل 2015وقبل هايه الاحداث
وصلت لبيتي ودخلو الاطفال ورتبنالهم غرفه لمنامهم بس جان جواهم خوف وعدم اطمئنان كلش قوي تجاهنهه وتعجبت على هل شي والي لفت انتباهي ان بمرور الايام نتبهه على اخلاق الاطفال وتربيتهم كلش زفت وزباله وتربيت شوارع وجنهم غجر بكلشي يختلفون علينه بكلامهم بطباعهم بتصرفاتهم يعني حسيت ذولي مواطفال اخويه الي اعرفهم
بمرور الايام انتبهت زوجتي على الطفل الجبير وكالت اكلك هذا ياكل طبيعي بس وجهه اصفر وظعيف حيل مريض هذا
صحت اني للطفل وسالته كلي بابا اني مبيه شي ولا مريض بس عرفت الطفل يجذب وخايف
#ملاحظه اني بلغت اطفال اخويه يسموني بابا ولزوجتي ماما حتى ميشعرون اكو تفرقه بينهم وبين اطفالي وشي ثاني هذا الطفل من يصيحلنه بابا وماما من طفولته لحد مايكبر يشعر بل امان ويعرف صدك عنده اب وام وسند عنده بلحياه ينتجي عليه بوكت الشده
نرجع نكمل زوجتي كالت عوفه اني بطريقتي اخليه يحجي شنو عنده وعرفنه ان الطفل الزغير يبول على نفسه وميسيطر على ادراره وحتى على بطنه يعني مرات يسويهه بملابسه
اجتي زوجتي وكلتلي الطفل مريض حيل والطفل يطلع بلخروج مالته دم هوايه وصارله هوايه وممراجعين بيه امه او اجداده هامليه والطفل يخاف يحجي لانه امه وخواله كايليله متحجي ولا تكول شي لعمامك واذا حجيت نكتلك وين منلكاك وهوه خايف حيل
صحت الطفل وكعته يمي وعرفت بسلوبي شلون اخليه يحجيلي وسولفي على مرظه
واخذته لدكتور اراجع بيه واشوف شنو مرضه واجيبله علاجات واعالجه اني بوكتهه عندي محل اسواق بنفس بيتي خليت الولد المريظ مرات يكعد وياي ومرات هوه يبيع لانه الدكتور كال هذا نفسيته متحطمه خلي يلتهي بشي ثاني وينسه ايامه الي مظت كام الطفل يكعد بالمحل وحده ايام الي اني اكون خارج البيت وبعد ايام عرفنه احنه جاي نخسر بلبيع وفلوسنه مجاي تطلع وبلصدفه اكتشفنه ان الطفل هوه الي يبوك فلوس من المحل ويرح يظمهن يمنه اكو مولده ويمهه سكراب حديد ويظم بيهن ؤمن رحنه للمكان لكيناهن ماكو هماتين جاي واحد غيره وبايكهن والله نقهرت حيل اول شي لانه كتلكم اخلاقه زفت والشي الثاني احنه ممخلينهم بحاجت شي كل شي موفرينهن الهم من اكل ومصرف  والعاب وملابس والله جبنالهم كله جديد وماركات ردنه نعوظهم ونهتم بيهم ونربيهم تربيه صالحه
المهم شهر كامل من العلاج والادويه ومفاد اي علاج وكالولي اخذ الطفل لمدينه الطب هناكه اطباء اختصاص بهيج امور ويعرفون شنومرضه وينطون علاجه الصحيح
رحنه الصبح اني والطفل لمدينه الطب ودخلت للجنه المختصه بهيج امراض وكالولي هذا الطفل تسويله طبله ولازم نسويله ناذور حتى نعرف الطفل شنو عنده بس لازم تعرف الطفل زغير والمرض ماخذ حيله وهوه ضعيف خطوره الناضور 75%على حياته ولازم توقع على مسوليتك خاف الطفل يموت
بصراحه نصدمت من كلامهم وكتلهم دقيقه انطوني اخذ قرار
فكرت كلت اعوف الطفل بدون علاج يموت
واسويله ناضور احتمال يموت واحتمال لا خلي نتوكل على الله واوافق
دخلت عليهم ووقعت وانطوني موعد وره سبوع اجيهم نسوي ناذور
رجعت للبيت وبلغت اهلي وعمي الجبير بلي صار وبقينه ننتظر الموعد على نار وقهر وخوف
بهل ايام اجتي امي يمي بلبيت وكتلهه اليوم تذكرتي عندج ولد تزورينه
كالت يمه سمعت اطفال المرحوم يمك واجيت ازورهم واشوفهم
كتلهه على مرضهم وعلى الي صار وعلى موعد الناضور وعلى كلشي
صدكت بيهه هيه جاي تطمن ماعرفت من وراهه راح تصير بلاوي ومشاكل ومحاكم واتهامات والقاء قبض عليه وجريمه
المهم اجه موعد الناضور واخذنه الطفل اني وزوجتي واخواني راحو وياي خلف ونظير والي عرفت من جيتهم وياي يردون يعرفون الطفل صدك مريض لوهايه جذبه اني مالفهه
دخلنه للمستشفى والأوضاع قلق وخوف وانتظار مزعج
واجه سره الطفل والطفل متعلق بزوجتي يكولهه ماما لتخلينهم يدخلوني اخاف اموت
والطفل صاح عليه واتذكر احجايته كبل ليدخل كالي #بابا اني احبك ومااحب عمامي لانه همه ميحبونه وطردونه من بيتهم ورادو يشمرونه بلشارع
دنكت عليه وبسته وكتله اني وماما نحبك وانته ابنه ولتخاف اريدك تصير سبع حتى اطيب من مرظك وتكبر وتصير رجال وبصراحه جنت لازم دموعي كوه كدامه
اخذو الطفل ودخلوه جوه وانطوه ابره مخدره حتى يسوله ناذور واحنه بين الندعي وبين النبجي وبين الخوف الي ماكل كلوبنه والانتظار يحطم
وره اكثر الربع ساعه صاحو بسم الطفل وكالو تعالو والله اتذكر رجليه كامت متتحرك بثكل الجبل ورحنه واستلمنه الطفل والحمد لله مكملينه وجاي يفيق من البنج لانه بنج عام
ونطوني عينات من جسمه كالولي توديهن للمختبر زرع وشهر تجي على النتيجه
انتضرنه يم الطفل وهوه يفيق واول سوال اله رادني وراد يشوف زوجتي
واتذكر كلامه من كتله هاحبيبي كملنه وراح نرجع للبيت وكلي هوه بابا يعني اني مامتت بعدني عدل
اتذكر ردنه نطلع للبيت وسيارات ماكو تدخل جوه وسديات ماكو ووظعيت المستشفى تعبانه شلت الطفل على جتافي من المستشفى لحد الشارع العام يم الجسر وانتظره خلف يجيب سيارته لانه بوكتهه الازدحامات جانت فول وقافله الشوارع صعدنه السياره وساعتين ياله وصلنه للبيت وكاتلنه التعب والخوف والحزن والقهر وصلنه للبيت وجانت اختي صبريه تنتضرنه بلبيت لانه بقت يم اطفالي ودخلنه للبيت ونيمنه الطفل واخواني بلبيت يمي وصبريه اختي واطفالي كالو بابا اجوي الشرطه لبيتنه يسالون عليك وكنالهم بابا بلمستشفى راح يسوي عمليه لاخونه والشرطه كالو من يجي خلي يجينه للمركز ضروري يجي محتاجينه
وهماتين اجو جواريني وبلغوني بلشرطه جايه عليه ويردوني وكتلهم خلي ارتاح شويه واني اروحلهم للمركز اشوف شيردون

يتبع ببارت ثامن من مذكرات متهم
2022/5/3