مذكرات متهم

اسف ع التاخير والله جنت بالنجف وراح اعوضكم البارت الرابع

السلام عليكم بماانو اليوم عطله وماعندي مراجعه لا للمحكمه ولالمركز الشرطه خلي نكتب بعض المذكرات من الي حدثت
                    
البارت الرابع
ادخل ابن عمي واختي هند بلمشكله الي صارت بيني وبين اخوهه وبين مرت اخويه المتوفي
وكدرو يهدون النفوس وكلولهه بان اخوج فتره ويرجع يزورج بلبيت بهل اثناء سمعت كلام انو امهه كايلتلهه هذا بيتج انتي ومحد اله سلطه عليج وراح ازوج احد اخوانج واجيبه يكعد وياج
يعني الي جان ابالي من شكوك وعرفت ان همه عندهم اطماع وتذكرون من كتلكم جانت تجي امهه وتبات يمنه قبل ويسولفن بصوت ناصي واشوف بعيونهن شر وخبث وحيله ظنوني كلهه بينت صحيح وبينت حقيقتهم ان البنت مترجع لهلهه بدون متاخذ شي من ورث او بيت
المهم اني مقبلت على كلام امهه وكتلهم هل شي ميصير ابد لانه البيت بنيته للاطفال ولمستقبلهم مو لاحد ثاني
رجعت الامور طبيعيه لمده اربعه ايام فقط كانت الهدوء وبعده العاصفه
اتصلت بيه اختي هند وكالت انته وين بلبيت كتلهه نعم كالت جايتكم لانه زوجت المرحوم متعاركه هيه وامي كتلهه شلون متخلص المشاكل ابد المهم تعالي اهلا بيج
اجتي هند لبيتي وامي جانت يمي كتلهه يمه شكو شصاير كالت والله يمه مرت اخوك تعاركت وياي وتكول انتم مجايبيلي حليب للطفل وسوتهه هوسه عليه
دزيت على زوجه اخويه واجتي كتلهه شكو شصاير كالت امك متنحمل ومجيب حليب للطفل كتلهه ليش مكتيلي اني اجيب الج حليب
كالت وبصوت عالي تريد الصراحه اني امك (مااريدهه تعيش وياي بلبيت )هايه الجمله ركزو عليهه لانه بل ايام الجايه حتعرفون ليش طلبت هيج طلب
وانته مااريد تدخل بينه عوفوني اني ادبر اموري واعيش بكيفي بلي يعجبني الصراحه تعجبت من صلافتهه والسانهه الطويل وتيقنت انو البنت جواهه شر ومكر وهذا وجهه الحقيقي
بدينه نهدا بلكلام وكتلهه هايه مثل امج وهيه ام زوجج يعني من ريحت المرحوم وهيه باقيه وياج بلبيت تخدم الاطفال لانه انتي متكدرين وحدج تربينهم وشي ثاني انتي زغيره ميجوز تسكنين بلبيت وحدج الوكت مو امان
المهم نحلت المشكله وخليت امي تبوسهه رغم هيه الي كانت على خطا بس نكول خلي الحياه تمشي بدون مشاكل
وهنا اختي كالت اني اريد اخذ الاطفال وامهم لبيتي لانه اريد اسوي ثواب لابوهم وهماتين يغيرون جو كم يوم وانته تعال اخذهم ،كتلهه ماشي شكو بيهه
راحت اختي وزوجت اخوي والاطفال وكان الاتفاق كم يوم واروح اجيبهه
مرت اربع ايام واتصلت ب اختي وكتلهه راح اجيكم اخذ الاطفال وزوجت اخويه كالت ماشي تعال
رحت لاختي وسلمت ودخلت واشوف الوجوه مكلوبه وبيهه شر وخبث المهم سولفنه سوالف عاديه وكلت لمرت اخوي يله عيني خلي نرجع للبيت اجمعي ملابسج
كالت اني ماارجع وياك اله تلبيلي شروطي واذا متوافق عليهن باجر ارجع لاهلي
كتلهه شنو شروطج كالت (امك متسكن وياي بلبيت )وانته متدخل بحياتي ابد فهمت وبصوت عالي ونفرزه
كتلهه هذا الموضوع حجينه بيه وانتهه ومايصير كالت. لعد ماارجع وشتسوي سوي كتلهه لعد انطيني الاطفال وروحي لهلج وعساج بجهنم
هنا ادخل زوج اختي واختي وصار صياح وهوسه وعفت بيت اختي وطلعت
وره ربع ساعه اتصل عمي بيه وكال شنو هل مشاكل انته شبيك رايح لبيت اختك وساحب مسدس ورمانه وكتلهم افجركم
كتله اقسم با الله هذا الكلام مصاير وانته منو كلك كال اتصلت بيه اختك وزوجهه وهمه كلولي المهم كلي بعد اختك متروح لبيتهه وتكطع علاقتك بيهه
عرفت وتيقنك اكو تخطيط راح يصير بل ايام الجايه من قبل اختي وزوجه اخويه بس شنو هوه الايام راح تبين المظموم
زوج اختي هند اسمه رجال وبس لا يحل ولا يربط مثل لمعي بمسلسل التركي فاطمه
وشايل خبث وحقد مشايله بشر وسمه اقوه من سم الحيه
كتلكم رجعت لبيتي وزوجه اخويه مارجعت ثاني يوم لو ثالث اتصل بيه ابوهه وذاك الكلام الي ميعجب وكال بنتي بعد مترجع يمكم وانريد كل حقوقهه وحظر عمامك وتعال يم جبير عشيرتنه
اتصلت بعمامي وبلغتهم الي صار وحددنه يوم ورحنه نشوف شيردون
كعدنه والله بلخير شنو شتردون وشنو قصورنه ويه بتكم
كال ابوهه
بنتي انته مقيدهه ومتخليهه تطلع براحتهه ومتخلي احد يزورهه وماتروح تاخذ الاطفال للدكتور تشتريلهم وانته ساجنهه بلبيت عوف بنتي براحتهه يعني توفه زوجهه تحكمهه انته
هنا رديت عليه وكتله بنتك والي هيه مرت اخوي المتوفي هيه باامانتي واني لازم احافظ عليهه
من ناحيت الخطار اي احد منكم مابي اذيه ومشاكل خلي يجي هله بيه وبلنسبه للمسواك لواني لو امي نتسوك لانه احنه تقاليده المره متروح وحدهه للسوك شلون وبنتك ارمله وازغيره وللدكتور احنه ناخذ اطفالنه نعالجهم
وشي ثاني بنتك من جان زوجهه عايش هيه ماتطلع من البيت ابد شعجب من توفه تريد تطلع لسوك ومستشفى واعراس وفواتح وشي ثاني بنتك مصارلهه هواي من اخويه زوجهه توفه ومصار شهر ونص من كملت البيت ورجعت كعده يمي شنو جنتو مخططين لهل شي من قبل
كال المهم البنت ماترجع والاطفال ناخذهم وهوه يعرف اني اريد الاطفال لانه هايه وصيت ابوهم اني اربيهم وكلي عندي خيارات الك
لو ترجع للبيت وامك متسكن وياهه وانته متدخل بحياتهه ابد
لو تبيع البيت واشتريلهه بيت يمي وتسكن يمي يعني يم بيت ابوهه
لو تنطيني 100مليون هايه تعويض لبنتي وانته اخذ الاطفال الك
كتله عيني شروطك تعجيزيه وال 100مليون شنو انطيكياهن خاوه لو شنو
كال لا تعوضون بنتي زغيره وتوفه زوجهه كتله شنو تريد فصل قابل احنه كاتلين اخويه يكول لا هيج تعويض على عمرهه الراح
المهم متفقنه وكل واحد رجع لبيته وهيه راحت لبيت اهلهه والاطفال وياهه
واني ظليت احاول واتصل بخواني واخواتي وعمامي ولا احد يسمعني وكل الابواب نسدت بوجهي وخلوني باب ملامه واتهام على شي اني ممسويه وصحتي كلش ادهوره وبلنازل واهوايه اطباء راجعت اسماء معروفه ومعرفو مرضي  شنو وحتى بعض الاطباء كالولي علاج مو يمنه يم الساده .؟؟؟
ورزقي قل وجنت المحل الي مالتي ورزقي منه بعته ورجعت اشتغل عامل عد الي شتراه من عندي يعني الدنيه دارت وجهه عني وسده بابهه بوجهي
اخواني خلف لجان يكول اني اربي الاطفال واتعب عليهم سحب نفسه وختفه
نظير بعد ماطلع من غيبته الي جان غايبهه يكلي صوجك انطيهم البيت خلي يبيعونه وتروح لهلهه ونرتاح لانه هايه البنت وراهه مشاكل متخلص
نعيم اخويه ضم راسه ولا اجه ولا سال شكو شصاير
ابن عمي الي ذكرته الكم بلبارت السابق كلي خليهه ترجع وانته ماالك علاقه بيهه منو يدخل ومنو يطلع انته غلس واسكت
اختي هند صارت ويه مرت اخويه بكلشي وصارت ضدي وكامت ادرسهه شتسوي وشلون تتصرف
الي فتهمته وتيقنت من عنده ان جانت بقاء مرت اخويه عدنه مو على مود الاطفال لا على طمع وفلوس وعلى ورث تريد والاهم على فعله او سبب. اده لموت اخويه وتريده مينكشف

بلنسبه لاخواني واختي وابن عمي الي شفته الكل سحب نفسه لانه الكل عدهم اسرار وخفايه والكل يعرفون انو اخويه توفه مو موت طبيعي توفه بسبب وكل انسان بيهم عنده قصور والبعض عنده مصلحه يم مرت المرحوم او خلل تجاه المرحوم وخايفين تنكشف اسرارهم ومن ضمنهم #امي
#يتبع بارت خامس والاسرار والخفايه بدت تنكشف وصرت اني متهم بنظر الدوله للمره الثانيه

#مذكرات متهم
2022/5/1
تعديل ابو زوجه اخويه المتوفي انسان مجرد من كل القيم والمبادئ والاخلاق وانسان كذاب وطماع واتذكر اخويه قبل ليتوفه جان مداينه 5مليون ومن توفه نكرهن علينه وبلعرك والهوسه وصارت كعده عشاير ياله رجعهن النه ومرجعهن كلهن وحلف بقران جذب وره شهر تكطمت اصابع ايده بسبب القسم الكاذب