مذكرات متهم

البارت 13

السلام عليكم بارت 13من مذكرات متهم
اعتذر على التاخير
ذكرتلكم ب سابق رحت لبيت اخويه نضير وكعدنه وبعد الكلام العادي والسلام كتله اخويه انته تعرف صارلنه سنتين محاكم ومراكز وصرفت هوايه مبالغ وانتم لحد هسه منطيتوني شي ابد والحمد لله اخذنه حكم البراءه من التهمه واحنه جنه متفقين المصاريف تتقسم علينه احنه ال 3بلتساوي واني الي اتحمل المراجعات كلهه وانتم بس كاعدين ببيوتكم
باوع عليه بنضرات غريبه يعني نضرات استحقار او مااعرف الهه وصف اكبر واقبح وكال قضيت اتهامنه وطلعنه براءه من عدها وهيا اصلا متستاهل محامي وصرف
واذا على قضيت الاطفال فاانته مشرتنه وكلت راح اسوي عليهم دعوه على امهم وخوالهم
ولو باقيه علينه احنه منسوي دعوه ونطي الاطفال لامهم ونخلص من المشاكل
صدك صدمني بكلامه
كتله اول شي اني بلغتكم وكتلكم راح اسوي دعوه عليهم وانته عندك علم بهل شي
والشي الثاني الاطفال شلون تنطيهم لمهم بعد كل هذا الي سمعته والي مسوينه بيهم خوالهم شنو متخافون عليهم لو همه مو اطفال اخوك المتوفي بس اطفال اخويه
وكتله انته تقبل على ابنك هيج يصير بيه من ضلم وفساد
بهل اثناء اجه صديقه خطار واني سكتت محجيت واصلا طلعت من البيت اعصاب
الي فتهمته من كلامه همه اخواني جان همهم القضيه يطلعون منهه براىه وبس ومهامهم مصير الاطفال وعدهم الفلوس اهم شي بلدنيه والي تفكيره هيج اني اعتبره خسران دنيا واخره ومعنده غيره
رجعت من بيت اخويه واتصل بيه عمي وكال اريدك تجي للبيت جاين عمام ذولي السفله تعال احضر خلي نشوف شنو رايدين رحت وكعدت واجو همه وكل معتاد كلامهم الي ميدخل الكلب والعقل يكول ابوهم حلف بلقران ان ولده ممسوين هيج امور وهذا ادعاء من عندك
اني رديت عليه وكتله هوه ابوهم خلص عمره يحلف جذب ب القران والناس كلهه تعرف هل شي ومدام هايه الدعوه مالتي كاذبه بعد شعندك جاي
خليني اني ووياهم والمحكمه والله يعين وينصر الحق ومن باجر بل 7الصبح اطلع عليهم دوريات واني بنفسي اطلع ويه الدوريات واطلعهم من جوه الكاع واذبهم بلسجن وخلي هناكه يكولون احنه ابرياء
وكتله لعلمك ابوهم وامهم واختهم هماتين راح تنسجن لانه انطو شهاده زور اكثر من 5مرات وجانو متسترين على جريمه والرجال وبنته وزوجته اقل حكم عليهم 15سنه وحكم ولده اذا مو اعدام موأبد
وكتله صدكني مراح تنسد القضيه لانه اكو امور وسوالف خايسه هوايه اني اعرفهه وراح تحجيهه بتكم واخوانهه بلتحقيق وذاك الوكت زين اذا كدرت تخلي وجهك بوجهي من المستحه والعيب المهم طلعت الي بكلبي كله
وكتله انطيتونه الاطفال وهمه بيهم امراض غريبه عجيبه وصحتهم تعبانه وللعلم جنه ننطيكم مصرف شهري حتى الاطفال ميعيشون بحرمان وجوع والاتضح جنتو متصرفون الافلوس على الاطفال وجنتو ماذينهم وممربينهم على تربيه صالحه
الشي الثاني سويتو علينه دعوه كذب واتهمتونه باطل وزور وسويتونه سوابق ومجرمين واحنه ماخذين الاطفال غصب وهل شي ميجوز وعيب وحرام اذا جنتو انتو تعرفون الحرام
الشي الثالث من راجعنه ب اطفال اكتشفنه همه مغتصبين من خوالهم وهل شي لا الشيطان يسويه ولا حتى ابليس انتم من يامله فهموني
كال هوه احنه نريد نستر المشكله ومنخليهه تكبر وشتردون اني حاضر
اني كتله خلي ولدكم يسلمون نفسم بلمركز وبعدين تعال نتفاهم
رجع جاوبني اني راح اسلم الولد وراح اثبت براىتهم
كتله اعرف راح تدفعون فلوس وراح تشترون ذمم بس والله اني مااسكت وانتم تحلمون بهل شي لانه القضيه ثابته عليهم
وهماتين موصلنه النتيجه وهمه طلعو وراحو واني هماتين رجعت لبيتي
المشكله اكتشفت مرات ناس تبيع ضميرهه وذمتهه بلفلوس وهمه اقرب الناس الك
وقررت مااثق باي انسان ابد لانه الدنيا شفت بيهه اشكال والوان وعلمتني هوايه
وكل معتاد رحت للمركز اشوف شنو سوو ب القاء القبض وهماتين لكيت وجهم وتعاملهم مختلف عن قبل بهوايه
وهماتين كتلهم لو مااعرف شنو يصير قضيتي مااعوفهه ولا اتنازل من عدهه ابد
والي عرفته همه منهزمين من بيتهم بس اني عندي مصادري وكدرت اعرف همه لاي محافظه راح يرحون
خلي احجيلكم على الاطفال اول مااجو عندي بلبيت تربيتهم تربيت شارع واكثر وانصدمنه بهل شي باكلهم بكلامهم تصرفاتهم طبعهم بصراحه جانت صدمه النه كلش جبيره اني وزوجتي وحتى اطفالي واتفقت اني وزوجتي ان نعيد تربيتهم ونصلح حالهم واخلاقهم لانه ذولي من اليوم اطفالنه وماعدهم انسان غيرنه الي يتحملهم ويتكفل بيهم واذكر لزوجتي#كتلهه خلي نربي ومندلل نستخدم وياهم مبدا الثواب والعقاب وصدكوني تابعناهم ب اليوم 24ساعه حتى من ينامون متابعينهم كرسنه يومنه وحياتنه الهم وهل شي كان جدا صعب لانه جاي نمحي اطباع وتصرفات خطا ونعلم مكانهه اشياء صح وبمرور الوقت والاصرار والمتابعه والفضل لله كدرنه نغير التربيه مالتهم 180درجه للافضل وللاحسن والطفل الكبير سنتين ياخذ الاول على الصف مالته والبنت هماتين والطفل الثالث هماتين
اكثر الاصدقاء والاقارب واخواني الي يجون يكولون اخلاقهم وتربيتهم تغيرت هوايه عن قبل
والحمد لله الطفل الكبير بعد مرور مايقارب ال سنتين من العلاج والمراجعه المستمره كدرنه نوصل المرحله من علاجه جيده رغم بعده مستمر على العلاج بس حالته افضل بهوايه عن السابق
اتذكر اول مااجه يمنه كان الدم مالته نازل للادنه درجه 6هسه الحمد لله افضل نسبت الدم صاعده وحالته الصحيه افضل
اما الطفل الثاني حاله افضل بهوايه من اخوه الاول بس بقى عنده خفه ادرار وميسيطر على نفسه وهذا كله بسبب الفعل مالتهم
اليوم كانت عدنه مراجعه يم الدكتور ومن كملنه رحنه زرنه مرقد الامام موسى الكاظم ووالله منسيتكم ب الدعاء لانه انتم اخواني وخواتي وعاىلتي الي سمعتني كلمه طيبه صبرتني على مشاكلي وانطتني عزيمه وقوه واصرار وكدرت اكمل بفضلكم وبفضل دعاىكم اليه
ربي يوفقكم
انتضرون ببارت 14
من مذكرات متهم 2022/5/13
تعديل اعرف هذا البارت صغير والصراحه نزلته على مودكم
لانه المذكرات الي عندي اعرف هوايه بس صعب تنكتب بلوقت الحالي وهوايه من الاصدقاء والصديقات الي ويانه بلبيج والفيس كالولي هيج مذكرات ب الوقت الحالي لتنزلهه ابد والصراحه كان التصويت الاكثر لعدم التنزيل هسه وطلبو من عندي التاىني بلوقت الحاظر
ها بس بل ايام القادمه اذكرهه بس منتضر حدث يصير لو لا واذكرهه