مذكرات متهم

البارت الثامن

البارت الثامن من @مذكرات متهم
بعد ماعرفت انو الشرطه جايه عليه دخلت للبيت ارتاح من تعب المستشفى وهماتين الاطمئنان على الطفل
رحت للمركز اشوف على شنو جاين الشرطه عليه  وشنو يردون دخلت للمركز وسالت الضابط وجانت الصدمه كالي اكو بنت مسويه دعوه بلمحكمه عليك انته واخوانك نظير وخلف بانو انتو خاطفين اطفاله غصب عنهه كتله منو هايه وشنو اسمهه
عرفت هيه نفسه مرت اخويه المرحوم وانطاني ورقت التبليغ للحظور للمحكمه أمام القاضي وكلي وقع بل استلام وباجر لازم تحظرون إمام القاضي ظروري انتم ال 3المتهمين هذا الكلام شهر 2020/11#هنا صرت بنظره الدوله متهم
رحت بلغت اخواني نظير كال ماشي اروح وياك وخلف كال باجر التحق لدواعي مااكدر اجي لانه هوه عسكري
سالت أخويه نظير كتله مو هيه شمرت الاطفال ومتريدهم صحيح هذا الكلام قسملي كال صحيح كتله لعد ليش تسوي دعوه علينه بان احنه ماخذينهم غصب وشي ثاني اذا صدك تريد الاطفال ليش ذبتهم وليش مطلبتهم عن طريق عمامهه او دزو ناس علينه يتفاوضون على الاطفال
وكتله تذكر من كتلك منخلص من مشاكلهه هيه واهلهه صدكتني هسه
رحنه ثاني يوم للمحكمه ودخلنه للمحقق القضائي وجان انسان جدا مو محترم وحقير وكلب وشبعنه ذله ومن يصيح علينه كله المتهم تعال المتهم روح ونص الافاده الي انطيتهه اني مسجلهه بلمحظر ويكتب بكيفه وحتى طلبت يظيف شهود مظاف بل افاده واحنه الصدك اول مره داخلين هيج محاكم وقضايه يعني جنه غشمه ومتعرف شي
المهم دخلت للقاضي استاذ ح الله يذكره بلخير انسان بمعنى الانسانه وشريف وخلوق
اتذكر سالني اول سوال بابا شتصير منك فلانه كتله مرت اخويه وكلي اخوك وين زوجهه كتله متوفي كال وين ساكنه هيه كتله يم اهلهه كال هيه تاهمتكم بان هيه جانت ساكنه وياكم بنفس البيت وانته كاتلهه وطاردهه وماخذ اطفالهه من عدهه لويش بابا تسوي هيج كتله استاذ اقسم ب الله هذا الكلام جذب وهيه مساكنه ويانه واني صارلي ب 3سنوات مشايفهه ولا حاجي وياهه وهيه الي شمرت الاطفال علينه وعندي شهود بهل كلام واكدر اجيب باجر الاطفال وانته اسالهم بنفسك كال ليش مجبتهم اليوم كتله استاذ الولد الجبير مريض والبارحه جنت مسويله ناضور وخفت صحته متتحمل
كلي ليش شبيه الطفل وشنو مرضه كتله مااعرف بس الطفل يطلع ويه خروجه دم هوايه
هنا هوه شمر القلم من ايده وكال شنو بين بلنتيجه مالت الناضور كتله كالو شهر وتجي على النتيجه   كلي هوه النتيجه من تطلع جيبلياهه اشوفهه
وسالني الاطفال يمك كتله ايه يمي بلبيت كلي #تنطيني وعد رجال من اطلب الاطفال تجيبهم لو تنهزم كتله وعد اجيبهم وكتله اني اريدك تخلصنه من هايه المره ترى صارلهه سنين مدوختنه وياهه وتريد فلوس هيه وابوهه ميقبلون بحصتهم من البيت تريد اكثر 100مليون وكلي مو بكيفهه اذا هيه صدك تريد فلوس تنطونه وفق القسام الشرعي
كلي مراح اذبك بلتوقيف بس جيب كفيل يتكفلك وارجع للبيت واخوك الثالث ليش محاضر اليوم كتله لانه عسكري وبلدوام ميخلونه ينزل اله بجازته كلي لعد شوكت ماينزل خلي يجي يدون افاته وجيب وياك النتيجه مالت الناضور
ودخل عاد اخويه نظير للقاضي وبس ساله كله انتم تقبلون تنطونهه الاطفال نظير كله اي كله ماشي اطلع بره وجيب كفيل وخلي اخوك يفهمك
جبنه كفلاء وتكفلونه ورجعنه من المحكمه للبيت وشابعين قهر وذله لانه كان تعامله كله تعال المتهم وروح المتهم وعلى شنو صرت متهم مااعرف اتهموني لانه عملت باصلي واخلاقي واخذت الاطفال من الشارع وعيشتهم يمي وهمه اطفال اخويه يعني هذا واجب عليه اخذهم واربيهم المهم بقينه ننتضر نزل خلف من دوامه والتقرير الطبي للناضور
وبمرور الايام كمنه نشوف تصرفات الاطفال مو طبيعيه وبلخصوص الجبير اخلاقه زفت واطباعه جايفه وجنت انطيه الموبايل مالتي يباوع يوتيوب ومره بالصدفه دخلت لجوجل ابحث عن مرضه شنو وشنو اسبابه والكي موجوده بحوث كله مواقع سخيفه وافلام مخازي وهنا تعجبت لانه موبايلي محد ياخذه غيري
وصحته وسالته كام يحلف ويبجي ويكول مواني الباحث المهم عفته محاجيته كلت خلي اتاكد زايد واني متاكد ان هوه الباحث وره كم يوم اجاني وراد الموبايل وانطيته اله بس راقبته وره ساعه لكيته كاعد فوك وحده بلغرفه وطبيت عليه غفل واخذت الموبايل من ايده وشفت الي جنت متوقعه هوه يطلع هيج مواقع وافلام لزمته كتلته كتله ومنعت منه الموبايل
وكتله هيج شغلات حرام وشنو تسويهن انته طفل بعدك ومنو علمك وهماتين جذب كلي هنه وحدهن يطلعن اليه
عدنه من معارفنه دكتور نفساني انسان شريف حيل دكتور م اتصلت عليه وكتله على الطفل شيسوي كال ماشي اني حجيكم للبيت واجيكه واشوفه شنو شبيه
اجه عدنه للبيت دكتور م وشرحتله على الطفل واخوانه وكلي صيحلياه خلي اشوفه وحدي واحجي وياه صحته وكعته يمه وطلعت اني وره نص ساعه صاحني الدكتور وكال للطفل روح
كتله بشر دكتور كلي هذا انسان ممسوخ وشخصيته مو نظيفه وانسان يرادله جلسات وتعب ويرادله تربيه من جديد متعلم اطباع واخلاق فازده مو حلوه واحذر من عنده لتشوفه طفل ترى هذا داهيه متخفيه كلي اريدك اتابعه بكلشي وطول اليوم ومتخليه يغفل عن عينك هوه واخوانه كتله والله مصيبه اعوف شغلي وابقى اراقب بيه كلي هذا يرادله تربيه جديده الطفل فاسد حيل حيل
بقينه نراقب اني وزوجتي بالطفل طول اليوم والله حتى من ينام ارقبه وموبايل بعد منطيته ابد
يعني خاف جانت عايزه لتمت
قرب موعد النتيجه مالت الناضور واخذت الطفل ورحنه لمدينه الطب واخذت النتيجه من المختبر ورجعت للجنه مالت الاطباء وانطيتهم النتيجه ورجو فحصو الطفل فحص سريري وجان الدكتور يباوعلي صفح وكلي روح للجنه الثانيه علاجك مو يمنه كتله دكتور انته الي كتله سويله ناضور وهذا اسمك وتوقيعك كال وبصوت عالي ونتره وياهه اعرف وروح اطلع للجنه الثانيه
ورانه مرضه لازم نفحصهم
عفته ورحت للجنه الثانيه قرو التقرير وشافو الدكتور شكاتب هماتين باوعولي صفح وبنظره حقيره غريبه وكلي علاجك مو يمنه علاج الطفل تروح لدكتوره بمستشفى الطفل
رحت سالت عليهه وكالولي باجر دوامهه لانه اليوم مجازه رجعت للبيت كلشي ممفتهم
واخذت التقرير بليل ورحت لصديقي صيدلاني وشوفته اله كام يقره بيه ويعوج بحلكه وكتله شنو مكتوب كلي بس كاتبين الطفل ينزف دم هواي كتله صدك لعد لويش معالجو الطفل شبيهم ذولي الرحمه طارت من كلوبهم
ثاني يوم رحت لمستشفى الطفل والزغير وياي وسالت على الدكتوره وكالو موجوده وكالودكتوره حيل فاهمه وشاطره والله لعد الله سهل وعلاجنه يمهه بهل اثناء وتجي دكتوره عجوز يابسه وظعيفه وتصيح على الكادر والمرضى وكلبت الردهه كلاب بصياحهه كتلهم منو هايه كالولي هيه دكتوره الي انته جاي عليهه كلت خرب حضي علاجنه يم هايه الاعصاب
عفتهه تهدأ وره اكثر من ربع ساعه دخلت عليهه وسلمت عليهه بسلوب حلو والفاض حلوه وكتلهه دكتوره دزني دكتور فلان عليج من مدينه الطب بخصوص الطفل ابني هذا وهايه تقاريره والطفل هذا
كالت شعنده كتلهه يطلع ويه خروجه دم ومانعرف شنو مرضه زنتري تقرح التهاب وانتي البركه بيج وحمدونه بحظرتج وكالو علاج الطفل يمهه كالتلي انطيني التحاليل والتقرير مالت الناضور انطيتهن الهه شو هايه الدكتور صاحت بوجهي وشمرت التقارير بوجهي وكالت اطلع بره انتم السبب تهملون اطفالكم ومن يتمرظون حيل تجون علينه تعالو عالجوهم
كتلهه دكتوره اعصابج الطفل شبيه وشنو مرظه كالت اكلك اطلع بره كتلهه هسه احنه اهله مو خوش اوادم وهاملينه وجبته الج انتي دكتور وعالجيه جان تصيح هذا طلعو بره واذا ميطلع جيبوله الشرطه اطلعه
والله عفتهه وطلعت ولحكني ولد وكلي تره هايه دكتوره فاهمه روحلهه للعياده مالته افظل هناك تتفاهم وتنطيك علاج وانطاني عنوان عيادتهه ورقم الحجز
هماتين رجعت للبيت ممفتهم شي اتصلت بلعياده مالت الدكتوره ر وحجزت النه وكلت لزوجتي انتي اخذيه حتى متعرفج وبلكت تستقبلج وتكلج مرظه شنو وتنطيه علاج كالت ماشي وهيه زوجتي هماتين مبتليه وياي شتسوي
راحت العصر للعياده مالت الدكتوره وتاخرت ومن اتصلت عليهه كالت جان كدامنه ناس هواي ومن دخلنه كامت تصيح وبس قرت التقارير والتحاليل طردتنه ودزت على السكرتير وكلتله ذولي رجع فلوس كشفيتهم واحفض شكلهم وبعد ممنوع يدخلون
وهماتين رجعت زوجتي للبيت وممفتهمين شي ابد
وراهه ظلينه ندور دكتور فاهم واختصاص وملكينه وبقينه ندور
ونزل خلف للبيت واخذته واخذت التقارير والاطفال ورحنه للمحكمه وهماتين تعال المتهم وروح المتهم ونشوف امهم وجدتهم وجدهم واكفين على صفحه ويباوعون علينه وهيه امهم بكل عين صلفه لا صاحت على اطفالهه ولا رادتهم ابد والاطفال يبجون وشابكين زوجتي ويكولون والله ماانريد امنه نريد نبقه عدكم
جان طلع الشرطي وكال القاضي مجاز 10ايام لانه امه متوفيه ورجعنه للبيت والاطفال ويانه
اني كمت ادور على محامي. ولكيت هوايه بس اسعار خياليه ومينطيك ضمان بلقظيه ويكولون هيه حقهه تاخذ الاطفال منكم
المهم عرفوني على محامي ولد شاب اسم ا.  ملتحي واجه لبيتي وسولفتله القصه كلهه وكتله اريدك
توكفلي  بهايه القظيه وكفت اخ لاخو  وشتريد اني حاظر طلب 5 مليون وكتله ماشي انطيك بس شرط الاطفال يمي يبقون كال اني اكلت زادك وشربت مايكم ونطيني ايدك سالمني ولزم ايدي وكال والله وبيني وبيك العباس ع الاطفال ميطلعون من بيتك ابد وكلي احنه 2محاميين راح نشتغل سويه على القظيه
كتله ماشي نطيته قسم من المبلغ وكال سويلي وكاله اليه وللمحامي صديقه الثاني
وثاني يوم سويتله وكاله ومنتظرين القاظي مالنه يداوم استاذ ح وره كم يوم اتصل بيه المحامي ح وكلي القاضي مالتنه منقول والدعوه متحوله يم قاضي ثاني وطالب اخوك خلف يجي يدون افاته طبعن خلف شلع كلبي وميقبل يروح وممتعاون وياي ويكول اني شعليه بلدعوه وشعليه بلموضوع كله كتله هذا قرار قاضي وانته لازم اطبقه واخذته ورحنه للمحكمه ودخل للقاضي وانطه افاته وكل معتاد بره نفسه وهنا اجه امر القاضي الجائر بحقنه كال على المتهمين يسوين بصمات القيد الجنائية وهذا ضلم بلنسبه النه لانه القيد راح يثبت ويانه للممات ويعرقل امور حياتنه
الي عرفته ان البنت وابوهه والمحامي مالتهم داخلين للقاضي وكايليله ذولي المتهمين سوابق وعدهم جراىم قتل وخطف وتزوير ودعاره وسرقه وكلشي وهنا القاضي جان متشدد ويانه حيل
دخلنه للقاضي وطلبنه من عنده يلغي امر القيد الجنائي بس موافق واصر على هل امر نطبقه
رحنه ثاني يوم اني ونظير للمحكمه حتى نسوي القيد الجنائي وكل معتاد يصيحون علينه مو بسامينه يصيحولنه المتهم وختمو على ايدينه ختم المحكمه وانطونه كتاب مذكور بي التفاصيل ودزونه على مركز شرطه مختص بهيج امور جناىيه
واحنه نتمشه بلطريق اني ونظير كتله اني خايف يصير تشابه اسماء ويانه بلحاسبه مالت الجنايات ونظيع بيهه وهل شي صاير بلعراق كلي لعد شلون كتله من يطلبون من عدنه عنوان السكن لتنطيه صحيح عنوان بيتك غير بارقام المحله والزقاق والباقي على الله
وصلنه للمركز ودخلنه للغرفه الخاصه بلقيد والشرطي كال هوه انتم هايه الدوخه كلهه عليكم كناله شكو كال والله الاخبار الي وصلتنه عليكم تخيلتكم مظربين امواسه وموسين اوشام بجسمكم وتخيلتكم شكولكم غير شي
كناله لا خويه ذولي احنه وهايه جناسينه وهذا ختم المحكمه الشرطي الله يوفقه تعاطف ويانه حيل وكال امنيتي مااسويلكم القيد بس هذا امر قاضي كناله ممنون لانسانيتك عادي طبق الامر
تفاصيل القيد مذله جدا للانسان الشريف يعني تجي يبصمونك اصابعك العشره واحد واحد وبعدين العشره اصابعك سويه وبعدين يوكفونك قريب على الحايط وينطونك صبوره زغيره وبيهه اسمك ورقم خاص بيك وياخذولك صور لوجهك كله وتنار يسرى وياخذولك وتندار يمنه وياخذولك يعني مثل الي نشوفه بل افلام وضع مذل وقاسي وياخذون معلوماتك كامله الاسم واسم لام ورقم الموبايل وعنوانك
وهنا نتبهت بمعلومات نظير اخويه ممنطي عنوان بيته منطي عنوان بيتي يعني علسني خاف اكو شي يجون عليه اني علعنوان
صرت اعصاب عليه وسالته كتله ليش انطيت عنواني مو كتلك نطي عنوان خطا كال والله رتبكت ونسيت وتذكرت عنوان بيتك وانطيته اعذرني كتله شنو اعذرك انتم الظاهر بايعيني
رجعنه للبيت والمحامي مالتي اتصل عليه وميجاوب ومن يجاوب ينطي اعذار جذب يوم يكول جنت مسافر ويوم يكول ابويه مريض وشفت عنده تهاون بلقظيه حيل
وهنا صارلنه حدث بلبيت كلش جبير وعرفنه الكارثه وره مرض الطفل

يتبع انتظرونه بارت التاسع من مذكرات متهم
2022/5/4
تعديل القيد الجنائي هيه معلومات الانسان من اسمه الكامل واسم امه وعنوانه وبصماته وصورته تثبت بدائره اسمهه الادله الجنائيه هايه بيهه حاسبات وبيهه معلومات المتهمين والمطلوبين والمجرمين بكافه العراق والي يدخل أسمه بلحاسبه حضه اغبر وفكر لانه بعد مينحذف ابد ويبقى اسمهه للممات ومرات الدوله تعمم اسماء المطلوبين على كافت السيطرات واذا عممو اسامينه بلخطا والزمنه يعني راح ناكل تبن وشهور ياله نطلع
وبيهه سلبيات هوايه على الانسان الشريف فقط