مذكرات متهم

البارت السادس

السلام عليكم
البارت السادس من #مذكرات متهم
توجهت للمستشفى ولكيت عمامي واولاد اخويه نعيم وسمعت طلطشت كلام واتهامات على ولده بان همه السبب بموته
كملت الاجراىات ورحنه للنجف ندفن واني الي دخلت سبحته بيدي وغسلته الله يرحمه لسببين الاول لانه اني هماتين سبحت وغسلت اخويه مظلوم بيدي واعرف الناس راح تسال غسل نعيم بيده لو فرق لانه نعيم اخويه من غير ام بس احنه معدنه هيج تفرقه والسبب. الثاني اني اتاكد بي اثار ظرب اوشي تبين موته المفاجئ
وهماتين الفاتحه صارت ابيتي وعلى نفقتي الخاصه لانه ولده مابيهم خير وبقينه منتظرين تقرير الطب العدلي ونعرف شنو سبب وفاته وصارت احداث هوايه اذكرهه بغير بارت لانه هذا الجزء مخصص بحياه اخويه مظلوم فقط وكل اخ او اخت راح اخصصله اجزاء خاصه بيه وعن حياته..
من خلصت الفاتحه والسابع والناس قلت جيتهم علينه سمعت من اطفال المرحوم يسولفون  اليه ولزوجتي بان امي وهند اختي بايام الفاتحه تعلم بل اطفال وتكللهم ابجو وسوو هوسه وكلو العمكم انريد امنه ومنريدك وروحو لمكم افظل الكم واحسن طبعن الاطفال رافظين هل شي لانه يمي شافو الراحه والتعامل الحلو والطيبه واني وزوجتي نعاملهم ب ابوه والحنان
وتاكدت من امرين انو اكو اسباب الي يردون الاطفال ميبقون وان هناك اسرار يعرفنهه ومشاركات بيهه والشي الثاني انو اني مبتلي باعداء شياطين وابالسه مو بشر
صارت تدخلات من قبل بعض ولد عمي واخويه نظير اني ارجع الاطفال الامهم وامهم جاي تخبل عليهم وان هيه ندمانه لانه شمرتهم بس مقتنعت بكلامهم ابد لانه اني اعرفهه واعرف طبعهه واعرف شنو بداخلهه تريد الاطفال تستخدمهه وسيله وظغط لمتطلباتهه الدونيه زاد الظغط عليه واني وحدي وتعبت نفسيتي ونفسيت عاىلتي واتذكر وصلني خبر بان اذا مترجع الاطفال حتى عشيرتك تتبره من عندك وكام يدزون عليه انواع الناس من الجوارين والاصدقاء والاقارب حتى اوافق واجى اخويه نظير وكلي حرام عليك تفرقهم انطيهه فرصه ثانيه بلكي تندمت وتستعدل والله رديت عليه وكتله حشاكم ذيل الجلب عمره مينعدل وامهم تريدهم لمصلحه مو لشخصهم وتحبهم
نظير انطاني ظمانات وعهود انو هوه راح يتكفل بلموظوع ويحله ...رغم هوه متاخذ منه اي ظمان لانه بوكت الشده يظم راسه
المهم ستسلمت ووافق والاطفال مقبلو يرحون لامهم والله لحد هايه الحظه اتذكر بجيهم ونظراتهم كانه ماخذينهم للاعدام مو ماخذينهم لامهم راحو الاطفال ويه اخويه نظيرواختي هند يوديهم لامهم نكلب حال البيت بجي ونوح اني واطفالي وزوجتي وكل معتاد تمرظت  وبعدين كدرنه نعبر المرحله
بقيت اسال اخويه عليهم شلون الاطفال شنو اخبارهم تشوفهم تسمع اخبارهم يكلي جاي اتابع اخبارهم زينين وبخير بس اني مااصدك همه بخير كلبي يعلمني واتذكر الي يسولفولي من جانو عد امهم قبل وشلون تعامل امهم وخوالهم وياهم بقسوه وظلم وجوع وحرمان
بقى بيتهم ماجر وكل شهر عندي صندوق اجمع الايجار الهم واكول تفيدهم للزمن هايه لفلوس
وره كم شهر اجاني نظير وكلي محتاجك بشغله وكون مترجعني كتله كول كال اتصلت بيه مرت المرحوم وتكول المصرف ماالحك عليه الجهال مصاريفهم زاده اريد ايجار البيت حتى اكدر اعيشهم عيشه زينه
رديت عليه وكتله ها بدت رحمت الله مو عرفت نيتهه مو بطفالهه نيتهه بفلوس الايجار
كتله احنه مو سوينالهه راتب ارامل ويكفيهه شنو تطلب بعد الاطفال عدهه وهمه يتحملون مسوليتهم وصدكني مراح توكف على طلباتهه
المهم بعد مفاوظات وهماتين دزو جماعه ياثرون عليه وافقت انطيهم فلوس الايجار
للعلم اني لمن موافقت عرفت هذا طعم اليه وهمه عدهم غايه اكبر
كمت كل شهر اودي افلوس الايجار لاخويه نظير والي فهمته وعرفته ان هيه راح تسكن يم هند اختي مو يم اهلهه وهند راح تتكفل بفلوس الايجار والباقي تجمعه الهم
مظى كم شهر واحنه على هل حال
ومبقا عندي غير اروح كل شهر او اقل لقبر اخويه مظلوم واشكيله همي وظلمي وحال اطفاله والوظع الي وصلناله بس ارجع مهموم اكثر لانه مااسمع منه جواب لانه الميت شلون يجاوب ويحجي
ولا عندي انسان الي يسمع همي واشكيله الصراحه الثقه بلناس نعدمت عندي لانه كمت اشوف الناس وحوش طماعه منهم من يريد يفترس فلوس ومنافع
ومنهم من يريد يفترس الارامل والمطلقات بنزعات شهوانيه حيوانيه
ومنهم من يسمعلك ويروح يم غيرك يشهر بيك ويتشمت ويسويك خبر عاجل وترنت

واني بلبيت اتصل بيه نظير وكال تعالي ورحتله كتله خير شكو
كلي انته جامع للاطفال فلوس وينهن كتله عندي موجودات كلي خاف صارفهن كتله لا والله ودقايق اروح اجيبهن واجيك رجعت لبيتي جبت الفلوس والدفتر الي اسجل بيه وكتله ذني امانه اني مخليهن يمي للاطفال وظمان الهم وماكو انسان مسول يكدر يتصرف بيهن واني واثق الاطفال راح يرجعون النه وميطولون يم امهم
كلي مو اختك هند جاي هماتين تجمع وتكول خلي ينطيناهن اظمهن يمي كتله لا تريد اخليهن يمك امانه اني اقبل بس هند وامهم لا لانه ذني شياطين ومنو كال يصرفنهن على الاطفال هل شي مااقبله وذني هند وامهم راح يبزعنك بلطلابات مالاتهن هسه تشوف
الي فتهمته بعدين انو #امي اوف اامي توصل اخباري لاختي هند وامهم توصل كلشي الي اسويه والي عرفته هند كايله لاخويه نظير انو اني صارف الفلوس واني مو امين عليهن جيب لفلوس من عنده خليهن عندي اامن وافظل
منطيت الفلوس رغم جان المبلغ بسيط بس جنت اعرف مطامعهن اكبر من هل شي راحت ايام واشهور وهماتين اجاني نظير بسالفه جديده وكتله خير اامر كال هند ومرت اخوك يكولن لازم الاطفال يستقرون ابيت الهم خاص
كتله عادي اشيل المواجر خلي ترجع لبيتهه وتكعد بيه هيه وامي وتربي اطفالهه
كال هذا الشي رافظته ترجع يمك وهم رافظه امي وياهه تكعد
كتله لعد الحل شنو العدهن
كال نبيع البيت مال الاطفال ونطيهم الافلوس همه بمعرفتهن يشترن بيت وتكعد بيه هيه واطفالهه واحنه موافقين على هل شي بقيت بس موافقتك يعني كتله انتم مشتمعين كلكم ومصوتين علبيع
كتله ها شكتلك رجعنه للمربع الاول كتلك همهن البيت يبيعنه وياخذن الفلوس مو همن الاطفال وصدكني بس ينباع البيت وياخذون فلوسه يشمرون الاطفال بلشارع وهل شي ميصير والي يتقرب للبيت والله ادفنه بلنجف واذا بيكم رجال خلي يجي يبيع البيت
سمع ردي وراح ووره فتره سمعت اني اختي هند ومرت اخويه متعاركات بيناتهن وماخذه الاطفال ورايحه عايشه يم اهلهه وبقت هيه والاطفال سنوات يم اهلهه واخبارهم نكطعت عني مااعرف الاطفال شنو حالهم وشلون عايشين ها بس بيقيت ادز فلوس الايجار عن طريق اخويه واخويه لهند يطيهن ويجي اخو مرت المرحوم ياخذهن من هند
والي افتهمته انو عركتهن صايره على فلوس الايجار كل وحده منهن تريده الهه والاطفال ممحصلين شي من الافلوس والشي الثاني هند جانت مقنعه مرت اخويه بان ينباع البيت مال اطفال وهند تبيع بيتهه ويشترن بيت اكبر وبمنطقه افظل ويتسجل البيت بسم هند وهل شي دهاء وخبث ونصب من هند
من سمع ابو زوجه اخويه المرحوم تخبل. كل البنته اذا باعو البيت مال الاطفال تجيبين الافلوس اليه ماكو انسان ياخذهن
يعني يردون ياكلون حق اليتيم الله واكبر عليهم
وره كم سنه هماتين بقت محاولات على بيعت البيت بس جنت رافض ابيعه ابد
واجه اتصال من اخويه نظير اتذكر شهر السابع 2020واحفظو #التاريخ زين لانه مهم جاوبته وسلمت عليه وصدمني كلي اكلك مرت المرحوم شامره الاطفال على هند وكايلتلهه على شنو اتحمل واظيع عمري وشبابي بتربيتهم اخذو اطفالكم ونكطعت علاقتي بيكم
وهند تكول تعالو اخذو الاطفال لانه اني هماتين مااريدهم واني نتظرت امهم شهر عفت الاطفال يمي كلت تغير راىيهه وترجع تاخذهم بس مااجتي واتصلت عليهه وتكول مااريدهم اخذوهم لا اجي احركهم بلشارع

يتبع بارت سابع واحداث مؤلمه جدًا جدامن
@مذكرات متهم
2022/5/2
تعديل الظحيه والخاسر الاكبر الجان بكل الاحداث همه الاطفال لان جانو يتنقلون من بيت البيت وهنا الطفل يكوم مايحس ب امان والحنيه الي فاقدهه من ابوه الله يرحمه وشي ثاني اختلاف التربيه والاطباع والحرص والتعليم والمتابعه يختلف من بيت لبيت والي حطمهم اكثر السنوات الاخيره الي بقو بيهه عايشين ابيت جدهم ابو امهم والي دمرهم اكثر تعامل خوال القاسي الا اخلاقي الهم