مذكرات متهم

البارت الخامس

السلام عليكم
البارت الخامس من مذكرات متهم

                       #احداث اواخر سنه 2017
بعد ما راحت مرت المرحوم لاهلها امي رجعت كعدت وياي بلبيت والبت مالت الاطفال انقفل
واني باقي بين نارين نار اطفال اخويه وجانت وصيته اني اربيهم ونار اذا اريد يرجعون لازم بس اشوف واسكت لو مدري شيسوون مااحجي والي تعب نفسيتي اكثر اهلي كلهم ضدي مرات اكول معقول كل هل كره اليه شنو سببه وكلها ضدي زين مدا يشوفون الي اشوفه لو اني صدك ظالم ليش الكل يتجنب يحجي الحق وخايف
وحده من الناس امي كل هالكلام الي صار ضدها ومن تحجي تكول يمه رجعها شتريد سويلهه
واني اعرف الي هيه تريده اي انسان شريف وعاقل ميتقبله تعبت نفسيتي بس من التفكير ووصلت للموت وبقيت ايام واسابيع نايم بلفراش مااعرف شنو مرضي وامي عافتني واني مريض وراحت كعدت يم اخواني
وكل الي حولي عافوني اخواني واقاربي وحتى اقرب اصدقائي الي جنت افديهم بنفسي مابقى عندي غير اخويه المرحوم كمت اروحله لقبره واكعد اسولف وياه ساعات وساعات كانه كبالي واكوله انصحني شسوي واصيح واكوله خويه ماكدرت انفذ وصيتك اطفالك اخذوهم حتى اكثر الي جانو يفوتون من القبور عبالهم اني مجنون مو عاقل بقيت على هل حال اشهر هوايه شغلي ورزقي تعب واطفالي اجواء البيت الحزينه اثرت على نفسيتهم لانه كان اجواء البيت يعمهه الظلام والحزن
كمت من اروح لاخويه اقسم عليه بكل امام ونبي وبكل ذكره وموقف كان بينه ان يجيني بلمنام ويكلي منو الي كان سبب موته وانتظرته بلحلم ايام ومجاني وماعرف القدر كان مخبيلي ان اعرف سبب موته بلواقع مو بحلم ....؟
كدرت اعبر الازمه ورجعت اكوف على طولي رغم الكل راهنو على موتي وبديت اتكيف على الوظع الي صار بس ابد منسيت اطفال اخويه ابد
وبيوم اتصلو بيه عمامي وكالو اتصل بينه جد الاطفال وتعال نروح نكعد ونشوفهم شنو يردون
رحنه اني وعمامي وصارت كعده عشاير واجه ابوهه وكعد كبالي وكان بدي اشرب من دمه
وجان طلبهم الورث مالت بتهم والاطفال ياخذونه وجان متوقع البيت الي بنيته اني سجلته باسم الاطفال ويريد يبيعه وياخذ فلوسه لانه بس بنته الهه حق التصرف بحصه الاطفال القاصرين
وهنا صدمته اني صدمت عمره كتله البيت مو بسم الاطفال البيت سجلته بسم اخويه خلف والاطفال الهم من البيت 22متر فقط حصت ابوهم ولانه الحصه الجبيره بسم اخويه ميحقلكم تبيعونه
بس اذا تريد حق الله انتم لو اني اسوي قسام شرعي لاخويه وشكد تطلع حصت بنتك نطيكياهه وخلينه نخلص من المشاكل هنا هوه نصدم وكال شنو عبالك اقبل بملاين قليله اريد100مليون لومااقبل هنا اني خلص صبري وطلعت اسوء مابيه وكلبت الدنيه عليه وراده تخرب الكعده كلهه
واتذكر حجايته كلي لعد اخذو اطفالكم شنو مبقيهم عندي اني كتله لا مااريدهم انتم ربوهم بس بداخلي مكيف اريد كون هسه يجيبهم واشوفهم شخبارهم شلون صحتهم
كال لا بنتي تريد تزوج وباجر اجيبلك الاطفال واتفقنه على هل شي ورجعت الفرحه متوسعني وشيجيب باجر واصبر شلون واقابلهم
ثاني يوم اتصل بيه جبير عشيرتهم وكلي تروح لفلان منطقه تاخذ اطفالكم وصدك رحت ولكيت الاطفال بلشارع مشمورين والدنيه شته وتمطر وملبسيهم ملابس خفيفه والاطفال مرظه ومن الوصخ والقذاره الي بيهم كوه عرفتهم ها وتاركيهم بحي صناعي وناىي تقريبا
اخذ الاطفال ورجعت للبيت وكلت الحمد لله صبرت ونلت وراح انفذ وصيت المرحوم واربي اطفاله
هنا كامت توصلي اخبار عن امي بان اخويه نظير ومرته طاردينهه من البيت ورايحه لاخويه خلف وهم طاردهه ورايحه عد اختي هند وهماتين طاردتهه واخير شي رايحه ساكنه يم خالتي والله تالمت رغم الي سوته وياي بس كلت هايه امي واتصلت عليهه وكتلهه محتاجج بشغله ظروري تجين واطفال المرحوم عندي رغم امي الي سوته وياي مستحيل ام مسويته ويه ابنهه
وراح اذكر سواياتهه الي وياي الكم بمذكراتي الي حكتبهه على حياتي
المهم اجت للبيت ورحبت بيهه وخليت الاطفال يسلمون عليهه وكتلهه يمه سمعت بخبارج والي صار وياج واني ابنج ومسامحج بكلشي ويمه انتي تكعدين بلبيت وانتي ام البيت واني خطار واخدمج اني وزوجتي واطفالي بعيوني كامت تبجي وتكول انته كلبك طيب وآني ظلمتك بكلشي من دون اخوانك سكتتهه وبست راسهه وقررت تبقى عندي
شفت الاطفال صحتهم تعبانه بقيت اراجع بيهم والحمد لله تحسنو بقت اسال بيهم شلون عشتو ويه بيت جدكم سولفولي عايشين ايام سوده والكل تكتل بيهم وموتينهم من الجوع ويكول الطفل عمو ماما تسب ابابا وتكول خرب كبره حطم حياتي وكون الله يذبه بجهنم ويكول بليل (مينيمونه بلغرفه الي تنام بيهه امي وبيبي وخالو ينيمونه بره بالكراج مرات هوايه ويكتلنه الخوف والبجي)#ملاحظه هايه الجمله الي بين قوسين احفظوهه زين لانه بل ايام الجايه حتعرفون السبب لويش يبيتوهم بره
المهم المصاريف ثقلت عليه ورزقي قليل وعددنه هوايه ٩نفرات فااكثر الناس كلولي البيت مال الاطفال لويش قافله افتحه اجره واصرف ايجاره على الاطفال وهمه عايشين ابيتك والله يفرجهه عليك صدك اجرت البيت وكمت الاجار اجيبلهم ملابس واحتياجاتهم والي يزود اجمعه عندي وكاتب عليه امانت الله ورسوله ذني للاطفال وبقينه على هل حال كم شهر عايشين بسلام رغم نتبهت اني وزوجتي اخلاق اطفال اخويه موتمام اخلاق شارع كلش وتعجبنه من هل شي وبدينه نغير بخلاقهم وطبعهم الزفت
هنا امي هماتين مكعده امي اوف ياامي اتصلت بااختي هند وكلتلهه على كلشي الاطفال مرتاحين واجر بيتهم وجاي يصرف الايجار عليهم ويجمع منه
وبماان هند متحالفه ويه مرت اخويه المتوفي بلغتهه هيه واهلهه كلشي وهنا بدت تحركات مرت اخويه واهلهه على الاطفال يردونهم وميتين عليهم ويكولون امهم متخبله عليهم وجاي ناخذهه نربطهه بشباك الامام الكاظم ع ياله يرجع عقلهه
بلصدفه ندك الباب وطلعت اشوف منو لكيته اخويه الجبير نعيم وهوه و٣من ولده جايين يزوروني رحبت بيه وكعدنه ولا عاتبته وكتله ليش صارلك اكثر من سنتين مسائل عليه ولا على اطفال اخوك  يعني ماعاتبته ابد
سولفنه وظحكنه ولا عاتبته وتغدينه وراح لهله وماعرفت على شنو جاي وشيريد
وره يومين واني بالشغل وساعه 12بليل اتصل عليه ابن عمي وكلي انته وين كتله بلشغل كلي وصدمني بكلامه تعال للمستشفى اخوك نعيم توفه صدك نصدمت لانه قبل يومين جان يمي وصاحي مايشكي من شي ابد رحت مثل المخبل للمستشفى وشفته الله يرحمه وهماتين وفاته اسباب غامظه وغير معروفه وهماتين صارو عندي متهمين بوفاته

يتبع بارت سادس مذكرات متهم