مذكرات متهم

البارت ال 11

السلام عليكم البارت 11من مذكرات متهم
اعتذر منكم اعرف مقصر وياكم اخواني بس الضروف صعبه هل ايام
صدر علينه امر قبض من قبل القاضي واصبحنه متهمين بجريمه احنه ممرتكبينهه احنه لاخاطفين الاطفال ولا ماخذيتهم غصب وهمه بل اصل اطفالنه وهيج جريمه رادت تثبت علينه مو بادله ولاكن بشراء ذمم شراء ذمت المحامي والمحقق القضاىي والشاهد الي قسم ب قران كذب اشتروهم بفلوس
امر القبض جاري علينه الاطفال وزوجتي خايفين ونفسيتهم تعبت حيل وحالت زوجتي الصحيه ساىت حيل واخذتهه للدكتور وفحوصات وسونار  وتبين عدهه المراره تريد تنفجر والدكتور كال لازم عمليه لانه حتى نكدر نصيطر على الحاله قبل لتسوء صحتهه
ووره كم يوم دخلتهه مستشفى وسوينالهه العمليه وكانت نفسيتنه هوايه تعبانه وقلقه وعشنى ضغط نفسي كلش قوي واعصابنه تلفت حيل كمت منين ماالتفت اتلكاهه
يعني محاكم ومراكز ودعوه كيديه ومستشفيات وعمليات كل هذا الصار بيه بس والله كلت
ان شاء الله مااستسلم وابقى اقاوم ومااتنازل عن حق الاطفال والضلم الي وكع علينه
وره كم يوم من عمليت زوجتي اتصل بيه المحامي الاول الي باعني للخصم وكال جايك واجاني وبكل عين صلفه كام يساوم بيه على فلوس بلدولار حتى ميخسرني القضيه ويكلي لازم تنطيني وهوه جان مفكر لازمني من ايدي التوجعني وسمعت كلامه الي حجالياه وكتله سهله وتدلل بس اصبرلي كم يوم وادبرلك المبل الي طالب مني 70ورقه
يعني مااعرف شنو من انسان هذا الي باعني واجه يساومني وكتله بكلبي سهله اله اندمك
واجه اليل وكل معتاد خلصتهه جاي وجكاير وسهر نوم ماكو وعفت كل مشاكلي على صفحه وفكرت بس بلمحامي شلون اخلص من عنده وارجع فلوسي واذله لانه خان الزاد والملح البينه وهنا كلت خلي اصوره شلون يساومني والزم عليه دليل قوي واكصر ضهره
وصار الصبح ورحت لاخويه نضير وكتله على الخطه وقنعته كوه لانه جان متردد وخايف وكتله من يجي المحامي اريد منك شغلات وهي ان نركز بس على قضيت المساومه ولفلوس ونريد تفاصيل دقيقه ونخلي كلامه وياه مركز بلموضوع وبس واريدك تسوي نفسك غبي وخلي يكرر كلامه هوايه عليه حتى نصوره زين كال ماشي
واتصلت بلمحامي وبلغته كتله الفلوس دبرتهن بس اخويه الجبير ممصدك ويريد يسمع من عندك ويفتهم اكثر
المحامي كال ماشي باجر اجيكم للبيت بليل واشرحله وقرب الموعد وخليت 3موبايلات تصور احتياط خاف جهاز يوكف الباقي يصورن
وصدك بليل اجه المحامي ودخل للبيت وكام يسولف شلون يكسبنه القظيه وجاب اسماء الشرطه والضباط الي يردون فلوس وشلون باعنه للخصم وشلون جذب علينه وخلانه منحضر للمحكمه وخله القاظي يصدر علينه امر قبظ وشكد يريد فلوس من عدنه
خليته يحجي كلشي
جان كتله ماشي ندانش بيناتنه وارجعلك الجواب وكام وراح لبيتهم وميعرف اني صورت كلامه كله
طلعنه الموبايلات وشفنته التصوير كان واضح حيل 
وثاني يوم رحت اني وعمامي للمركز ودخلنه للمدير مالت المركز وحجيناله على المحامي وشلون يساومنه وشوفناله التصوير والمدير كال والله جذب هذا كلامه واحنه ماعدنه علم بهيج امور كناله المهم خلي القضيه تمشي بحقيقتهه ومنريد تدخلات وتزوير بلموضوع
والمحامي هذا من يجيكم اطردوه واحنه راح نعرف نتصرف وياه
اثاري المحامي الكلب حشاكم كل هل شي والمساومه تخطيطه ويريد هماتين ياخذ من عدنه فلوس فوك مباعنه الهم وفوك ممنطيه اني 4ملاين قديمات يعني جذاب لا قضيه ولا اطفال يريد فلوس بلحيله
المحامي وصله خبر التصوير وهسه هوه خايف ومنهزم
واني عايفه بمزاجي اكمل دعوتي الاوله وبعدين ارجع عليه لانه الكلام الي ذكره بلتصويو ينسجن عليه اقل شي 15سنه
المحامي الثاني مالتي الله يوفقه راح للمحكمه ودخل للقاضي وحجاله كلشي كله الولد جانو حاضرين للمحكمه بس المحامي مالتهم الاول باعهم وجذب عليهم وكلهم اجلتهه
القاضي الله يوفقه كال للمحامي اني اجلت المحاكمه شهر خلي يجون بلموعد كلهم واني مااسجنهم ونخلص القضيه اسمع الطرفين ونشوف ويه منو الحق ونحكم بس خلي يجون وقت المرافعه واذا محضرو اعمم اسماىهم على الصيطرات واحكمهم غيابي
طبعن بعدهه الاوضاع قلقه ومو بصالحنه
والدعوه الي اني قايمهه عليهم القاضي مالتي طلب نسخه من الدعوه مالت امهم الي قايمتهه علينه وكال اريد اعرف اكثر بلقظيه وفاتح المحكمه الثانيه بكتاب بدزوله نسخه من الدعوه الي مقامه ضدنه وبدينه ننتظر الايام حتى نحظر المحاكمه ونشوف شراح يصير وخلصنه ايامنه قلق وخوف من الي جاي والمشكله الجبيره المركز مالت الشرطه قريب على بيته يعني كل مااطلع من البيت افوت عليهم اسلم واطلع من يمهم هههههههههههه
والله ولا يوم كلبي خاف من الدعوه وجنت ادخل للمركز واطلع مرات هواي واني عليه مذكرت قبض بس جنت اخاف الاطفال يرجعون لامهم وتاخذهم يم خوالهم الانذال
وجنت مقرر القاضي اذا قراره جان اطي الاطفال لامهم
اخذ الاطفال وانهزم بيهم لغير محافضه وماانطيهم لو اعرف انعدم لو مهما يصير مااسلمهم
#بليل واني كاعد اكلب بلفيس اكو بيج مشترك بيه ونشره كله على ضلم الناس كلت خلي اراسله واحجيله قصتي المهم راسلته وحجيتله عن قضيته صاحب البيج تالم هوايه وكال اني راح اوصل صوتك للمسولين وصدك وره كم يوم كامت تتصلت عليه ارقام والي عرفته همه ضباط وسالوني عن القضيه واشرحلهم جزاهم الله خير يتالمون كلش بس بل اخير يكلولي مادم يم القضات منكدر ندخل ابد
بس اذا تريد مساعده فلوس اي شي ثاني حاظرين والله كتلهم جزاكم الله الف خير الله ساترهه من كلشي بس محتاج تدخلكم بلقضيه لانه قضيت ايتام ومضلومين
ردهم الي جان منكدر وجزاهم الله خير الجزاء همه الي جانو يتصلون واسلوبهم وردهم جان متعاطف ويه القضيه ومتالمين كلش ربي يوفقهم
ابو البيج جان متواصل ويايه بكلشي وكلي راح انطيك رقم مواسسه تتكفل بل ايتام وهايه المواسهه مدعومه من المرجعيه ومن الدوله وعدهم لجنه قانونيه ومحامين اكيد يساعدونك لانه همه عملهم فقط للايتام
وراح انطيك صفحه مال شخص مدعوم من الدوله وعنده دار ايتام ويكدريوصل صوتك ويساعدك بقظيتك
وراح انطيك رقم ضابط جبير بلدوله وصاحب منصب هوه يساعدك من ذكرلي اسم الظابط عرفته لانه هويه يطلع بلتلفزيون والاعلام مسلط عليه
وره كم يوم وجنت افكر بل اطفال كلت خلي اتصل بذولي الي كلي عليهم عسى ولعل يساعدوني
اول متصلت بل مواسسه مالت الايتام وحجيت ويا واحد من عدهم وكتله اريد انسان محامي او بلقانونيه لانه عندي قضيه واحب اطرحهه اله كال راح افتح حاكيه وهمه يسمعوك واسجل شكوتك واقدمهه للمدير هماتين المهم شرحتله مضلوميت الاطفال كلهه وهمه يسمعون
وبل اخير كلي راح اوصل شكوتك للمدير مالت الداىره واشوف الاجابه وباجر اتصل وابلغك شنو رده
ثاني يوم اتصلت عليه وبلغني برد مدير الداىره كايله تبلغه احنه مانكدر ندخل بلقضيه
بس اذا يحب نساعده بعلاج الاطفال او ملابسهم او احتياجاتهم هل شي نكدر عليه غير هذا مانكد
اني كتله لعد انتم مواسسه مدعومه من الله والملاىكه والمرجعيه والدوله وتسمعون هيج مضلوميه اطفال مغتصبين ومتسوون شي ابد يعني همكم بس تجمعون تبرعات وتصورون بلفضاىيات اثاري انتم اعلام فقط والناس مغشوشه بيكم
بلغ مديرك اله وقفه يم الله سبحانه وتعالى جبيره لانه منصر اطفال ايتام مضلومين وسديته الموبايل
بليل راسلت الشخص الثاني الي كلولي يساعدك وشرحتله مضلوميت الاطفال وكتله وصل صوتنه للمسولين الي بلدوله اريد هل شي منك وانته عدك علاقات واسعه بلحكومه
ووره اكثر من اسبوع راسلني وكالي انصحك حله قضيتك بل عشاير افظل بلدوله متحصل نتيجه
وهذا الشخص بل اعلام والفضاىيات يطلع على هيات ملاك وعنده جمهور واسع
اثاري شغلتهم بس اعلام فقط
بقى الضابط الي عندي رقمه ممتصل عليه وكلت هذا اخر واحد خلي اتصل عليه عسى ولعل يساعدني
واتصلت ومجاوب
وراسلته على الماسنجر وكتبتله مظلوميت الاطفال وهماتين قرا الرساله ومجاوب وره كم يوم صارت عليه ضغوطات هوايه وصادف اني صايم ونفسيتي حيل تعبانه
كلت خلي اتصل عليه بلكت يساعدني واتصلت وياريتني متصلت
جاوب وكال منو كتله العفو ضابط فلان كال ايه كتله اني راسلتك قبل كم يوم وعندي قضيه والظحيه اطفال ومغتصبين كال اي قريت رسالتك شنو رايد كتله اريدك تساعدني والله سمعني كلام فطر كلبي وتندمت لانه اتصلت عليه وكتله ممنون منك مع السلامه
اول مسديته مسحت رقمه من كلشي وعرف ذولي الناس الي عدهم مناصب بس اعلام
والفقير اله الله سبحانه وتعالى
وكلت بيني وبين نفسي ميهموني ذولي اكمل وحدي وخلي شيصير يصير الله سبحانه وتعالى لازم ينصرنه
وراهه قرب موعد المحكمه وسالنه هواي محامين كالو الام تاخذ اطفاله
وجنه متخوفين من هل شي هوايه يعني مراح تجري الامور على خير ومراح اسلم الاطفال لمهم لو مااعرف شنو يصير واحتمال توصل القضيه كاتل ومكتول كلت الدوله الي متاخذ حق الاطفال اني اخذه بمعرفتي
وقرب الموعد ورحنه احنه ال 3المتهمين على كولتهم تعال المتهم ورح المتهم
ودخلنه لقاضي وهيه ويانه بكل صلافه وسالهه القاضي وكلهه انتي شنو شكوتج خلي الكل تسمع الي موجودين لانه جان هواي محامين جالسين بلقاعه
كلتله هيه اني من مات زوجي جنت ساكنه ويه عيالي بقيت وقبل سنه واكثر اجه صبري طبعن تقصدني اني كلتله كتلني ولزمني من شعري وسحلني وخله المسدس براسي وكلي روحي لهلج لا اكتلج والاطفال عوفيهم وكلتله رحت لبيتنه وبلغت بابا بلي صار وبابا راحلهم للبيت وهماتين ظرب بابا وكال لبابا اذا ترجع علينه بعد اموتك خلاص وكلتله كل فتره اروح الهم للبيت واريد اشوف اطفالي يلزمني بلشارع ويكتلني كتله موت
القاضي هنا سالهه كال الهه من يكتلج بلشارع الجوارين يطلون يخلصونج من عنده لو شيسون
تكله الجوارين يخافون من عنده وميطلعون خاف يرميهم لانه صبري يشرب خمر ومخدات وسوابق وعنده سوالف بنات وميخاف لامن بشر ولامن الله
كل هذا الكلام الي تحجيه هيه احنه واكفين ونستمع القاضي كلهه تعالي اقسميلي على الكلام الي حجيته ب القران اجت ومدت ايدهه وقسمت ولا خافت بت الكلب حشاكم
القاظي سال منو بيكم صبري كتله اني باوع عليه وكال خليك ساكت
القاظي سالهه وكللهه انتي تكولين صبري هيج مسوي بيج ويكتلج ويكرهج لازم انتي مسويتله شي ولازم بيج ذنب شنو ذنبج بله
تلكله هيج هوه يكرهني وميحبني كلهه بدون سبب تكله اي كلهه لعد هذا مجنون موصاحي
واني اشوف صبري مامجنون كدامي كلشي مبيه
كلهه زين صبري يكتلج ويطردج وضلمج المفروض تسوين الدعوه عليه هوه بس اخوانه شعليهم تاهمتهم بلقضيه
تكله لانه اخوانه خليت اساميهم
كللهه هذا موجواب شنو الناس عدكم لعبه تتهميهم
اي اتهام لانهم اخوانه
رجع القاضي وجه كلامه النه وسال خلف وكله شنو جوابك على اتهامهه الكم
خلف مثل كل مره ساحب نفسه من كلشي وكل للقاضي اني الي اعرف الاطفال يم صبري بس شكو شصاير منو جاب الاطفال مااعرف
هنا خلف كلامه جذب لانه يعرف التفاصيل كلهه واني مبلغه بكلشي بس ليش جذب مااعرف
القاضي ساله لخلف عندك اضافه كلام كله لا
القاضي سال نضير شنو جوابك على اتهامهه الكم جاوبه وكله اتهامهه باطل وجذب وهيه الي شمرت الاطفال علينه ووره كمر شهر سوت دعوه علينه وقايظونه بفلوس حتى يسقطون الدعوه واحنه مدفعنالهم فلوس وسولفله هواي اشياء وراهه القاضي سالني وكلي شنو ردك على علامهه كتله والله كلامهه كله جذب وهيه الي شمرت الاطفال علينه واخذنه الاطفال وعرفنه همه مرضه وبقيت اراجع بيهم بلمستشفيات ومن عرفو اني اراجع بيهم سوو علينه دعوه حتى ياخذون الاطفال من يمنه بلقانون والقوه حتى منكشف جريمتهه هيه واخوانهه لانه اتضح الاطفال متعرضين لاغتصاب من قبل خوالهم وسولفتله الي صار بختصار والقاظي يسمع
كلي القاضي عندك شي تضيفه كتله سيدي القاضي صارلي سنه بنضرك وبنضر الدوله اني متهم ومجرم على شنو صرت متهم لانه اني عندي غيره على اطفال اخويه اخذتهم من الشارع وربيتهم عندي بلبيت وسترت عليهم من ضلم امهم وخوالهم الي عنده غيره على اطفال اخوه يصير بنضر الدوله مجرم
القاضي سكت وماجاوبني
وكال نتضرو بره للمداوله وصدور قرار الحكم وبقينه ننتضر قرار القاضي وحكمه شنو والانتضار يكتل والقلق موتني

يتبع بارت ال 12من مذكرات متهم
2022/5/8
تعديل اخواني خواتي والله مرات مااكدر انزل بارت لانه ضروفي متسمحلي لو عندي شغل لو مراجعات مستشفى لو دكتور لومحكمه لومركز والمرات نفسيتي صفر تكون وانتم تعرفون اني بنضر الدوله متهم والمتهم شلون تكون نفسيته اعتذر منكم اعرف جاي اقصر وياكم
بس صدكوني الايام الجايه اني والاطفال وعاىلتي محتاجين دعواتكم لانه القضيه على ابواب الحسم بلقرارات ويارب تكون بصالحنه لانه المضلوم لازم ينتصر لانه الله سبحانه وتعاله وياه
ربي يوفقكم