مذكرات متهم

البارت العاشر

السلام عليكم
البارت العاشر من مذكرات متهم
اعتذر عن التاخير. انتم تعرفون الضروف الي جاي امر بيهه

بقينه ننتضر تقرير الطب العدلي وهوا الي يثبت مظلوميه الاطفال وكل اسبوع اراجع مركز الشرطه واشوف التقرير وصلهم لو لا والانتظار دمر نفسيتي وقلق ومخاوف والي خوفني اكثر الشرطه الي بلمركز كالولي التقرير ميجي بصالحك لانه احنه مايوم دزينه هيج حاله واجه تقرير صحيح يجي تقرير مبهم وغير واضح لانه يخافون ينطون نتيجه وميردون يتحملون مسؤولية لجنه الاطباء
ودام انتظار اكثر من 50يوم وبعد انتظار اجت النتيجه وتكول #لا توجد اثار اغتصاب قدميه او حديثه عند اجراء الفحص....ويكمل التقرير ويكول  #ونحن لاننفي لوجود فعل الاغتصاب لانه الفاعل كان يستخدم مواد دهنيه او مزلقات ونرجو من حظراتكم التحقيق في ذلك
يعني صدك تقرير مبهم والكاتبه ماعنده مخافت الله عز وجل يعني ينفي وماينفي بنفس الوقت صعد التقرير للقاضي واني دخلت للقاضي وكتله سيدي التقرير مبهم وممنطي اجابه واضحه واريد اعيد الفحص للجنه ثانيه عسى ولعل تنصفنه والقاضي وافق على طلبي وهماتين اخذنه الاطفال ورحنه للطب العدلي وهنا اني دخلت على الجنه الاوله ولكيت دكتور حيدر وحجيت ويا بعصبيه هوه والجنه مالته وكتله انته تخاف من انسان ومتخاف الله عز وجل
والتقارير العندي صادره من مدينه الطب ومن مستشفى ثاني وتقارير مصدقه من اطباء معروفين وكبار يعني انته تفتهم وذولي ميفتهمون والاطباء الي موقعه على التقارير انته ماتعرفهم كال اي اعرفهم واطباء كبار
كتله بضميرك الاطفال عدهم توسع بلمخرج لو لا كالي اي عدهم كتله لعد ليش مكتبت التقرير بضمير وذولي ايتام ومتعرضين لظلم وهذا الطفل الجبير عنده نزيف دم مشفته وليش مكتبت هيج شي بتقريرك
كالي الصدك هيج امور مو مسؤلياتنا مسؤلية قاضي التحقيق هوه الي يقرر بيهه واني كتبتلك بلتقرير نحن لا ننفي وجود فعل والفاعل كان يستخدم مواد مزلقه
كتله ولا تنسه انته نافي الفعل بل اول
كالي احنه حالات الاغتصاب نكدر نكشفهه باول 48ساعه فقط المهم تعاركت وياه والي فهمته اكو ناس هوايه ضالميهم بالتقارير وممنطين نتيجه صحيحه والي عرفته من دكتوره هيه الي كلتلي احنه مبلغين انو هيج امور مننطي تقرير صحيح تجنب المساىله والمشاكل
كتلهه الله ليوفقكم
نفس اليوم حولوني على لجنه ثانيه ودخلت للجنه وكان الدكتور رجال جبير بلعمر وشرحتله كلشي وشاف التقارير مالتي وكلي بابا لتخاف حق الاطفال ميضيع وكلي راح نفحصهم احنه هسه وهماتين دخلو الاطفال واحد واحد وسوال وجواب
وبل اخير طلع الدكتور وكالي بابا راح نحولك على لجنه بمدينه الطب عدهم اجهزه مختصه بهيج امور اكثر من يمنه تعال باجر ننطيك كتاب وروحلهم كتله ماشي دكتور رجعنه للبيت
وثاني يوم رحنه اني والاطفال واخذنه والكتاب وويانه شرطي ورحنه لمدينه الطب
من انطيناهم الكتاب وفتحوه هنا الصدمه الجبيره عرفت الكتاب معنون الي لجنه اطباء الجلديه وشنو الربط بين الجلديه والاغتصاب ماكو اي ربط بيناتهم
رحت للاطباء وربي يوفقهم استقبلوه استقبال جيد وهماتين دخلنه بغرفه واتذكر والله مسؤول الجنه كلي بابا تريد الصراحه هيج امور احنه ماالنه بيهه علاقه بس همه حولوك يمنه يردون يهربون من المسوليه
ويردون يذبون المسؤوليه علينه صدكني
وهماتين كالي خلي نفحص الاطفال واشوف بعيونهم حجي وكامو يحجون بيناتهم بل انكليزي
ووحده من الدكتورات كامت تكول وتردد حسبي الله ونعم الوكيل
شنو ذنب الاطفال ذولي يعني من خلال الفحص عرفو الاطفال مغتصبين
وهماتي دز عليه الدكتور وكالي بابا هاي مسؤوليه جبيره علينه
والصراحه الي اكدر اساعدك بيه راح اكتب التقرير والقاضي المفروض يفهمه
وكتب بلتقرير لاتوجد امراض بلوقت الحالي
يعني الي شفته بل اطباء خوف وجبن وميتحملون المسؤوليه ومينطون تقرير صحيح ابد
والي شفته باالطب العدلي كوارث وناس هوايه جايه بنفس مشكلتنه كبار واصغار يعني عالم ثاني وعالم قاسي وسمعت سوالف وقصص. هناكه الشيطان وابليس يخجل من عدهه
المهم رجعنه للبيت وانتضرنه التقرير يجي للمركز عن طريق البريد بصوره رسميه
وبقينه ننتظر لا حول ولا قوه
بيوم واني بلبيت اجاني شخص قريب عليه والي عرفتنه من كلامه اهل زوجه اخويه المرحوم همه الي دازينه ويريد يوصلي رساله من عدهم وكلي اخويه عوف قضيتك والاطفال امهم تاخذهم واني خايف عليك انته صاحب بنات واخاف تطلع من بيتك ويصير عليك شي لا سامح الله وذولي الناس ميخافون الله
كتله كول هذا تهديد ولا تستحي ولا تخاف احجي الي بكلبك كال اي اخاف عليك تنكتل
والله اني ضحكت وكتله شوف همه يعرفوني ويعرفون اني منو وشنو والله اذا فكرو بهيج امر كللهم صبري يكول اترس بيكم الزباله والي بي خير خلي يجي هلا بيه والروح بس الله ياخذهه
واني قررت قرار هايه القضيه لو تخلصني لو اني اخلصهه واخذ حق الاطفال واحكم خوالهم واذبهم سجن وماكو لاتراجع ولا تنازل
اتصلت بعمي وكلتله تعالي للبيت واجاني وسولفتله كل الي صار من احداث وكتله اقسم عليك بلقران الموضوع بيناتنه لانه اخاف على سمعت الاطفال
خاف السالفه تنشر ويتعيرون بيهه للكبر
قسملي وكال اني وياك بكلشي عمي رجع لبيته وعرفت انه من صدمت الكلام الي سمعه متمرض ونايم بلفراش لانه ماتحمل الموقف وحال الاطفال الي همه بيه
والصراحه احجيلكم اخذنه قرار اذا الدوله متاخذ حق الاطفال ناخذنه احنه بلقوه وبلدم
وره كم يوم اجاني تبليغ للحظور للمحكمه اني واخواني امام القاض على الدعوه الي هيه قايمته علينه
واتصل بلمحامي مالتي الاول ح وميجاوب ابد
ورحنه للمحكمه اني ونضير اخويه وخلف جان بدوامه ماحظر
دخلنه للقاضي والقاضي اجل الدعوه وانطه امر القاء قبض بخلف لانه ماحاظر ويانه
وتاجلت المرافعه شهر
وراهه اجه تقرير الفحص مال اطفال هماتين مو مقنع جواب مبهم
وهنا القاضي طلب امهم ياخذ افادتهه وكال اريد اعرف من عدهه هواي امور يمكن انته ادعائك كاذب عليهم ويمكن كلامك صحيح والتقرير مالت الطب العدلي ظلمكم
اني ظاكت الدنيه بيه وكلت امهم من تجي للقاظي شنو اتكله صدك اخواني مغتصبين اطفالي اكيد راح تنكر
بس صدك بعد العسر يسر والحق لازم يضهر
دزينه تبليغ لامهم وحظرت للمركز وانطت افادتهه يم ظابط التحقيق وثاني يوم
حظرت امام القاضي وجانت افادتهه تكول بان كلامي جذب وهايه تهمه باطله والتقارير الي اني مقدمهه مزوره واني كاتلهه وطاردها من بيتنه واريد من ابوهه فلوس
ملاحظه كلامه اتذكرو لانه بعد شهر راح تنطي غير افاده
القاضي طلب يتاكد من صحت التقارير الي اني قدمتهه للمحكمه
وطلب حظور مدير المستشفى حتى يساله عن التقارير
وبعد معانات وتباليغ حظر مدير المستشفى
وساله القاضي التقارير صحيح صادره من المستشفى مالتكم لو مزوره الدكتور كله صحيح صادره من عدنه واصوليه
القاضي كله وشنو معلوماتك عن الاطفال الدكتور كله مااعرف مااعرف عنهم شي لانه اني مو الي جاي اشرف على علاجهم الي جاي يشرف على علاجهم دكتور ب
القاضي ساله كله ودكتور ب شنو معرفتك بيه الدكتور كله دكتور جيد وفاهم
طلع المدير من القاضي والقاضي طلب
الدكتور المعالج للاطفال يستفسر من عنده بعد كم يوم
حظر الدكتور ودخل للقاضي والقاضي ساله على الاطفال شبيهم وشنو يشكون
الدكتور سولفله على كل امراضهم وكله صارلهم سنه ونص يتعالجون يمنه وعلاجهم يحتاج وقت طويل ياله يتم الشفاء القاضي سال الدكتور شلون عرفت الاطفال متعرضين لاغتصاب الدكتور جاوبه وكله اني دكتور وجراح وهيج امور درسنه عليهه ونعرف حالات الاغتصاب اكو لو لا
وشي ثاني كل الفحوصات والتحاليل بينت اكو اغتصاب وشي ثالث اني حجيت ويه الاطفال والاطفال حجولي شلون جان يتم اغتصابهم واحنه عدنه بالطب كلام الطفل ناخذ بيه لانه هوه يعرف حالته اكثر والاهم من هذا الامراض الي بيهم دليل على غتصابهم
القاضي سال الدكتور وكله ليش الطب العدلي ماانطه اجابه صريحه
الدكتور جاوبه كله لسببين الاول انتم دزيتوهم متاخر للفحص واحنه صارلنه سنه او اكثر نعالج بيهم والاطفال جاي نشوف حالتهم يستجابون للعلاج
والثاني الطب العدلي مينطي جواب صريح يخافون من المسؤليه
طلع الدكتور والقاضي طلب الاطفال يسمع شكوتهم اني كلت الحمد لله الحقيقه بقت تاخذ مجراهه
اخذت الاطفال للمحكمه بعد كم يوم حتى القاضي يسمع كلامهم ودخلو للمحقق القضائي يدون كلامهم واعتبروهم همه اصحاب الدعوه والمطالبين بحقهم وراهه القاضي طلب الاطفال واحد واحد يسمعلهم وطول ويه كل طفل اكثر من نص ساعه وكمل الاستجواب وصاحولي انطوني جناسي الاطفال واتذكر حجايتهم كلولي الله يساعد كلبك هايه مو بس دعوه هايه بلوه
وهمه بحكم عملهم والي شايفينه من قضايه سولفولي احداث الي فتهموهه من كلام الاطفال هيه صدك صايره ويه الاطفال بس اني محجيتهه بلدعوه لانه موكل مايعرف يقال
والي عرفته من الاطفال بعدين
رجعنه للبيت
وقرب موعد دعوه امهم الي مسويتهه علينه وجنه خايفين لا القاضي يحكملهه بحضانت الاطفال وتاخذ الاطفال وبهل حاله اني مااكدر اثبت الدعوه مالتي عليهم واخسرهه
هنا اتصل بيه المحامي الاول وكلي باجر لترحون للمحكمه اني اجلت المرافعه واكدت عليه اكثر من اتصال وكلي والله اجلتهه
وثاني يوم الي جان هوه موعد المرافعه بلمحكمه مارحنه واتصلت عليه الصبح وكتله شصار كلي مو كتلك اجلت المرافعه
وره ربع ساعه اتصل عليه الشرطي الي يداوم بلمحكمه وكلي ليش اليوم محظرتو للمرافعه خصمكم حظر امام القاضي وانتم  ماحظرتو والقاضي صدر امر القاء قبض عليكم تلاثتكم كلتله المحامي اجلها اتصل بيه وكال اجلتها لا ترحون كال لا جاي المحامي للمحكمه ولا مأجلها ولا واصل اصلا
وصدر امر القاء قبض عليكم
والمشكله هنا العنوان الي منطي بس عنوان بيتي واخواني محد منطي عنوانه
يعني اني الي حروح بيهه والي عرفته الخصم مالتي دافع للمحامي مالتي فلوس وصاير يشتغل ضدي وينطيهم كل المعلومات وايقنت انو القضيه اني خاسرهه والاطفال حتاخذهم امهم

يتبع بارت 11من مذكرات متهم
2022/5/6
تعديل ام الاطفال مسويه علينه دعوه بمحكمه ومركز شرطه
واني هماتين سويت عليهه هيه واخوانهه دعوه بلمحكمه ومركز شرطه
بس بغير مكان لانه كل مشتكي القاضي مالته غير على حسب سكنه وحسب المحكمه اليمه