အကန့်အသတ် ပိုင်ဆိုင်မှု

၆ ။

[Unicode]

(၁၀) ထိုအခါမှသာလျှင် သူတို့ကွာရှင်းပြီးမှန်း သတိရ

ယခုတ​လော ထုယန် အိပ်မက်များမကြာခဏမက်နေပြီး ​ကောင်း​ကောင်းမအိပ်ရ​ပေ။

အစတုန်းက ဟိုတစ်စဒီတစ်စ အပိုင်းအစများသာဖြစ်သည်။ ငယ်ဘဝ၊ ကျောင်းတက်သည့်​နေ့ရက်များနှင့် လုပ်ငန်းခွင်ထဲစစဝင်ချိန်ပင်ပါဝင်၏။ အများစုက အရိပ်ပုံသဏ္ဍာန်များဖြစ်ကာ ဇာတ်လမ်းတစ်ပုဒ်လုံးအဖြစ်​ပေါင်းစပ်ပုံဖော်၍ မရနိုင်​ပေ။

သို့​သော်ငြား ညဥ့်ယံဒုတိယပိုင်းတွင် ပုံရိပ်များပို၍ရှင်းလင်းလာပြီး ပြင်းထန်​သော​နောက်ခံသီချင်းသည်လည်း တဖြည်းဖြည်း​နှေးသွားသည်။ ကုချန်းပိုင်နှင့်သူသာ စင်မြင့်​ပေါ်တွင်ကျန်ရစ်ခဲ့သည့် နှစ်ဦးတည်း​သောလူဖြစ်သည်။ ကုချန်းပိုင်သည် သူ့ဆီ​လျှောက်လာကာ သူ့သံလမ်းလျှောက်တုတ်က မြေကြီး​ပေါ်​ခေါက်နေပြီး ကြည်လင်​သော်ငြား နားမစူးသည့်အသံလွှင့်ထုတ်​နေ၏။ သူအင်မတန် ဖြေးညှင်း တည်ငြိမ်စွာ​လျှောက်လာသည်မှာ ရှု့​ထောင့်များ၏အ​ခြေခံသ​ဘောတရားကိုဖမ်းစားထားသောမြင်ကွင်းကျယ်ရိုက်ချက်အား အသုံးပြုထားသည့်အတိုင်းပင်။ အအလင်း၊ အရိပ်နှင့် နက်နဲမှုသည်အ​နေ​တော်​ဖြစ်၏။

ဒုတိယညတွင်တော့ ‌ကုချန်းပိုင်နှင့် ပထမဆုံး​တွေ့ဆုံသည့်အ​ကြောင်းကို အိပ်မက်မက်ခဲ့၏။

ကွမ်းနန်ပြောခဲ့ဖူးသည့် “ထု​​ဖေးဟုန်တစ်​ယောက် နှပ်​ချေးများ မျက်ရည်များနှင့်​တောင်းပန်​နေသည်“ ဆိုသော အရင်အိမ်​ထောင်တွဲဖက်ဇာတ်လမ်းတွင် ထိုအချိန်က ကုချန်းပိုင်​သည် ပပေါ်ပင်ပေါ်မလာခဲ့ချေ။ ထုယန်လည်းသူနှင့်ပတ်သက်ပြီးစိတ်မဝင်စားသလို ​ပေါ်လာမ​ပေါ်လာလည်း ဂရုမစိုက်​ပေ။

သူတို့​လေး​လေးနက်နက်​တွေ့ခဲ့သည့် ပထမဆုံးအချိန်သည် လက်ထပ်မှတ်ပုံတင်မယူခင် တစ်ရက်ဖြစ်သည်။ ထု​ဖေးဟုန်နှင့် ဟွားရှန့်၏ဒါရိုက်တာ ကုချန်းပိုင်၏ အစ်ကိုလည်းဖြစ်သည့် ကု​ချောင်ချန်တို့က သ​ဘောတူညီချက်ကို အရင်လက်မှတ်ထိုးခဲ့ကြသည်။ ပိုက်ဆံက ထု​ဖေးဟုန် အ​ကောင့်ထဲ မြန်ဆန်စွာဝင်လာချိန် ထုဖေးဟုန်သည် ပြုံးကာ​ခေါင်းညိမ့်ပြီး ထုယန်အားလာကြိုရန် ကုမိသားစုမှတစ်​ယောက်​ယောက်အား​စေလွှတ်ခဲ့သည်။ ကုမိသားစု၏ကားသည်အ​ရှေ့ဘက်တွင်ဖြစ်ပြီး အထုတ်အပိုးများသယ်ရန်အသုံးပြုသည့် ထရပ်ကားက​နောက်မှလိုက်လာသည်။ အိမ်ခြံဝင်းထဲ​ဖြေးညင်းစွာဝင်လာချိန် ထုယန်ပြတင်း​ပေါက်​ဘေးတွင်ရပ်ကြည့်ရင်း ​အေးစက်က်စွာ​တွေးခဲ့သည်။
"လူ၈​ယောက်လာကြိုတဲ့ မင်္ဂလာ​ဝေါယာဥ်နဲ့တူလိုက်တာ၊ ဟာသပဲ"