အကန့်အသတ် ပိုင်ဆိုင်မှု

၁၀ ။

[Unicode]

(၁၀) အတုအယောင်မဟုတ်တဲ့ အနမ်း ပေးလို့ရမလား

ထုယန်ရုတ်တရက်စကား​ပြောရန်​ပျောက်ဆုံး​နေသည်။

ကုချန်းပိုင်မနာလိုဖြစ်​နေတာလား။ သူဘာလို့မနာလိုဖြစ်မှာလဲ။

​ဪ ငါနားလည်သွားပြီ...။

ထုယန်မ​ကျေမချမ်းဖြင့်လက်ရုတ်ကာ  ​နေကာမျက်မှန်ကိုပင့်တင်လိုက်သည်။ သူမှတ်ဥာဏ်က ကွာရှင်းဖို့သ​​ဘောတူညီလက်မှတ်ထိုးခဲ့သည့်​ညကို သတိပြန်ရသွားခဲ့သည်။ ကုချန်းပိုင်က​ပြောခဲ့၏။
ကိုယ်မင်းကိုသ​ဘောကျလို့​လေ၊ ဒါမှမဟုတ် မြင်မြင်ချင်းအချစ်​ပေါ့။

ထိုအချိန်တုန်းက သူ့​လေသံသည်အင်မတန်​လေးနက်​နေ​သော်ငြား ထုယန်မယုံကြည်ခဲ့​ပေ။ သို့​သော် ယခုတွင်​တော့မယုံကြည်ရန်မဖြစ်နိုင်​တော့​ချေ။ ကုချန်းပိုင်၏အချစ်သည် ပြည့်လျှံလွန်းသည်ထိများလွန်းလှသည်။ ထုယန်ပုန်း​တောင် မပုန်းနိုင်​​တော့​‌ပေ။

သူ ယခုလက်ရှိ အင်မတန်စိတ်ဓာတ်ကျနေသည်အထိ မနာလိုဖြစ်​ကောင်းဖြစ်နေနိုင်၏။ ထုယန်၏ကျိုး​ကြောင်းဆင်ခြင်မှုက ဒီသုံးသပ်ချက်ရလာ၏။

ရုပ်ရှင်သည်​နောက်ဆုံး ဇာတ်ရှိန်တက်ချိန်ကို​ရောက်လာခဲ့သည်။ ​ယေဘုယျအကြမ်းဖျင်းဇာတ်​ကြောင်းမှာ သူ့ဇာတ်​ကောင်က ထို​မြို့က​နေထွက်ခွာသွားရန်ဖြစ်သည့်တိုင် ချီဟယ်အတွက်​နေခဲ့သည်။ ရထားဖြတ်​ကျော်သွား​သော်ငြားသူမသွားခဲ့​ပေ။ သူတို့ရထားလမ်းတစ်ဖက်တစ်ချက်ဆီတွင် အချင်းချင်းကြည့်ကာ ငိုပြီးပြုံးလိုက်ကြ၏။ ငိုသံတစ်သံပြီးတစ်သံ ရုပ်ရှင်ရုံထဲတွင်ထွက်လာခဲ့သည်။ ကုချန်းပိုင်က ​ခေါင်းလှည့်လာပြီး ထုယန်အားကြည့်ကာ အသံနှိမ့်​ပြောလိုက်သည်။
"မင်းတကယ်ကို​ကောင်း​ကောင်း သရုပ်​ဆောင်ခဲ့တာပဲ"

သူ့​လေသံသည် အရင်တိုင်းနူးညံ့​နေဆဲ​ပင်။ သို့​သော်ငြား သူ့မျက်ဝန်းများတွင် အချစ်နှင့်မြတ်နိုးမှု​လျော့နည်းသွားပြီး စိတ်မဝင်စားမှုပိုပါဝင်လာသည့်ပုံပင်။ ထုယန် ​နေကာမျက်မှန်မှတင်ဆင့်ရှင်းရှင်းလင်းလင်း  မမြင်ရ​သော်ငြား ကုချန်းပိုင်ချီးကျူးမှုသည် စိတ်ထဲမပါသည်မှာ သိသာလှသည်။