Du-AL [A/B/O]

Epi--1

_Uni_

   လက်ရှိ သူ့ ခန္ဓာကိုယ်ရဲ့ တည်ရှိမှုက ခြေလေးချောင်းပေါ်မှာ။ အုပ်မိုးထားသည့် အုံ့အုံ့ဆိုင်းဆိုင်းသစ်ပင်ကြီးတွေကြောင့် မွန်းတည့်နေရောင်ခြည်ကပင် နေပြောက်ကလေးများအသွင်ဖြင့်သာ မြေပေါ်သို့ ခပ်ကျဲကျဲ ဖြာကျနေရသည်။

နှလုံးသားထဲမှ တစိမ့်စိမ့်တက်လာသည့် ပျော်ရွှင်မှုက သူ့တစ်ကိုယ်လုံးကို စီးဆင်းနေသည်။ ခြေလက်တွေဆီကို ပိုပြီး အားထည့်လိုက်တော့ ဘေးမှာ သစ်ပင်တွေဆိုတာ အလျင်အမြန်ပဲ သူ့ နောက်ကျန်ခဲ့ကြသည်။

အခုချိန် သူ့တစ်ကိုယ်လုံးက တဖိတ်ဖိတ်တောက်နေသော နက်စွေးစွေးအ‌မွေးတွေဖြင့် ဖုံးနေ၏။ လေကိုခွင်း‌နေသည့် အရှိန်ကများလွန်းတာမို့ သူက လေးညှို့မှပစ်လွှတ်လိုက်သည့် မြားတစ်စင်းလို မြင်ကွင်းထဲမှာ ရိပ်ကနဲသာ။

  ရေစီးသံသဲ့သဲ့က သူ့ နားစည်တွင်းသို့ လာရိုက်ခတ်သည်။ မဝေးလှသော နေရာတစ်ခုတွင် ချောင်းတစ်ခု ရှိလိမ့်မည်။ ထိုနေရာကို သူက အချိန်တစ်ခုတွင်း ရောက်သွားတော့မည်။

   ပိုပြီးကျယ်လာသော ရေစီးသံနှင့်အတူ မြင်ကွင်းထဲ ဝင်လာသည်က စမ်းချောင်းလေး။ တဖြည်းဖြည်းနီးလာသည်နှင့် ကြည်လင်နေသော ရေများကိုပင် မြင်နေရသယောင်။

"အူ......"

သူ ခေါင်းကို မိုးပေါ်မော့ရင်း ဝမ်းသာအားရ အသံဟစ်လိုက်ရင်း ရှိသမျှသော အားတွေကို နောက်ခြေနှစ်ချောင်းမှာ စုလို့ အားပါးတရ ခုန်ပစ်လိုက်သည်။ ကြည်လင်နေသော စမ်းချောင်းလေးထဲမှာ သူ့ရဲ့ ဝဲပျံနေသည့် ခန္ဓာကိုယ်သဏ္ဍာန်က ထင်ဟပ်သွားပြီး သူ့ကိုယ်က စမ်းချောင်း၏ အခြားတစ်ဖက်သို့ ပေါ့ပါးစွာ ကျရောက်သွားသည်။

"ဝူး ဝူး ဝူး"

တကယ်က သူစိတ်ထဲမှာ ဝမ်းသာအားရ ရယ်မောပစ်လိုက်ခြင်းဖြစ်သည်။ သို့ရာတွင် အသံက ထိုသို့သာ ထွက်လာ၏။ အဘယ်ကြောင့်ဆိုရသော် ယခုအချိန်တွင် သူသည် ဝံပုလွေတစ်ကောင်အသွင်ဖြင့်ဖြစ်၍။