Du-AL [A/B/O]

Ep-- 18

အရှေ့ဘက်မျိုးနွယ်စု လေ့ကျင့်ရေးကွင်းတွင် ဖြစ်သည်။

Beta နဲ့ Alpha ကို သီးခြားခွဲကာ လေ့ကျင့်စေသော်လည်း ဂျောင်ကုနဲ့ ဆိုးလ် နှစ်ယောက်အတူလေ့ကျင့်ကြသည်က ခြွင်းချက်ဖြစ်သည်။ ဆိုးလ်က ဒီနေ့မှ ပုံမှန်ထက်ပိုကာ အားလျော့နေပုံပေါ်သည်။ သာမန်တိုက်ကွက်တွေကိုပင် မရှောင်ရှားနိုင်နေသည်မို့ သူသတိထားမိလာပြီ ဖြစ်သည်။ အရှိန်နဲ့ အပြေးလာနေသည့် ဆိုးလ်ကို ရင်ဘတ်ဆီသို့ ခြေကန်ချက်တစ်ခု ပစ်သွင်းလိုက်သည်။ ချက်ကောင်းထိမိသွားသလို မြေကြီးပေါ် ဘုန်းကနဲ လဲကျသူကြောင့် ဂျောင်ကုမှာ အမြန်ပြေးထူရသည်။

"ဆိုးလ် ဆိုးလ်။"

တစ်ကိုယ်လုံး ခြစ်ခြစ်တောက်ပူနေသည်မို့ ဆေးဆရာဆီ အမြန်ခေါ်သွားပေးရသည်။ ဆေးဆရာက စစ်ဆေးကြည့်မှ ဆိုးလ်ကိုယ်ပေါ်မှာ အညိုအမည်းရာတွေချည်း။ လူ့သွေးတစ်ဝက်ပါသည့် ဆိုးလ်မှာ တချို့အရာတွေက လူသားတွေအတိုင်းပဲ အားပျော့ပါသည်။ မိုးရေတွေ စိုရွှဲပြီး ပြန်လာတဲ့ ဆိုးလ်ကို ညက တွေ့လိုက်ရကတည်းက သူသိသင့်တာ။

"ဆော့ဂျင်"

ဂျောင်ကု၏ စိတ်ချင်းဆက်သွယ်မှုကို ရလိုက်သည့် ဆော့ဂျင်သည် စာအုပ်ကို ဖတ်နေရာမှ ပိတ်လိုက်သည်။

"အင်း ဂျောင်ကု ပြော"

"‌ဆေးဆရာကြီးအိမ်ကို အမြန်လာ။ ဆိုးလ်သတိရလာပြီ။"

အမြန်ထလိုက်ရင်း အိပ်ရာဆီ အကြည့်ရောက်မိမှ နေမြင့်နေသည့်တိုင် အိပ်ရာက မထသေးသည့် ကင်မ်ရှင်းကို ဆော့ဂျင်တစ်ယောက် စိတ်မရှည်စွာ ဖနောင့်ဖြင့် ပေါက်လိုက်သည်။ ပန်းနှင့် ပေါက်ဘိသကဲ့သို့ တစ်ဖက်သို့လှည့်ကာ လူးလွန့်သွားသည့်အတွက် နောက်တစ်ချက်ထပ်ပေါက်လိုက်သည်။

"ဆိုးလ်က သေအောင်ဖျားနေပြီး ဒင်းက သေအောင် အိပ်နေတယ်။ မြို့တက်သွားပြီး ဘာတွေဖြစ်လာလဲ မေးရမလားမှတ်ပါတယ်။ ကာလနဂါးက အဘခေါ်ရတော့မယ်။"

ဆော့ဂျင် ရှင်းကို မကျေနပ်စွာ ပွစိပွစိပြောရင်း ဆေးဆရာအိမ်ဆီ အမြန်သွားရသည်။

"ဆော့ဂျင်"

ယခုတစ်ခါ ဆက်သွယ်လာသည်က ကင်မ်မျိုးနွယ်စုအကြီးအကဲ သူ့ဖခင် ဖြစ်သည်။ ဒီနေ့ သူ့ကို လိုအပ်သူတွေ များနေသည်။