_هتفضلي تعيطي كدا كتير من غير ما افهم في ايه...
_مسحت دموعي بضهر ايدي وبصيتلها بقهر: عَزل يا مي..
_مين دا اللِ عَزل وانتي مموته نفسك عليه دا.. ثواني كدا انتي قاصدك علي..آسر ..
_لقيت دموعي تلقائي بتدمع لوحدها كل ما تيجي كلمه عَزل ومعتش هشوفه تاني : ايوا يمي ايواا...
اخدتني في حضنها وانا قعدت اعيط كتير زي ما يكون ام وفقدت ابنها.. مي قعدت تطبطب عليا وتهديني وتقرأ قرأن.. لحد ما هديت شويه وفضلت ساكته..
_مش انتي رفضتي حُبه.. زعلانه لي دلوقتي اهو مشي ومعتش هتشوفيه تاني..
_بعدت عنها وبصيتلها ورجعت دموعي في عيني تاني: ايوا رفضت حبه لان حرام انه يقولي انه بيحبني.. وكمان انا لسه مخلصتش دراستي وبابا عمره ما هيوافق اني اتخطب دلوقتي.. وهو كان عاوز اني ارتبط بيه وادخل في علاقه محرمه.. وانا اغضب ربنا عشانه لي... لأ انا بحب ربنا اكتر ما بحبه.. وهو لو نصيبي ربنا هيصلحه وهيكون حلالي.. انا متأكده..
_طب بتعيطي ليه دلوقتي..
_عشان بحبه يا مي.. حتي لو رفضت حبه وهزأته ومسحت بكرامته الارض قدامك.. بس بحبه معرفش ازاي وامتي وفين بس والله بحبه.. وربنا شاهد علي اللي في قلبي بس دا مش بإيدي اني احبه واتعلق بطيفه وهو نازل او طالع او عدي من جمبي مع اني والله كنت بغض بصري علطول اول ما اشوفه او يكون في نفس المكان اللي موجوده فيه بس ان ازاي قلبي يقع في حب حد كدا وانا قافله عليه من سنين معرفش ازاي... ان يومي يعدي من غير ما المح طيفه كدا او احس بوجوده حوليا دي فكره بتقتلني والحقيقه المره انه بقي واقع وان فعلا ايامي هتعدي من غيره...
_طب اهدي وسيبي كل حاجه علي ربنا وصدقيني هيجبر بخاطرك...
_يااارب يامي يااارب...
خرجنا من المسجد بتاع الكليه بعد ما غسلت وشي وعدلت خماري ومي ركبت وروحت وانا كمان لان طريقنا مش مع بعض كل واحده في طريق.. مي دي صديقتي الوحيده واكتر من اختي كمان استحملت معايا كتير وهي اللي بتقويني علي اي مشكله في حياتي.. انا في اخر سنه ليا في كليه طب بشري ومي من نفس دفعتي اتعرفنا علي بعض في اول سنه ليا في الكليه.. عايشه مع بابا هو اللِ ليا في الدنيا امي اتوفت بعد ما ولدتني علطول وبابا بقت حياته ليا انا وبس وفضل علي ذكري ماما بقيت عمره.. آسر دا جاري في الشقه اللِ قصادنا.. بقاله سبع سنين ساكن قصادنا وزي ما عرفتوا اللِ حصل طبعا.. انا بفضل الله مختمره وكل حلمي افرح بابا بتخرجي وزوج صالح ياخد بايدي للجنه...
وصلت البيت وفتحت براحه خالص لاني اصلا مهدوده من العياط ودماغي هتنفجر من الصداع... دخلت الشقه وكانت هاديه خالص وقفلت الباب وببص ملقتش حد في الصاله استغربت جدا روحت علي المطبخ بردوا مفيش حد ولسه هتدير عشان اشوف بابا فين اتسمرت مكاني لما سمعت صوت مرعب وجهوري جي من ورايا وبيقول...
