- خايفة أوي، زهقت من نفسي ومن اللي بعمله.
- إهدي يا رنا، بإذن الله في حل.
- معتش في حل، أنا معتش فيا فايده، مبتعظش.
- طب اسكتي، الأستاذة جاية.
كنت داخلة الحلقة بتاعتي وسمعت بنتين منهم قاعدين جمب الباب بعيد عن الباقي وبيتكلموا، مكنش قاصدي إني اتصنت عليهم لكن أخدت بالي إن الموضوع كبير، عملت نفسي مسمعتش حاجة ودخلت.
- السلام عليكم ورحمة الله وبركاته، عساكم بخير.
ردوا السلام.
- رنا، خلود تعالو قدامي هنا.
بصوا لبعض ورنا كان باين عليها اليأس والإحباط جدًا، أخدوا كراسيهم وقعدوا قدامي.
- الحلقة اللي فاتت أخدنا تجويد، مشينا على الجدول صح ولا أخدتوه كروته.
حطوا جداولهم قدامي ورجعوا مكانهم، عَشر بنات قدامي زي الورد بجد، الله يديمهم.
- عبير جدولك احسن من الأسبوع اللي فات اللهم بارك، حسناء شدي على نفسك شوية إنتِ قدها، عُلا تقدري توفقي بين الدراسة والقرآن أنا واثقة فيكِ متتعذريش لنفسك، رنا...
كنت بشوف الجداول وأفرق بين مستوى كل واحدة الأسبوع ده من اللي فات، مبقارنش بينهم، دايمًا بخليهم يقارنوا نفسهم بنفسهم، جيت على جدول رنا وسكت شوية.
- خلود اللهم بارك أحسن من الأول.
- مقولتيش حاجة على جدول رنا يا أستاذة.
- مقولتش على جدول رنا مش جدولك يبقى خلصت يا خلود.
بصت في الأرض ورنا كانت من قبلها- أسفة يا أستاذة.
- زي ما اتعودنا كل حلقة التسميع في الأخر، المفروض النهاردة يبقي فقة، بس خليه يوم فري ونتناقش في موضوع عام.
كل واحدة رتبت حاجاتها على جمب وبصولي بإنتباه.
- التوبة.
رنا كانت بصه في الأرض فرفعت عيونها ليا.
- نتناقش في التوبة، حد يعرف يعني إي توبة؟
عُلا- يعني الرجوع إلى الله صح؟
- أحسنتي، بس قبل ما أتكلم عنها خلونا نعرف إن الأصل في الإنسان الخطأ، إنه بيذنب، كلنا أصحاب ذنوب، النبي صلِّ الله عليه وسلم قال "كل ابن آدم خطَاء وخير الخطائين التوابين" وقال صلِّ الله عليه وسلم " والذي نفسي بيده لو لم تذنبوا لذهب الله بكم ولجاء بقومٍ غيركم يذنبون فيستغفرون الله فيغفر لهم" وقال أيضًا عليه افضل الصلاة والسلام " ما من عبدٍ مؤمنٍ إلا وله ذنبٌ يعتاده الفينة بعد الفينة إن المؤمن خُلق مفتنًا توابا" يعني ليه ذنب كل شوية يقع فيه، إن المؤمن خُلق مفتنًا توابًا نسيًا إذا ذُكِرا ذَكر، الااه أومال الناس الكويسة الحلوين اللي ربنا بيحبهم مش المفروض إنهم يكونوا مبيعملوش ذنوب؟ لو إنتِ فاهمة كده فإنتِ غلط..
رنا قاطعتني- إزاي يا أستاذة يعني حتى الشيوخ والدُعاه بيذنبوا.
ضحكت- هو الشيوخ والدُعاه بني آدمين ولا ملائكة يا رنا.
- بني آدمين.
- والرسول صلِّ الله عليه وسلم قال إيه في الحديث اللي لسه قايلاه من شوية، كل بني آدم، يعني كلهم مفيش استثنا، إلا الأنبياء طبعًا، يبقى مفيش حد مبيعصيش كلنا بنعصي، لكن الفرق ما بين واحد قريب من ربنا وواحد تاني منفض ومكبر إنه اللي بيحب ربنا مجتهد جدًا في التوبة وترك الذنوب وبيحاول على قد ما يقدر ويعُض كده على نفسه إن أنا يارب مش هقع تاني فيقع غصب عنه فيتوب فيقع غصب عنه فيتوب إنما التاني مكبر دماغه ماشي كده يذنب وهو مش عايز لا يتوب ولا هيَّ فارقة معاه، فا أهم حاجة إن إنت تكون ناوي على التوبة.
خلود إتكلمت- طب يا أستاذة اللي بيعمل ذنوب متكررة ومش عارف يتخلص منها.
- التعامل العملي مع الذنب، مش التعامل المشاعري مع الذنب ولا التعامل النفسي مع الذنب، إن إنتِ عملتي ذنب فا أنا ضايعة وبتاع، مفيش الكلام ده في الدين، يا إما نفسيتك الصعبة أوحت ليكِ بكده يا الشيطان اللي أوحى ليكِ بكده، إنما العلاج عند الله، خلق "مفتنًا" بيقع كتير "توابًا" بيقوم كتير.
حسناء شاركت بسؤال- طب لي ربنا بيبتليني بالذنب ده، هو كده ربنا سايبني ومتخلي عني رغم إن ده بيحطم قلبي؟
- حاشا لله، لاء طبعًا ربنا بيربيكِ، بيرعاكِ، مهو إذا دخلت الطاعة من الباب هربت المعصية من الشباك، حاربي المعصية بالطاعة متحاربيهاش بالإحباط، بقالك عشر سنين بتقعي في الذنب ده وكل مرة بتخبطي راسك في الحيطة كسبتي حاجة؟ الذنب بيستفحل أكتر وبيتمكن منك أكتر، يبقى ربنا قال " وَیَدۡرَءُونَ بِٱلۡحَسَنَةِ ٱلسَّیِّئَةَ " بيحارب السيئة بالحسنة بيترد السيئات من حياته بإدخال الحسنات في حياته، إحفظي القرآن اجتهدي في الأعمال الصالحه مساحة المعصية هتتقلص واحدة واحدة في حياتكم.
رنا- طب لو وقعت في معصية تاني أعمل إي؟
- يعيوني إنتِ عصيتي وبتعصي وهتعصي، أوعي المعصية تنسيكي الطاعة، أوعي تستسلمي لحظة للشيطان إنه يدمر نفسيتك، بعد المعصية ويخليكي تحبطي وتيأسي من رحمة ربنا وتقومي سايبة الطاعة وسايبة طريق الإلتزام وحفظ القرآن، أوعي المعصية تنسيكي الطاعة أبدًا، ولو الطاعة مسيبتكيش المعصية خلاص خلي الإتنين في حياتك وفي يوم من الأيام الطاعة هتكسب المعصية سيبي بينك وبين ربنا باب موارب، اوعي تحبطي وتيأسي وتقفلي الباب اللي بينك وبين ربنا، ولو بتقعي في الكبائر خلي بينك وبين ربنا باب في الصيام، خلي بينك وبين ربنا باب في صلاة تكبيرة الإحرام..
عبير- اي تكبيرة الإحرام دي يا أستاذة.
- في صلاة للجماعة للرجال ودي ثوابها عظيم، وفي تكبيرة الإحرام ثوابها أعظم واللي هي بعد الاذان علطول تكوني إنتِ متوضيه وتصلي فرضك؛ خلي بينك وبين ربنا باب في ركعتين بالليل، في حفظ القرآن، في الصحبة الصالحه، في الأعمال الخيرية..
رنا- طب اللي بيعمل مصايب ومعاصي؟
- أوعي تقفلي الباب اللي بينك وبين ربنا، خليه موارب وفي يوم من الأيام هيتفتح على مصاريعه، وهترجعي لربنا منه، اوعي تقاطعي الطاعة لأن بعد المعصية بيجيلك إحباط ويأس، سيبي المعصية، والطاعة أكبر من المعصية، زي ما الجنة احلى من الدنيا، زي ما ربنا أقوى وأعظم من إبليس، مش عايزين المعصية تضيع نفسيتنا وتضيع أجمل سنين عمرنا، وتضيع طريق الإلتزام بحلاوته وجماله وفرحته، احنا في طريق ربنا الكريم البَر المحسن مش عايزين احساسنا اننا كل شويه بنعصي يعيشنا في إحباط، أصل يا بنات إحنا عصينا وبنعصي وهنعصي، طب الحل إيـــــــه بقى؟
رنا- أيوا الحل إيه يا أستاذة؟
- الحل التوبة.
- أستاذة وتين.
- نعم يا نور؟
- اتصلوا من البيت وطالبين حضورك ضروري.
- مين اللي اتصل.
- مامتك، وقالت إنك لازم تيجي دلوقتي.
- استر يارب، حاضر جاية، أسفة يا بنات نكمل المرة الجاية لو عايزين تسردوا مع نفسكوا دلوقتي مفيش مشكلة، بعد إذنكم.
- ماما أنا جيت.
- جالي صوتها من الصالون- تعالي يا وتين أنا هنا.
- في إي يا حبيبتي خلتيني امشي من نص الحلقة.
- مش تسلمي.
استغربت اسلم على مين؟ من إستعجالي مخدتش بالي من حد، بصيت ورايا، للحظة الدنيا وقفت من حواليا، محستش غير بدموعي بتحرق وشي، قام أخدني في حضنه.
- شش خلاص إهدي.
-...
- حقك عليا والله كنت عايز اعملهالك مفاجأه.
-...
- بطلي عياط بقي هتبلي الجاكِت الماركا.
- الله يرحم، قال ماركا قال.
- أيوا هي دي وتين أختي اللي اعرفها، وحشتيني يا شعنونتي.
- وأنت وحشتني أوي يا حبيبي، طمني عليك، أقعد كده، وشك خسان لي ياض، أنا عارفه أكل بره ده يجيب المرض، جبتلي اي معاك هااه هااه هااه.
- استني عليا هجاوبك براحه، سيبيني أنام بس دلوقتي ولما أقوم هنرغي للصبح، أنا جعان نوم.
- ادخل اوضتك أنا روقت السرير قبل ما أنزل.
- هو انتِ يابت مش عندك أوضة بتنامي في أوضتي لي؟
- كيفي كده، يلا بقى بدل ما اقول مافيش نوم.
- غيبت سنه وشوية ولسه قويه ومفتريه زي ما انتِ.
- بتقول حاجة يا مارد وشوشني.
- بقول السرير واحشني.
ضحكت وبصيت لماما، عيونها بتلمع بدموع.
- الله يباركلي فيكم يا ولادي.
- ويديمك نعمه في حياتنا يا نن عيوني.
- ويفرح قلبي من نحيتك يارب.
- هاخد الإيجازه كمان كام شهر وهفرحك.
- وتين.
- حبيب وتين والله، قومي نعمل غدا للواد الهفتان ده، قومي الله يبعد الافكار دي عنك ءامين.
