- خالو حبيبي وحشتني أوي.
- حبيبة قلب خالو، عاملة أي يا توتا.
- أنا الحمدلله بخير مدام شوفتك، جيت من السفر امتى، ومقولتليش لي مكنتش روحت الشغل النهاردة.
- قولت اعملهالك مفاجأة.
- أحلى مفاجأة دي ولا إيه.
- يا بكاشه.
- تعرف عني كده يا خالو بردوا.
- ابدًا دا إنتِ أبو كده وأم كده كمان.
- شكرًا يا مصر.
- ادخلي لأمك من وقت ما جيت وهي يا عيني في المطبخ.
- عيوني، هدخل أغير هدومي واجي هوا.
دخلت أوضتي جري، فتحت الباب وولعت النور رميت شنطتي على المكتب والبلطوا معاها، وقفت قدام المراية عشان اقلع الخمار و.. إي ده؟ مين ده؟
- ماما، خالو، حرامي، حرامي يا خالو الحقني.
خالو وماما جم لقوني ماسكه الحرامي من لياقة التيشيرت وبضربه بالشنطة.
- الله يخربيتك هو في حد يصحي حد كده.
- اهدي يا توتا سيبيه.
- وتين اسمعي كلام خالك وسيبي الواد.
- اسيب مين يا ماما دا حرامي بجح صحيح، يعني دخل البيت ونايم على سريري كمان، هو في بجاحه كده.
- انتِ عبيطة يا بت، هو في حرامي هينام في البيت اللي هيسرقه.
بطلت ضرب فيه فوقف وزق إيدي من على التيشيرت بتاعه.
- تعالى يا عُدي بره، مش قولتلك يا ابني نام في الأوضة اللي على الشمال اخر الطرقه.
- مخدتش بالي يا عمتو انا كنت فاصل من السفر وكان كل همي النوم.
- عمتو! عُدي!
- دا عُدي ابني يا وتين مش فاكراه؟
بصيتله وبصيت لأيدي اللي كنت ماسكاه بيها، أنا كنت ماسكاه؟ عُدي ابن خالو؟ عُدي اللي مشفتهوش من سبع سنين؟ هو كبر امتى كده، احلو كداليه وامتى؟
- هتفتكر اي يا بابا دي شاطرة بس تضرب في خلق الله.
- تعالى يا ابني نام في الاوضة اللي في الوش.
- حاضر يا عمتو.
- وانتِ يا وتين غيري هدومك وتعاليلي المطبخ عشان نحضر الغدا.
هزيت راسي وأنا بقفل الباب وراهم، قعدت على سريري فقومت بسرعه وأنا ببص على مكان نومته، عُدي نام على سريري، اتغطى بلحافي، اتنفس نفس الهوا اللي بتنفسه كل يوم، شاف أوضتي ومكتبي وكتبي وكشاكيلي، كشاكيلي! جريت على مكان الكشكول البينك المميز على المكتب، متحركش من مكانه، الحمدلله، اخدته وابتسمت وانا بملس عليه وشيلته في الدرج، لو كان شافه كنت روحت في داهية.
- الجميل سرحان في إيه.
قومت جريت عليها وحضنتها، اي في الدنيا يشبه حضن صاحب يشيل فرحك وحزنك سوا، دايمًا الحضن ده شال حزني جه اليوم اللي يشيل فرحي.
- احكيلي سر الابتسامة اللي من الودن للودن دي.
قعدت قدامها- عُدي جه مع خالو وهيفضلوا معانا شهرين.
- عُدي ده اللي هو عُدي، الكشكول البينك؟
- يــس.
- وتين.
- نور.
- هتتعبي.
- وجوده دوايا.
- هتعيطي وتنامي كتير.
- لو مشي تاني.
- هو فعلاً هيمشي تاني دول شهرين مش قرنين.
- لاء أنا واثقه إنه المرادي هيفضل، هيفضل عشاني.
- وتين.
- واثقه، وتين واثقه في ربنا.
هو المرادي هيفضل أنا واثقه في ربنا، مش بعد ما انتظرته كل ده هيمشي تاني، هو آه ميعرفش إني بحبه من اخر زيارة ليه عندنا لما كان مع خالو، كان وقتها لسه في تالته كليه، وأنا كنت في تالته ثانوي، خطف عيني ومهانش عليه يسيبلي قلبي خطفه هو التاني، كنت بتكسف منه لدرجة إني مكنتش بخرج اقعد معاهم واتحجج بالمذاكرة، كنت بسيب المذاكرة وافضل افكر فيه، كلامه، اسلوبه مع باباه ومامتي، حكاياته في الكليه واصحابه، حاجات كتيره كنت بفضل اسمعها منه من غير ما ياخد باله من وجودي، سافر مع خالو ومن وقتها مجاش تاني، كان خالو بس هو اللي بيجي، كنت ببقي عايزة اعرف عنه اي حاجة بس مكنش عندي الجرأة اني أسأل، كنت بكتفي بسؤال ماما عنه واسمع خالو وهو بيطمنها عليه، احلو أوي دلوقتي، بقي أهدى من الأول بس روحه الحلوه لسه فيه، شعره طوّل عن الأول وربى دقنه شوية صغيرين وضحكته بقت أجمل وغمازته اللي في خده اليمين ظهرت أكتر وإي قلة الأدب اللي بقيت فيها دي أنا عمري ما خدت بالي من حد كده، بس هو مش حد دا عُدي.
