- وتين كلمي مِس شيماء بتنادي عليكي.
" حاضر يا نور بس شوفي الكشاكل دي وسيبي كشكول أحمد عقبال ما أجي. "
طلعت من الفصل ورحت لمِس شيماء اخدت منها منهج الشهر ورجعت الفصل تاني.
" روحي فصلك يا نوري شكرًا "
- العفو يا توني علي إيه، بس اشمعنا أحمد خلتيني معلمش كشكوله؟
" لقيت فيه خط مش خطه فقولت اما أسأله خط مين ده وأنا منبهَ عليهم محدش يكتبلهم "
- الله معك، هروح اشوف عفاريت فصلي.
" بالله دول قمرات اوي وهادين مش زي اللي معايا كل واحد بلسان قد كده، مستقوين عشان السنه الجايه رايحين المدرسه مفكرين نفسهم كبار اوي يجوا يشوفوا حياة الكبار مهببه ازاي بلا نيلة "
ضحكت وراحت فصلها، اتنهدت وانا ببص لفصلي والاطفال اللي قدامي، قد إيه تعبت معاهم عشان يبقي اشطر فصل في الحضانه دي، مش متخيله انهم هيسبوني ويمشوا للدرجادي الدنيا مستكتره عليا فرحتي بيهم مع انهم مش ساهلين بس على قلبي زي العسل بتعامل معاهم على انهم اخواتي الصغيرين مش تلاميذي، قعدت علي الكرسي وندهت على أحمد، وقف قدامي ووشه في الأرض.
" ممكن ترفع وشك وتبصلي، انت عارف كويس اني مش بحب الحركه دي "
رفع وشه فقولت وانا بشاور علي الواجب اللي مش معمول بخطه " خط مين ده يا أحمد "
- خط خالو يا مِس.
" وخط خالو بيعمل إيه في كشكولك يا أحمد، هو ده اللي انا متفقه معاك عليه انت وزمايلك، ينفع تخلف بوعدك؟ "
عيونه اتملت دموع وبص في الارض تاني- أنا أسف يا مِس بس أنا إيدي كانت بتوجعني وخالو قالي ارتاح و أنا هعمله مكانك، أنا قولتله لاء المِس هتزعل مني قالي متقلقش هي مره واحده.
رفعت راسه علشان يبصلي فدموعه نزلت، انا قلبي بينزف مع دموع اي طفل قدامي بجد.
" انت لو كنت جيت من غير ما تعمله اهون من ان حد يمسك كشكولك وقلمك ويكتبلك واجبك انت هتفهم وتحفظ ازاي لو انت مكتبتوش، انا بديلك واجب عشان لما تروح تراجع علي اللي احنا حفظناه هنا واللي شرحته علشان تفهم أكتر والمعلومات تثبت، لولا كده إيه لازمتها اني اديك واجب لو حد تاني كتبهولك، لو ايدك وجعتك بعد كده ترتاح شويه وتكتب واجبك و اوعي تخلي حد يجي جمب حاجاتك، هسامحك المرة دي علي وعد منك ان اللي حصل ده مش هيتقرر تاني، اتفقنا؟ "
مسحتله دموعه فهزلي راسه وابتسم فمديت صوباعي الصغير وقولت " وعد حقيقي؟ " مد صوباعه الصغير فمسكته بصوباعي وقال- وعد حقيقي يا مِس.
- أخيراً اليوم خلص، اي الفرهده دي، كان مالي ومال التدريس في الحضانه والعياط والزن ده ياربي، ما كنت كافيه خيري شري وقاعده في البيت.
" يارب تغيري من الأسطوانه بتاعت كل يوم دي عشان حفظتها، ولا هو مدام سي محمد بتاعك ده خطبك مش عايزه حاجه من الدنيا غير انك تكلميه ليل نهار وتبني كل حياتك عليه هه، هه انطقي."
- هو أنا ليه شامه ريحة غيرة وشياط جاي من فوق الخمار بتاعك؟.
" علي اخر الزمن هغير من الشيف الشيربيني بتاعك بلا واكسه عليه وعليكي"
- لا لو سمحتي كله الا الشيف بتاعي، لا تقوليلي شربيني ولا حسن دا في حته تانيه خالص ياماما.
" آه منا عارفه هو فين، تلاقيه عند سطح الواد حماده"
- فــــــاشر دا في قلبي.
" جاك وجع في قلبك، خدي هنا يا بت"
طلعت تجري علي بيتهم قبل ما اضربها، ضحكت ودخلت بيتنا، احلى ما في الموضوع ان بيتي لازق في بيتها، امرمط فيها براحتي في اي مشوار اروحه او اي حاجه اقررها لازم نور تكون مرفقاني، سلمت علي ماما ودخلت اوضتي اترميت علي السرير، صحيت على صوت ماما وهي بتهزني، قومت قعدت وانا بفرك في عيني وبسأل.
" هي الساعه كام يا ماما "
- 9 يا وتين، اي النوم دا كله يا بنتي.
" مفيش يا ماما بس عشان كنت مطبقه من امبارح "
- ولي التعب دا كله يا بنتي، ما كفايه عليكي شغل الحضانه يبقي حضانه الصبح وبالليل تشتغلي خطاطه للوح المدارس.
" مفيش تعب ولا حاجه يا حبيبتي انا بحب شغل الخط ده وانتي عارفه، وغير كده الحضانه بيتي التاني مقدرش استغني عنها، متقلقيش عليا انا والله بخير، المهم عامله اكل إيه يا حنون "
- قومي بس غيري هدومك وتعالي اكون حضرت الاكل.
