مين قال إن البحر هادي؟!
البحر مُخيف بشكل مُريب!
الامواج ثائره وكانها في حرب!
صوت البحر مش هادي! صوت البحر عالي!
بيديك هدوء نفسي أه، لكن في نفس الوقت بيديك صراع جواك بطريقه تخوف!.
البحر متناقض، بيريح اعصابك وفي نفس الوقت بيهيج افكارك!
لما البشر بتنزل تعوم فيه، بتلاقي الأمواج بتثير اكتر واكتر وكأنه بيقول أنا مقبلش الاذى يستمتع بيا!.
البشر اذى فعلا، البحر حلو وحلو أوي، نقي كده وجميل، ميستاهلش البشر تعوم فيه، يستاهل بس التأمل فيه!.
_وتــيــن، استني!
وقفت وأنا لسه باصه نحيت البحر، جه وقف جمبي وبعد شوية سكوت.
_كنت عارف انك هتبعدي.
_وكنت عارفه انك هتيجي ورايا.
_امم، لسه مش قادره تتعافي لواحدك صح.
_متشغلش بالك هتعافى قريب.
_مش هتقدري.
_هقدر يا عُدي هقدر، وبطل تقولي اني مش هقدر لواحدي أنا قدها وهقدر، ولواحدي كمان.
_مش هبطل اقولك انك مش هتقدري لانك فعلا مش هتقدري لواحدك يا وتين.
_بعد إذنك.
سبته واقف على الشط ومشيت نحية العيلة، كنا متجمعين زي عادتنا في موسم الصيف، فضلت قاعده على كرسي بعيد عنهم نسبيا وعن كلامهم مع بعض وحكاويهم وفضلت ابص للبحر بهدوء، أنا مش لازم كل شويه اوضح واثبت إني اقدر، لي مقدرش لواحدي، دي حياتي ودا قلبي أنا ودي كانت فتره مش لطيفه وأنا بس اللي مريت بيها مش حد تاني يبقي لي اتعافى من الفتره دي بمساعدته، كان اختياري مش اختياره هوَ، كانت تجربتي أنا مش تجربته هوَ، عارفه انه عايزني ارجع زي الأول، بس ده مش بايدي، انا اتأذيت وجامد اوي ومش من اي حد وخلاص ده كان اقربهم لقلبي، كنت دايماً اسمع عن الضربه اللي بتوجع مش بتيجي غير من القريب، وانا جربت انها جت من اقرب الاقربين، كنت دايما في كل مره اتجرح كنت بشوف الجرح بعيني بس لأول مره اتجرح جامد كده ومشفهوش، لي كل الاذى اتجمع في البشر، مش المفروض اننا نخاف على بعض ونساعد بعض مش دي من الانسانيه بردوا، انا عمري ما شوفت شخص موجوع غير من حبيب، صديق، أهل، لكن هتقولي في شخص اتوجع من غريب هقولك انك كذاب، الوجع مبيجيش غير على هيئت بشر، تدخل حياتك بهدوء وتخرج منها بهدوء بردوا، لكن الهدوء اللي دخلت بيه ده هدوء عادي زي نسمه لطيفه بتداعب خدك في الصُبحيه، لكن الهدوء اللي خرجت بيه ده بيبقي هدوء ما قبل العاصفه، هدوء مُريب مُخيف زي البحر كده بالظبط، تحبه اوي بس لما تغوَط فيه بيبلعك وتفقد الحياه بعدها، الوجع وحش أوي ومفيش حد مننا عاش حياته غير لما جربه بس باشكال مختلفه.
_سرحانه في إيه.
_مفيش يا حبيبتي، انتي عارفه بحب ابص على البحر.
