_خلاص يا نور اقفلي انا جايه.
قفلت معاها ولبست بسرعه وطلعتلها، نور بنت عمي وأكتر من صحبتي واختي كمان، في نفس سني وبحكم ده ملناش غير بعض، أصغر اتنين في العيله اللي مكونه من اسرتين بابا وعمي، وعشان هما كمان ملهمش غير بعض فـ ساكنين في نفس البيت، بس مع ان بابا وعمي اخوات فـ ده حاجه وده حاجه تانيه خالص، عمي اه كويس ومش قاسي بس تفكيره غير بابا تماما وده اللي مسبب مشكله لنور، دخلت اوضتها لقيتها زي كل مره قاعده علي السرير وبتعيط، كنت اتمني ارجع بالزمن ست شهور ومكناش روحنا الكورس الزفت ده.
_خش في حضن اخوك يا فواز.
روحت اخدتها في حضني وفضلت اطبطب عليها لحد ما هديت، اتعودت في كل مره اعمل كده عشان تهدي هي مش هتتكلم هي بس بتحتاج ان حد يطمنها ويحضنها، وانا مش هبخل عليها اني اكون الحد ده، كل واحد بيتمني حد زي كده في حياته، حضن حنين يترمي فيه من غير ما يتكلم فـ يبقي بخير بعدها، ويا بخت من عنده الحد ده بجد.
=رفضه تاني يا وتين.
اتنهدت ومسحتلها دموعها ومسكت ايديها وقعدت قدامها باهتمام.
_وبعدين؟؟
=هو اي اللي وبعدين! اعمل اي في بابا يعني، كل مره يرفضه ولسبب اتفه من التفاهه! انا معرفش لي مش زي عمي وبيفكر في راحت ولاده مش الشكليات دي، انا قربت ازهق ما بالك هوَ.
_هي دي المره الكام اللي يترفض فيها.
=ال26 يستي.
_حلو لسه فاضل 74 مره وغير كده هو قالك لو اترفضت 100 مره مش هزهق وهتقدملك ال101 صح؟!
=بس ده كلام يا وتين مش واثقه انه مش هيزهق.
_واللهِ بقي اللي مش قد الكلام مكنش قاله، واللي غاوي حد هيعافر عشانه عُمر.
=محمد شخص كويس جداً كفايه انه دخل البيت من بابه مجاش وقالي نرتبط زي بقيت الشباب عشان مش عايز يغضب ربنا فيا يبقي لي بابا يبص انه مش منطقتنا ومش هيعيشني في نفس مستوايا والكلام الزفت ده مع انه لو يفكر شويه هيلاقي ان راحة بالي وانه يتق الله فيا بالمستوى والعيشه كلها.
_مقدامكيش غير الدعاء والقيام وتفوضي امرك لله يا نوري.
=بعمل كده واللهِ وربنا يشهد، تعرفي اني عمري ما كلمته ءصلا لكن الاهتمام والتمسك بيا ده منه خلاني اتعلق بيه واحبه، كفايه نظرة الحب واللمعه اللي في عيونه اللي كنت بلمحها لما عيونا تيجي في عيون بعض، انا كنت بقرأ عن الحاجات دي في الرويات اول مره اشوفها في الحقيقه وتكون ليا!
_الاااه وبيقنا بنقول كلام حب واللذي منه، اوعدنا يارب.
اخيرا ضحكت..
= ما انتي ربنا واعدك بس حضرتك جبله مبتحسيش.
_قاصدك عُدي؟!
بصيتلي بتديق عينيها وها قد وقعت في الفخ.
=وهو انا جبت سيرته، ايش عرفك اني قاصدي عليه ولا دا من كتر التفكير فيه؟
