فتاة الميتم وأحببت مقدم

البارت الثاني

وهنا لازم ادوام لأن خلصت الحفلات وصار الدوام
ومحاضرتين باليوم دوامنا اول اسبوع والحمدلله
جنت دائما اتفوق ودرجاتي عالية وجان الدكتور اذا
يريد بحث يكلي واني اسوية والبنات جان يضوجن
مني لأن اني اشطر منهن اني حتى من اشتغل العصر
الزم الملزمة بيدي واذا صاحني احد اعوفها واكوم
يعني ابد مهاملة دراستي المهم اجة ويانة زميل
جديد وجان شايل خشمة اله شوية ويطخ بالسمه
والبنات جان يصيحلنة بس مو كدامة يعني بيناتهن
وسيم القسم رقم واحد يعني عود هوه احلا واحد
بالقسم واني الصراحة اشوف شكلة عادي بس هوه
ولامعبر وحدة اصلا وحتى جبير بالعمر يعني مو
هستوة متخرج من السادس وجاي مداوم يعني احنة
عمرنة ١٨ سنة وهو مبين بنص العشرينات هيج والمحاضرات يكعد ويدخن والدكاترة يخافون منة
ميحجون وياة يعني غثيث بمعنى الكلمة يعني يصير
عدنة امتحانات والدكتور ينطينة خمس أسئلة هوه
يكعد يصفن على الورقة ربع ساعة وينطيها ويأخذ
ممتاز هوه كاعد مقابيلي حتى اباوع على ايدة ميكتب
فديوم جان الدكتور مريض كلش بس لازم يشرحنة
المادة فصاحني للإدارة
دكتور أحمد: بتي شجون اني واثق بيج واني ماكدر
اوكف واشرح هاي ورقة بيها الملخص اكتبي واشرحي
على طريقتج
شجون: دكتور اخاف مادبرها وميفتهمون
دكتور احمد: اني واثق بيج وامشاءلله انتي كد الثقة
شجون: انشاءالله
اخذت الورقة واني شوية بني خجولة بس كلت يمكن
هاي فرصة حتى اكسر حاجر الخجل المهم دخلت القاعة وكلهم كاعدين ديسولفون ظربت عل ميز حتى
يسكتون
شجون: دكتور احمد اليوم ميكدر يجي لأن مريض
وكلفني اني اشرح المادة
أمير: هههه انتي تشرحيلنة
شجون: معاجبك تفضل اطلع موكفت الدنيا عليك
شوفو اني ممجبورة اكوف واشرح الي يريد يفتهم
وينجح يبقى اما الي مثل حضرة جناب الاستاذ أمير
خلي يطلع
الكل سكت وأمير طلع من القاعة خفتاً وراحة شرحت
وكملت خلصت المحاضرة وطلعت برة بالحديقة وأمير
كل ميفوت يباوعلى بنضرات ماعرف شلون افسرها
المهم صار وكت المحاضرة الثانية احنة قاعتنا كلش
صغيرة واحنة عددنا ٨٥ كعدت اني بمكاني واجة أمير
كعد بصفي اني ماطيقة وهوه كاعد ويفافف
شجون: ترة مجابرتك تكعد هنا وتتاففف
أمير: هوه لو اكو مكان جان كعدت بصفج
شجون: هسه اليكول اني ميتة عليك واتوسل بيك عليك الله تعال اكعد بصفي استغفرللة
كملت المحاضرة ورحت للسكن غسلت واخذتلي غفة
وكعدت رحت للشغل وأخذت الملزمة وياية لأن جان عندي امتحان اني كاعدة وبيدي الملزمة جان يصحني
واحد عفت الملزمة ورحت والصاحني أمير اني وياة
مصدومين واحد يباوع عل ثاني واني ماجذب عليكم
انحرجت دنجت راسي وجانت كاعدة وحدة وياة
أمير: ااا أريد مشاوي وعصير كوكتيل ثنين
شجون: تريدون شي بعد
الابنية: أمير أريد سلطة
أمير: يي وماعون سلطة
رحت انطيتهم الطلب وحظروة وأمير مشال عينة
بس يباوعلي أريد الكاع تنشك وتبلعني وديتلهم
الطلب واني احط الاكل عل ميز وأمير بس يباوع
حطيت الاكل ورحت لزمت الملزمة واقرة وحاطة
الكتاب بوجهي ماريد أمير يشوفني وماريد ثقتي
تنهز كمت احجي بيني وبين نفسي صح اني شاطرة
بس همين لازم اعتمد على نفسي حتى أنجح اكثر
صاحتني بنية باوعت ماكو أمير الحمدللة كمت خلصت
الشغل وأخذت غراضي وطلعت واني امشي الدنية
معلمة ساعة ب٨ وسيارة تلحكني واني احاول اجذب
نفسي واكول لا متلحكني كمت امشي سريع والسيارة
هم كامت تمشي سريع نزل صاحب السيارة واني امشي
بأسرع ماعندي واني دامشي وايدي انجرت حيل عطت
أمير: اششش راح تفضحينة شبيج
شجون: أمير وخر ايدك لاتلزمني
أمير: وخرت عيني بس اعصابج لاتاكلينة
شجون: شتريد بالهليل ليش دتلحكني
أمير: امشي خلي اوصلج وين بيتكم لاتمشين وحدج
بهاليل
شجون: مشكور اني ارجع وحدي
أمير : ليش تشتغلين هنا ماعندج احد يصرف عليج
شجون: وانته واكف تحقق وياية
عفتة ومشيت وركب السيارة وظل يلحكني
لحد موصلت للسكن فتحت الجنطة ظليت ادور بيها
عل باج الباج ماكو عزه شلون راح ادخل
شجون: عمو اني مو يومية ارجع بهيج وكت الباج
ناسيته بالغرفة
الحارس: والله عمو منطيني أوامر اذا ماكو أوامر اذا
ماكو باج محد يدخل
شجون: عمو اذا بتك مرت بهيج موقف متساعدها
فدوة عمو والله هسه اروح للغرفة اجيبلك الباج وارجع
الحارس: دكي على صديقتاتج خلي يجبون الباج
شجون: ماعندي تلفون عمو
نزل أمير من السيارة واجة
أمير: شكو ليش مدخلتي
شجون: أمير روح الله يخليك خلي ابتلي بمصيبتي
أمير: كام يحجي وية الحارس وأمير طلع محفظتة
وفتحها ومادري شنو شوف الحارس تغيرت ملامح
الحارس
الحارس: بس مو تنسية مرة ثانية
شجون: يي يي
فتح الباب ودخلت ركض حتى مشكرت أحمد طبيت
ركض للغرفة وذبيت روحي عل جرباية ونمت من
التعب كعدت ساعة بل ٦ الصبح لزمت سرة عل حمام
كل وحدة اطب للحمام تنام ونظل نتعارك طبعن
البنات يطلعن من المحاظرة يروحن للكافترية ويرتبن
بروحهن عبالك رايحين عرس عكسي تماماً اني البس
فستان بسيط وامشط شعري ولو اشيلة كباية لو ذيل
حصان وماحط مكياج ابد المهم اخذت الملزمة ودخلت
للقاعة لأن مابيها احد هدوء كعدت اقرة وخابصة نفسي
دخل أمير للقاعة
أمير: يي اكليها للملزمة بعد
شجون؛ صدك أمير شكراً غل سويتة البارحة لما انتة
اني مادخل للسكن
أمير: شعجب كاعدة بسكن انتي من غير محافظة
شجون: يي اني من بغداد
أمير:صدك اني هم من بغداد بيا منطقة بيتكم
شجون: ماعندي بيت هناك
أمير: شلون يعني مفمت
شجون: اني جنت عايشة بدار ايتام
أمير: هاا 😐
شجون: لاتستغرب اي اني جنت عايشة بدار ايتام
واجيت هنا عمود السكن لأن الايجارات بغداد غالية
ماكدر ادبرها وحدي عل أقل هنا نشترك وندفع
أمير: يعني انتي هسه ماعندج مكان غير السكن
شجون: يي
أمير: زين واذا ترخجتي وبن تروحين
شجون: الله كريم تدبر انشاءالله
أمير: انشاءالله
كعدت اقرة اجتي صديقتي الي وياية بالسكن دغتني
بيدي
شجون: اخخ شبيج
لارا: شفتج كاعده تحجين وية أمير شكلج سولفيلي
شجون:محجيت وياه ماكو شي لايروح بالج بعيد
يعوف هذني البنات الميتات علية ويباوع علية شبيج
انتي اشش بدت المحاضرة
طبعاً امتحنة وجنت خايفة مامتأكدة من اجوبتي
واخاف افتح الملزمة اكول خليها على الله شيطلع
خل يطلع طلعت برة جنت ظايجة كعد بالحديقة
مال الجامعة وجان الجو ربيع كلش حلو كعدت شوية
وصار وكت المحاضرة الثانية رحت كعدت بالقاعة
دخلوا للقاعة طبعاً اكو بنات يعوفن المحاضرة ويطلعن
مادري شلون من تجي الامتحانات يقراً اني ابد ماطلع
اني يعني أريد اخلص واتعين رغم هاي الكلية مابيها
تعين بس يعني اذا تخرجت ومارست يحطوني
بالمحكمة لأن اني اداوم كلية قانون المهم كملت
المحاضرة رجعت سبحت وكعدت اقرة منمت ابد
لحد مصارت ساعة بالخمسة بدلت ملابس ورحت
للمطعم بديت اشتغل وبداك اليوم اجوي عالم هواي والمطعم انترس ناس واني مالحك منا ومنا بس
شنوي ماكو شي سهل كملت شغلي طلعت برة جان
يصير بوجهي أمير
شجون: أمير؟ شدسوي هنا
أمير: اجيت للمطعم داكل
شجون: هاا بالعافية اني رايحة بااي
أمير: اوصلج
شجون: لا مايحتاج
أمير: مو بل سيارة مشي عاجبني اتمشى
شجون: تمام
ظلينة نتمشى اني وياة بس بدون منحجي اني استحي
احجي وهو هم
أمير: انتي متعرفين معلومات على اهلج
شجون: لا وماريد أعرف اصلا
أمير: ليش
شجون: لو يريدوني همة جان مذبوني الفجرية باب
الدار
أمير: يمكن ظروف
شجون: نفترض انتة عندك ظروف تشمر جهالك
أمير: لا
شجون: اني هيج مرتاحة اني مو وحدي وياية ربي
يشوفني ويسمعني مايحتاج اظل اني ادور عليهم
لو صدك يردوني جان دورو علية
يلا اني وصلت شكراً عل توصيلة
أمير: العفو شتريدن لاتستحين مني زين
شجون: تسلم
هنا وصلنة لنهاية البارت اتمنى تسامحوني صح اني
مقصرة وياكم بس كل واحد عندة ظروفة الخاصة
والمسؤليات ماعتقد يعني اكو واحد كاعد ومرتاح ماعندة شي واحبكم بااي🤎