If you believe (Complete)

1

Unicode
Zawgyi
~~~~~~

"စိတ်ချမယ်နော် တာပေါ တစ်ခုခုဆိုချက်ချင်းအကြောင်းကြား ပေါ့ဆမနေကြနဲ့''

"ဗိုလ်လင်းစိတ်ချပါ ကျွန်တော်တို့အထူးဂရုစိုက်ပြီးနေမှာပါ''

အိမ်တစ်ခါပြန်ဖို့အရေး သူ့မှာ နောက်ဆံတင်းနေရတာ။ တော်တော်များများက
ဘာကြောင့်ခေါင်းဆောင်မဖြစ်ချင်လဲဆိုတာ ဗိုလ်လင်းသိလိုက်ရပြီ။ ခေါင်းဆောင်ဆိုတာ ပြသနာအသေးအမွှားလေးကအစ
တာဝန်ယူရတာ။ တပ်မှာကအစ တပ်သားတွေရဲ့ပြသနာကအဆုံး ခေါင်းဆောင်
ဖြစ်သူကပဲတာဝန်ယူဖြေရှင်းရသည်။

အဆူခံရပြီဆိုရင်လည်း ခေါင်းဆောင်လုပ်တဲ့သူကပဲနားအူနေအောင်ခံရတာ။တစ်ခါတလေ တပ်သားတွေကိုယ်စားအပြစ်ဒဏ်ပါခံလိုက်ရသေး။ တာပေါ
ပြောသလိုဆို အငယ်လုပ်ရတာက သြဇာအာဏာမရှိပေမယ့် လွတ်လပ်မှုရသေးသည်။ ခေါင်းဆောင်လုပ်သူမှာသာ အချိန်ပြည့်ရှုပ်နေရတာ။

တစ်ခါတလေ တပ်သားတွေကအနားယူနေပြီး ခေါင်းဆောင်လုပ်သူက အဘက်ဘက်နဲ့စကားပြောပြီးအလုပ်ရှုပ်တုန်း။
ကြားထဲဝေးလံတဲ့ဒေသကိုရက်ချင်းအစည်းအဝေးသွားတက်ရသေးတာ။
အဖွဲ့အစည်းနဲ့နေတဲ့သူတို့မှာကား ချက်ချင်းဆိုချက်ချင်းမှ။မဟုတ်လျှင်ပေးတဲ့အပြစ်ဒဏ်ခံတော့ပဲ။

အရင်ခေါင်းဆောင် ဘောစေးနောင်
တာဝန်မှရပ်ဆိုင်းခံလိုက်ရပြီးနောက် သူ့နေရာအစားထိုးဖို့လူလိုလာသည်။
ဗိုလ်လင်းမှာကား နောင့်နေရာဆက်ခံဖို့
အရည်အချင်းမပြည့်ဝသေး။ အရည်အချင်းပြည့်ဝတဲ့လူကိုလည်းရှာတွေ့ရော မလုပ်ချင်သဖြင့် ကာကွယ်ရေးအဖွဲ့ထဲဝင်လိုက်တဲ့လူနဲ့ ကြက်​ခြေနီ
အဖွဲ့ထဲဝင်လိုက်တဲ့သူနဲ့ ထင်သလောက်အဆင်မပြေခဲ့။ နောက်ဆုံးဗိုလ်လင်းကပဲ နောင်နေရာဆက်ခံလိုက်ရသည်။

ယခုဆို နောင်ထွက်ခွာသွားတာ ၅နှစ်ရှိနေပြီဖြစ်သည်။တာဝန်နဲ့ရှုပ်ထွေးနေရတာကတစ်ကြောင်း ဆက်သွယ်မှုမကောင်းတာကတစ်ကြောင်းမို့ ဒီအတောအတွင်းနောင်နဲ့တစ်ခါမှအဆက်အသွယ်မရှိခဲ့။

ခေါင်းဆောင်ရာထူးလက်ခံလိုက်သည့်ရက်ကစပြီး သုံးနှစ်ကျော်အထိ အိမ်ကိုပြန်မရောက်ခဲ့။တစ်ရက် တစ်ရက်ဟိုကိုသွားလိုက် ဒီကိုသွားလိုက် ဆေးရောင်းသူတွေကိုရှာဖွေလိုက် အရက်တွေကိုပိတ်ပင်လိုက်နဲ့တစ်ရွာဝင်တစ်ရွာထွက် တစ်နေရာပြီးတစ်နေရာသွားနေရတာ။