مسلسل "إيلاف" 🤎

" الحلقه الأولي "

الحلقه الاولى من مسلسل "إيلاف"
نتفاعل عالبوست وبعدين نقرا الحلقه هه💗

غُرفه مدهونه أبيض بسرير يكفي فرد واحد وجنبها ترابيزه صغيره محطوط عليها زُهريه فيها دوار شمس، وجنب الزُهريه أدويه،نضاره، شاحن كاميرا فيها بطارية، وموبايل،ادام السرير فيه دولاب صغير أبيض مقفول، جنبها مرايه متحدده بدوار شمس صناعي، وفي الأوضه فيه بلكونه مزروعه بـ نباتات مُختلفه وكرسي وترابيزه خشب صغيرين.

وإيلاف..
بنت جميله بملامح هاديه وناعمه، شعرها قصير وكيرلي، وجسمها رفيع، طولها متوسط، ولونها قمحي فاتِح شويه..

نايمه علي سريرها نوم عميق، مش من الراحه ده من المنوم اللي بتاخده عشان تقدر تنام زي الناس الطبيعيه..

صوت المنبه في تليفونها بيرِن، الساعه ١٠ الصبح، وصوت مامتها بتفتح الباب، دخلت وقفلت الدفايه وشالت البطانيه من علي إيلاف "هنموت محروقين بسبب الدفايه بتاعتك دي"
-طب قولي صباح الخير
_ياختي صباح الخير هنموت محروقين بسبب الدفايه بتاعتك، حلوه الصيغه دي؟
-كتر خيرك ياست الكل، هو طبعًا انتِ علي عيني وعلي راسي بس انا نبهتك قبل كده تخبطي عالباب قبل ماتدخلي ده بعد اذنك يعني.
ضربتها علي كتفها" هو مين بيربي مين ياحيوانه انتِ"
_ماما والله مش حكاية تربيه بس انا ليا خصوصياتي
-والنبي لاتتوكسي ده انا بغسلك هدومك لحد دلوقتي

قامِت إيلاف وهي بتبوس راس مامتها "صباح الخير ياماما"
دخلت الحمام غسلت وشها بالغسول وغسلت سنانها ولمِت شعرها بتوكه واتوضِت وخرجت..

-طب خلي عندك دم وحطي معايا الاكل بدل مانتي صاحيه تحطي اللوشن والموشن ع وشك
_حبيبتي قولتلك قبل كده اللوشن الي بيتحط ع الجسم، اللي بحطه علي وشي ده اسمه غسول
-هنسيب الاكل يبرد فالمطبخ ونحكي فِ كريماتك

دخلت المطبخ وهي بتاخد طبقين من اطباق الفطار "دي مش كريمات والله، ليه مش مديه فرصه لنفسك تعرفي السكين كير وتهتمي ببشرتك كده"
خرجت مامتها باطباق وحطتها عالسُفره وقعدِت "وهحطها لمين ياحسره، يلا الحمدلله اتدفنت بدري بدري"
بتاخد بطاطس بإيديها "انتِ اللي مش عايزه تعيشي حياتك"
ضربتها ع إيديها "غسلتي ايدك قبل ماتمديها فالاكل"

بتاخد بطاطس تاني وبتبصلها"متوضيه"

-مش جارتنا سهام جت امبارح
_ياسلام
-تخيلي، جت مسكت ودني مسبتهاش
_قولي ياماما، سهام مبتجيش بدون اسباب
- ٤٥ سنه بس ومطلق ومعاه طفلين بس ايه زي العسل
_ وده ليكِ ولا ليا؟
-بلاش قلة أدب
_مانا بحاول افهمك والله، اه انا عندي ٣٠ سنه ومتجوزتش، بس ده مش معناه ان فرصتي ف اختيار شريك حياتي انحدرت اوي كده عشان اخد واحد ٤٥ سنه، لا وايه بدل ماادخل اجرب مسئولية جواز ادخل اشيل اتنين في واحد، ياحلاوه!
-فين الانحدار بس، ده زي القمر ميبانش عليه سن خالص وعنده شقه في..
قاطعتها ايلاف _ينفع افطر ف حياتي يوم واحد بس من غير مايتحرق دمي؟
-يعني ايه، مش هتقعدي معاه
سابت الفطار وقامِت "انا رايحه اشوف شغلي"
_لا وانتِ بتشتغلي اوي اسم الله عليكِ، بالسلامه ياختي، والله لايلاقي الاحسن منك وبكره تقولي يارتني مارفضته!

رايحه اوضتها "انا معرفش انتِ امي ولا مرات ابويا"
صوت مامتها من الصاله "ما لو كان موجود كان لم لسانك"

قفلت باب الاوضه وفتحت موبايلها، صورة والدها علي الباك جراوند "صباح الخير، وحشتني اوي، يارب تكون بخير"، دخلت تصلي، لبست نضاراتها وخرجت بالاسدال تسقي الزرع، وراحت عملت قهوتها وقعدت تشربها فالبلكونه وهي بتقرا روايه، تليفونها رن..

" الكلاينت الغلس "
-صباح الخير
_صباح النور
-ازيك
_الحمدلله بخير، وانتَ ازيك؟
-انا كويس، ممكن اعرف حضرتك جايه امتي؟
_انا خلصت قهوتي وجايه ان شاءالله
-تمام في انتظارك، مع السلامه
_سلام

الانسان بيشتغل الشغل اللي بيحبه، مبيشتغلش الشغل اللي بيحبه، لازم يلاقي عملا رخمين يكرهوك فِ حياتك، اصل هتعيش مبسوط كده فِ شغلك بدون ضغط وقولون؟ واحنا روحنا فين يافرنسا؟

لبسِت بلوفر ابيض علي جيبه بيج وطرحه مشجره، خدت البطاريه من الشاحن اللي علي الترابيزه، حطتها فالكاميرا وجهزت شنطتها وخرجت "ماما انا نازله"

خرجت مامتها من المطبخ "متزعليش من كلامي"
حضنتها "مقدرش ازعل منك ياماما"

نزلت وطلبت اوبر وفضلت مستنيه شويه، خرج البواب "صباح الخير يااستاذه ايلاف"
_صباح النور، ازيك ياعمو إبراهيم
-الحمدلله يابنتي بخير، اجبلك كرسي تستريحي عليه
_تسلم يارب انا تمام
-مش عايزه اي حاجه اعملها لحضرتك
_عمو ابراهيم قولتلك قبل كده انت اد بابا ميصحش تقولي حضرتك، قولي ياايلاف عادي
-لا والله يااستاذه ميصحش برده
_غُلُبت معاك، خد دول ياعمو ابراهيم
-الله يكرمك يارب وييسرلك امورك
_الاوبر وصل، يلا سلام عليكم
-وعليكم السلام

ركبت العربيه وطلعت روايتها تقراها فِ الطريق، الوقت عدي بسرعه رهيبه طول ما الجو حلو والشباك مفتوح وبتقرا روايتك المفضله..

وصلت الكافيه ودخلت قعدت علي ترابيزه واتصلت بـ"الكلاينت الغلس"، شاورلها شاب طويل، جسمه رفيع، عيونه عسلي، لونه اسمر، وحالق دقنه وشعره، لابس شميز وعليه بلوفر لونه بيج وبنطلون بني..

-اهلا اهلا، المكان نور
_ميرسي لذوقك، هنبدا السيشن امتي
-ايه ده انتي فاكراني قليل الذوق ولا ايه، لازم تشربي حاجه
_ميرسي شربت قبل ماانزل
-لا والله ابدا، شاي، قهوه، نسكافيه، عصير
_اوك قهوه
-مش كتير ع صحتك اتنين قهوه ورا بعض كده؟
_افندم؟

نده بصوت عالي "واحد عصير فريش يامحمد"
_انا مطلبتش عصير ع فكره
-هيفيدك علي فكره، اصل غلط قهوه مرتين كده ورا بعض
بتنفُخ "ممكن اعرف هنبدأ السيشن امتي"

-ممكن قبل مانبدأ السيشن اسألك سؤال
_خير، اتفضل
-هو انتي بنت "منصور الحكيم"؟