مسلسل "إيلاف" 🤎

" الحلقه السادسه "

الحلقه السادسه من مسلسل "إيلاف"

بتتصل بـ ايلاف..
مبتردش، الغبيه مبتردش، بتبُص علي الازاز
"دي تبقي مصيبه لو جه وهي بره"

القهوه يافندم "شكرا لحضرتك"
طلعت تجري بره "ايلاف الحقي بيقولك اسر ف مشوار و.."

_آسر!!!!!!!!!
-احيه.

بتمسك رحمه من دراعها وبتجري، آسر شافهم وبدأ يمشي بخطوه سريعه شويه "ايلاف، ايلاف، ايلاف استني لو سمحتي"، خاف يمشي اسرع من كده والناس بتبُص عليهم..

وقفوا بعد مااتأكدوا انه مشي، قعدوا ينهجوا بشكل رهيب من الجري ويضحكوا جدًا

-والله انتِ مُتخلفه
بتنهج _والله شوية الجري دول غيروا مودي تصدقي! عمري ماتخيلت ان الجري حلو كده..
-وعهد الله انتِ مخك في كوكب الزمرده مش معانا
_تفتكري هيتصل بيا؟
-لو عنده دم اه
_هنشوف
-ها هنروح فين، عالبيت بقي فيه غدا جامد مستنينا
_ايوه كده دلعيني
-مخك في كرشك علي طول كده
_شوف مين بيتكلم!

طلبوا اوبر للبيت، وصلوا وطلعوا عالبيت، رحمه رنِت الجرس وايلاف بتخبَط..

مامتها : براحه ع الباب يابهايم
رحمه : انا شامه ريحة اكل جامد
إيلاف : عدوني بس كده انا الأول الحق الصلاه

دخلت رحمه تساعد والدة ايلاف فالمطبخ، ودخلت ايلاف اوضتها غيرت هدومها واتوضت وصلِت، جابت ورقه وكتبت عليها "الجري" ورسمت جنبها قلب ولزقتها علي الدولاب، خرجت تساعد مامتها ودخلت رحمه تغير هدومها وخرجت، حطوا الاكل علي السُفره وبدأوا ياكلوا..

مامتها : عملتوا ايه صحيح في موضوع العريس
رحمه : ايه ده انتِ اتقدملك عريس؟
إيلاف : شوفتي اهو، انسانه طبيعية، متوقعتش انك بتتكلمي عن آسر عشان قولتلك آسر كلاينت مش عريس
رحمه : ايه ياطنط ده هو اي راجل كده تسميه عريس وبعدين شكله خلع
مامتها : بت انتِ ملكيش اهل يسألوا عليكِ بدل مانتي قرفاني كده، بتقوي البت عليا
رحمه : كلامك ده كان هيزعلني جامد لو الاكل ده مش موجود
إيلاف : بعد اذنكم محدش يجيب سيرته تاني، خلينا نشوف حياتنا بقي!
مامتها : عندها حق، الواد جه شقلب الدنيا
رحمه : وانا هحترم رغبتك بس بشرط
إيلاف : خير
رحمه : مش عايزه اشوفك متضايقه
إيلاف : حاضر

كملوا أكل وبعدين شالوا الأطباق مع بعض وطلعوا ازازة بيبسي من التلاجه وحطوا منها في كوبايات، مامتها جابت المسلسل الهندي بتاعها ودخلت هي ورحمه الاوضه..

_عارفه يارحمه، انا اتفاجأت اني كبرت علي الفاضي
-ايوه فعلًا انتِ طول عمرك عيله
_بتكلم بجد، انا ازاي وصلت لـ ٣٠ سنه ومعشتش اي حاجه! حياه روتينيه رهيبه، اكل وشرب وشغل ومحاولة للنوم، مش الحياه اللي كنت بتمناها
-مالك ياايلاف؟
_حزينه علي نفسي اوي يارحمه، العُمر عدي بيا كده ملحقتش اعمل فيه حاجه
-مش متعوده منك علي كده، لاتبكي علي اللبن المسكوب، صُبي كوبايه تانيه
_صُبي؟ اسكتي يارحمه فصلتيني
-والله بكلمك جد، الحياه ادامك لسه، ماتعيشي ايه مانعك؟