مسلسل "إيلاف" 🤎

" الحلقه التانيه "

الحلقه التانيه من مسلسل "إيلاف"

-ممكن قبل مانبدأ السيشن اسألك سؤال
_خير، اتفضل
-هو انتي بنت "منصور الحكيم"؟
_انت عبيط؟
-ايه!!!!
_اه تبقي عبيط، لما تسأل سؤال شخصي زي ده واحنا كل اللي بينا شغل، تبقي عبيط، السيشن اتكنسل

قامِت ولمت شنطتها وهي ماشيه، مشي وراها
"استاذه ايلاف، انا اسف، استني بس"

_مش عايزين نفرج علينا الناس، فـ بعد اذنك كلم فوتوغرافر تاني يشوفلك الشغل
-انا بجد اسف، شوفي اقدر اعتذرلك ازاي وهعتذر، دي فعلًا حاجه متخصنيش، واوعدك مش هفتح بؤي لحد ماتخلص شغل، انا اخترتك انتِ عشان عارف اني مش هلاقي زيك
"بتبُص له باستغراب"
_في الشغل، مش هلاقي زيك في الشغل
"بتنفُخ" -ماشي

دخلت قعدت وفتحت شنطة الكاميرا بدأت ترتب ادواتها عالترابيزه "شوف حد من الستَف يساعدني عشان المساعده بتاعتي وقفت شغل"
_انا ممكن اساعدك
-بنفسك؟ كتر خيرك والله!
_بغض النظر عن طريقتك، هستحملك عشان انا غلطت بس
-اتفضل وديها هناك عشان هنبدأ بالجزء ده
_حاضر

بدأت تصور السيشن وهو بيساعدها ف نقل المُعدات وغيره..
"العصير يافندم"
-هات يامحمد، هات
_بصي العصير ده مش موجود في المنيو، عشان بيتعمل ليا انا بس، فـ جربيه هيعجبك
-انا قولت لحضرتك قبل كده انا مبحبش العصير
_والله هيعجبك، ليه مش مديه لنفسك فرصه تجربي، هتخسري ايه يعني
-ممكن نكمل شغل
_ماشي

رايح معاها وفِ ايده كوباية العصير
-انت ليه مصمم تعصبني؟
_انتي اللي عصبيه اوي علي فكره، مع ان ملامحك بتقول انك هاديه جدًا
-وتفتكر لو كنت هاديه مع كل الرجاله اللي اتعاملت معاهم فِ شغل، كانوا هيسيبوني في حالي؟
_امممم، لا في دي عندك حق
-ممكن بعد اذنك تسيب كوباية العصير دي في حته، عايزين نخلص السيشن بعد اذنك
_هسيبها، بس بشرط
-استغفر الله العظيم يارب
_شرط صغير والله
-اتفضل
_اشربي بؤ من العصير، ياستي دوقيه بس

خدت من ايديه الكوبايه وشربِت منها "مبسوط؟"
-هو معجبكيش ولا ايه؟
_لا!، حاجه تاني؟
-لا خلاص، حاجه تاني ايه بقي، اتفضلي نكمل..
"محمد تعالي خد العصير ده"

كملوا السيشن، وخلصوه، قعدت ولمِت مُعداتها، وسابت الكاميرا بره "تحب تشوف الصور قبل مااشتغل عليها؟"

-لا انا واثق فيكِ
_ ..
-كـ شغل، واثق فيكِ كـ شغل
_تمام، كنت عايزه اعتذرلك
-ايه ده، انتِ بتعتذري زينا، انا فاكرك هتسبيني اكُل
_تاكل ايه؟
-هه؟ لا مش مهم، عامة من قبل ماتعتذري، مقبوله
_شكرًا

شالت الكاميرا "ممكن اطلب طلب"
-ياريت!
_عايزه بس مكان أصلي فيه
-اه طبعًا، بصي فيه هناك كده عاليمين، معاكي مصليه؟
_اه معايا، خد بالك بس من حاجتي
-ايلاف انا صاحب الكافيه
_بمعني؟
-حاضر هاخد بالي من الحاجه

راحت تصلي، رجعِت علي الترابيزه اللي قاعد عليها "شكرًا"
-تقبل الله
_منا ومنكم

خدت شنطتها وحاجتها "لما اخلص الصور هكلمك نتقابل عشان تاخدها ان شاء الله"
-لسه متضايقه؟
لبست شنطتها _لا مافيش حاجه

اديته ضهرها وطلبت اوبر ومشيت لحد الباب، ورجعت تاني "آسر"
-ايوه
_ممكن اطلب من العصير الي دوقته تيك اواي
-والله كنت حاسس، اكيد طبعا

راح عالمطبخ ورجع بشنطه كرافت عليها لوجو الكافيه، خدت الشنطه وفتحتها" ايه ده انا طلبت عصير بس"

-اعتبريه اعتذار عن العك الي عكيته ف الكلام معاكِ
ابتسمت _شكرًا

الاوبر جه وركبِت، فتحت الشباك وطلعت الروايه قرِت منها شويه، وصلت للبيت وطلعِت خبطت عالباب، سهام جارتهم اللي فتحِت "اهلا!"

-حبيبتي يالولو، عامله ايه ياروح قلبي
_الحمدلله، انا اسفه مش هقدر اقعد معاكي، اصل ورايا مشوار تاني فـ طالعه اسيب حاجتي وهنزل.

خرجت مامتها من المطبخ "وهتسيبي الممبار ده لمين، ده انا عاملالك ممبار مخصوص، وعزمت سهام اصلها بتحبه اوي"

"شكرا ياماما انا كلت"
دخلت اوضتها وسابت شنطة الشغل، خدت شنطتها والاوردر بتاع الكافيه وخرجِت "عندي سيشن تاني، سلام"

قفلت الباب ونزلت تجري قبل ماجارتها تاخد بالها انها نازله من غير شنطة الشغل..

"الحقيقه ان مينفعش حد يسيب ممبار ماما، بس لو هختار بين الممبار مع لِت سهام او الجوع، فـ اكيد هختار الجوع، كلام سهام بيبقي زي السِم ومبعرفش ارد عليها بسبب حُب ماما ليها اللي فعلًا معرفش سببه لحد دلوقتِ!"

اتمشِت لحد الكورنيش، وقعدت، فتحت الشنطه..
العصير،شاليموه، علبه شفافه جواها قطعة كيك متزينه ب الفراوله، وورقه مكتوب عليها" انا اسف❤️"

بصِت للورقه وابتسمِت، طلعت العصير والعلبه والورقه وصورتهم، خدت الورقه شالتها في محفظتها، وبدأت تاكل الكيك وتشرب العصير..

فعلًا الاعتذار فَن يُتقنه القليلون!

وهي بتاكل، لقِت آسر جاي عليها من بعيد!!!