مسلسل "إيلاف" 🤎

" الحلقه الاخيره "

الحلقه الأخيره من مسلسل "إيلاف"
اليوم السابع "يوم الجمعه" الساعه ٩:٣٠  الصبح ..

رحمه قامِت من النوم ، قفلت الدفايه وفتحت الستاره ، شغلت سورة البقره ، دخلت والدتها وفي ايديها البخور وقعدت تبخَر الاوضه ، قامت ايلاف مفزوعه من النوم ، لبست نضارتها "الاوضه بتولع ولا ايه!"

رحمه : دي بخور امك
والدة ايلاف : ايه امك دي يابت
رحمه : طنط
ضحكوا الاتنين ..
ايلاف : انتوا قايمين بدري كده ليه!
رحمه : ايه يابت البرود ده ، النهارده يوم كتب كتابك ، قومي ياختي خلينا نفطر ونبدأ مسكاتنا وليلتنا يلا !

قامت ايلاف من علي السرير ووضبته ، لمِت شعرها ودخلت الحمام غسلت وشها بالغسول واتوضِت وغسلت سنانها وحطت مرطِب وخرجت لبست الاسدال وفرشت المصليه وصلِت وقعدت تقرأ سورة الكهف ..

دخلت مامتها "خلصتي ولا لسه عايزين نفطر؟"
شاورت ايلاف بإنها تصبر ، فضلت واقفه لحد ماايلاف قفلِت المصحف "خلاص خلصت"

دخلت رحمه وفي ايديها طبق بتاكل منه "لو مجتوش فطرتوا هخلص الاكل"

خرجوا ورتبوا الفطار علي السُفره ، قعدوا يفطروا كلهم ، رحمه عماله تهزر مع والدة ايلاف ، وايلاف ساكته خالص بتاكل وهي سرحانه ..

رحمه : ايلاف ، ايلاف انتي نمتي ولا ايه؟
ايلاف : ايه في ايه؟
والدتها : الحقي دي بتسرح من دلوقتي ، طب استني ياختي لما نكتب الكتاب "بتضحك"
رحمه : هنبدأ النكد بدري النهارده؟
إيلاف : نكد ليه ، انا متوتره عادي يعني ..

مسج من شادي "صباح الخير علي نصيبي الحلو ، وعوضي اللي نساني اللي فات من عمري ، وأرق بنت شافتها عيني ،جاهزه ياأجمل عروسه هتشوفها عيني ؟"

فتحت المسج وابتسمِت ..

رحمه : ايوه ياعم ابتدينا
والدتها : شوفي يابت يارحمه برنامج ايه اللي بينزل عالتليفون وبيشيل التوتر كده اصلي محتاجاه
رحمه : ده برنامج شادي تلزيقو بس مش بينزل غير علي تليفون ايلاف بس
ايلاف : خلصتوا تريقه؟ نهدي بقي ونفطر
رحمه : ناوليني ياطنط طبق المربي الملزقه اللي هناك دي
والدتها : بس دي ملزقه اوي مش هتعرفي تاكليها
ايلاف : يالهوي علي خفة الدم ، انا قايمه اجهز الماسكات بتاعتي

قامت ايلاف دخلت اوضتها ، وردت علي شادي "صباح الورد علي سندي ، راجلي ، حمايتي ، ودعوتي اللي ربنا استجابها ، علي اد مانا متوتره علي اد مانا مبسوطه اني هبقي بإسمك" ورجعت بعتت مسج تانيه "شايف الحُب خلانا ملزقين ازاي؟"

شادي : 😂😂😂😂😂😂
شادي : ملزقين؟ فيه حد يقول كده في يوم زي ده
ايلاف : اه اهلي 😂🤝🏻
شادي : سيبك منهم ، خلينا احنا مع بعض ،فيه مفاجآت كتير مش عارفه اوريكي انهي فيهم واسيب الباقي لما تيجي
إيلاف : وريني اي حاجه منهم طيب