مسلسل "إيلاف" 🤎

" الحلقه الـ ٢١ "

الحلقه الـ ٢١ من مسلسل "إيلاف"

خرجت في البلكونه ورفعت ايديها عشان المطر ينزل عليها، قعدت تضحك وتتنطط وكانت مبسوطه اوي بالمطر، طلعت تجري تصلي وهي بتمطر وقعدت تشكر ربنا انه طبطب عليها بالمطر، خلصت صلاه ودخلت عملت قهوه، وقعدت في البلكونه تشرب قهوتها وهي بتمطر..

عربية شادي جايه من بعيد، بيخرج من العربيه وبيطلع الشمسيه فتحها، وطلع من العربيه معاه بوكيه ورد توليب، ودبدوب شلبي اللي فِ كرتونها المُفضل..

دخل مدخل العماره وخرج فاضي ركب عربيته وفضِل جواها، بعتلها مسج "افتحي الباب"

خرجت فتحت الباب وخدت البوكيه والدبدوب ودخلت تجري علي البلكونه بصِت عليه، لسه واقف بالعربيه..

لبسِت جاكيت بزعبوط علي البيجامه وقفلته وتحتيه حجاب لفته اي كلام عشان يداري شعرها وفوق البنطلون جيبه، ونازله زي الدبدوب..

طلعت تجري في المطر وخبطت علي باب العربيه "انزل"
فتح الباب "ادخلي الدنيا بتمطر"
بتشدُه من العربيه "بقولك انزل مانا عارفه انها بتمطر"
نزِل من العربيه وماسك الشمسيه وبيحطها فوقيها، خدت الشمسيه قفلتها وشدته بعدته عن العربيه "تعالي نجري في المطر"

_انتِ مجنونه، الجو تلج ومطر تجري ايه
-طب تعالي نتنطط
_انتي عيانه ولا ايه مالك
-خلاص امشي انت

المطر شديد، والجو برد، سامعه صوت المطر وهو بيخبط ف الجاكيت والزعبوط، وبتلمس مياة المطر بصوابعها الرفيعه زي الأطفال، عماله تجري وتتنطط وتضحك، مش بتفكر في حاجه غير انها تعيش لحظه حلوه وبس..

جري شادي وراها "استني ياهبله هيجيلك برد"
وقف شادي وهو شايف ادامه جزء جديد في ايلاف، اول مره يشوفه ادام عينيه، ايلاف الطفله، اللي بتجري وتلعب وتتنطط من غير ماتفكر بعقل زيه او زي اي حد مكانها، في اللحظه دي مكنش حاسس بالسقعه، ولا المطر، ولاحتى الناس اللي قالت عليها مجنونه، مكنش حاسس غير بقلبه وهو بيدُق من الفرحه، اد ايه محظوظ ان الطفله الصغيره دي تبقي البنت اللي هيكمل معاها حياته ❤️"

راحتلُه وهي بتضحك وبتنهَج ومبلوله..
-كفايه كده انا سقِعت، ايه واقف متنح كده ليه؟
_مش مصدق، ليه مبتديش الحريه كده لمشاعرك ونفسك ف كل حاجه فِ حياتك؟
-عشان الحياه مش مدياني فرصه اكون حره، انا عمري ماكنت حُره، عارف امتي اختارت، واختارت صح بجد
_امتي؟
-لما اخترتك انتَ، انتَ الراجل المناسب ليا ياشادي
_انا بقي مختارتكيش،ومش فارق معايا انتِ مناسبه ليا ولا لا، ومش مهم اتخانق معاكِ كل يوم ولا حتي كل دقيقه، انا حبيتك كده زي مانتِ، بلسانك الطويل، بالدبش بتاعك، بكسوفِك، بـ هبلك، بـ تصرفاتك المجنونه، مش فارقه معايا احنا هنتفاهم ولا لا، ولو هتنكدي عليا عمري كله، كفايه انه النكد جاي منك أنتِ، عارفه فيه جمله كنت بشوفها علي طول عالفيسبوك بتقول "الف خناقه معاك ولا ضحكه مع غيرك"
-عمري ماتخيلت ان فيه حد يحبني كده، طول الوقت كنت شايفه كل الرجاله زي بابا، مجرد مايشيل مسئوليه يهرب، مبيعرفوش يبقوا سند وضهر، انا بعيش لحظات مكنتش بتخيل حتي انها ممكن تحصل معايا، انا؟ ايلاف؟ مبسوطه مع راجل؟ مش مصدقه انك عرفت تخليني احبك وتوصلني للمرحله دي معاك! ده عمل؟
بيضحَك "لو علي الأعمال يبقي انتِ اللي عامله عمل بقي، مافيش راجل عاقل يقعد السنين دي كلها علي امل ان واحده تديله فرصه"