مسلسل "إيلاف" 🤎

" الحلقه الـ ١٣ "

الحلقه الـ ١٣ من مسلسل "إيلاف"

دخلت غيرت هدومها واتوضِت وصلِت وقعدت تعيط وهي بتصلي لحد ماحسِت انها مرتاحه، طلعت في البلكونه وفضلت قاعده باصه للسما شويه، خرجت وقفلت باب البلكونه والستاره وقعدت علي الارض وجابت ورقه وقلم وبدأت تكتب كل حاجه مضايقاها، اخر كلمه كتبتها "آسر"

مسج من آسر "انا فركشت خطوبتي عشان اثبتلك اني فعلًا عايزك، ممكن نتكلم؟"

رمِت الفون علي السرير وحطِت ايديها علي دماغها..
طلعت عالسرير خدِت المنوم بتاعها ونامت، المنبه رَن الساعه ٨ الصبح، غسلت وشها وبصِت في المرايه "يلا نصلح كل الغلط الي عملناه فِ حياتنا"، غسلت وشها وسنانها واتوضِت وصلِت ودخلت البلكونه تسقي الزرع، طلعت رواية جديده وقلم وحطتهم علي الترابيزه، ودخلت عملت قهوتها وقعدت تقرا شوية، وبعدين قامِت لبست لبس الرياضه بتاعها وخدت معاها ازازة مياه ونزلت تجري عالنيل وهي بتسمع كرتون" شركة المرعبين المحدوده"، خلصِت جري ودخلت كافيه قريب منها، وطلبت توست بالتونه وسلطه وعصير برتقان، وقعدت مسكِت الفون..

"محتاجه اخد قرار صح، قرار مندمش عليه، ايوه، سجلِت رقم آسر بـ" غلطه" وعملت بلوك عليه فِ كل حته، وسجلِت شادي بـ Mysafe zone وبعتتله علي الواتساب "صباح الخير"

الفطار وصل، صورته ونزلته علي حسابها وقفلت التليفون وقعدت تفطر وهي بتسمع الكرتون، خلصِت وحاسبِت وقامت روحت البيت، دخلت الشقه لقِت مامتها قاعده في الصاله "اظن ده الوقت اللي المفروض تقوليلي فيه مالك؟"

دخلت باسِت راسها وقعدت جنبها "انا بحبك اوي ياماما"
ابتسمت مامتها "وانا كمان بحبك يالولو "

_هتزعلي لو قولتلك ان المره دي مش حابه احكي حاجه؟ بس بطمنك اني كويسه وان اللي فات ده كله كان عك وانا هصلحُه
-لا مش هزعل ياحبيبتي المهم انك بخير
_منحرمش منك

دخلت غيرت هدومها ولقِت الورقه الي كانت كاتبه فيها ايه مضايقها امبارح بليل، مسكت الورقه حرقتها، وطلعِت ورقه وكتبت عليها "تستاهلي الاحسن ديمًا" ولزقتها علي المرايه بتاعتها..

رد شادي "صباح النور، ازيك؟"
_كويسه الحمدلله، جاهز للسيشن؟
-النهارده؟
_ايوه، مشغول؟
-لا فاضي طبعًا، كاجوال صح؟
_ايوه
-طيب هنصور فين؟ فيه لوكيشن فِ دماغك معين؟
_عايزاه عشوائي، يعني لو ممكن شوارع وسط البلد ايه رايك؟
-هلبس وابعتيلي اللوكيشن الي هنصور فيه
_اوك
-فطرتي؟
_اه الحمدلله
-طب شربتي قهوتك؟
_ايوه الحمدلله
-ماشي

طلعت الشنطه وحطِت الكاميرا والروايه وباقي حاجتها الشخصيه وغيرت لبسها لـ بلوفر جراي فاتح وجيبه سوده مع طرحه سوده وكوتش أبيض وطلعِت السلسله لـ بره، خرجت لمامتها "انا نازله سيشن بس مش شغل، فور فري، حاجه حابه اشتغلها يعني، دعواتك"