مسلسل "إيلاف" 🤎

" الحلقه الخامسه "

الحلقه الخامسه من مسلسل "إيلاف"

"ايلاف قاعده بتاكل وفاتحه فيلم كوميدي وبتضحك"

-حصل ايه، مالك؟
_مالي يابنتي مانا..

مكالمة من "الكلاينت الغلس"

جريت رحمه وقعدت جنب ايلاف ووقفت الفيلم "ردي ردي"

دخلت امها قعدت جنبهم..
_الو
-اسف لو بتصل بليل
_ولايهمك
-بصي انا عارف انك فهمتيني غلط، وحقك، لاني بدأت الموضوع غلط فعلًا، ممكن تديني فرصه نتعامل من الأول خالص
_بمعني؟

امها بوشوشه "قوليله هتتقدم امتي"
ايلاف بتبعد التليفون..
رحمه بوشوشه "ياطنط هيفتكرها واقعه، اتقلي يابت"

-يعني بمعني انك تعتبري اللي فات ده محصلش، حتي رقمي امسحيه وانا هتعرف عليكِ بشكل احسن
_مش فاهمه قصدك

امها بوشوشه "ايه ياختي الاستعباط ده هو بيلف ليه مايقول عايز اتجوزك ونخلص بقي"
رحمه بوشوشه "الواد ده ذكي، مش عايز يقول كلمه تشيله مسؤليه ويتحاسب عليها"

-اعملي بس اللي بقولك عليه، وبعدين هتفهمي
_تمام، فرصه سعيده
-انا اسعد

قفلت المكالمه ومسحت الرقم فعلًا..

رحمه : انا ليه بدأت مرتاحلوش
مامتها : ولا انا يابت يارحمه، اول مره اتفق معاكِ ع حاجه
ايلاف : مش مرتاحين ازاي، تفتكروا هيخلع يعني؟
رحمه : مالو كان هيخلع اكيد مكنش تتصل اتصل وماصدَق
مامتها : هيتقدم يعني تقصدي؟
ايلاف : هيتقدم ازاي لما هنمسح الرقم ووقفنا شغل وهو ميعرفش حتي انا ساكنه فين!
مامتها : انا مش فايقه لجو العيال ده انا قايمه اتعشي

خرجت مامتها وجريت رحمه قفلت الباب ورجعت قعدت عالسرير جنب ايلاف وهي بتاكل حته من البيتزا "بت هو عاجبك؟"

_مش عارفه، اصل بجد انا ملحقتش اعرف اي حاجه، راجل غريب بيحاول يلطَف بس مش اكتر!
-اجرب اكلمه مثلًا ونشوف كده هو بيكلم اي واحده ولا محترم
_انا مستغربه واحده ف سنك يارحمه بالغباء ده، الحركه قديمه ومفقوسه جدًا علي فكره
-صح عندك حق، طب هنعمل ايه
_ولا اي حاجه، هعيش حياتي طبيعيه ولما يفتكرني الصاله موجوده والقهوه في المطبخ
-ع رأيك، بلا رجاله بلا هم، تعالي نكمل الفيلم واحكيلي اللي فات منه

قعدت رحمه وايلاف كل واحده فيهم متغطيه ببطانيه ومشغلين الدفايه، علبة البيتزا مفتوحه وكل واحده فيهم ماسكه حته منها بتاكلها، كوباية البيبسي خدتها رحمه وايلاف بتشرب من الازازه عشان مكسلين يجيبوا كوبايه تانيه، شنطة فيها باقي الحلويات الي عمو ابراهيم جابها، والفيلم الكوميدي شغال..

خلصت القعده الحلوه، نامت رحمه، وفضلِت ايلاف سهرانه مش عارفه تنام، غطِت نفسها ب البطانيه وحطت حجاب ع شعرها وفتحت باب البلكونه براحه، دخلت وقفلت علي نفسها، فضلت باصه علي التليفون، تفتح الشات وتقفله، تفتح الشات وتقفله..