مسلسل "إيلاف" 🤎

" الحلقه التامنه "

الحلقه التامنه من مسلسل "إيلاف"

_ايلاف بتحب ايه
_ايلاف بتحب ايه
_ايلاف بتحب ايه
_ايلاف مبتحبش تسيب حقها.

جابت التليفون وجابت رقم آسر، واتصلت بيه..

-الو
بتبعِد التليفون وبتاخد نَفَسها وبتقربُه تاني "أيوه"
-مين معايا؟
_ماشاءالله لحِقت تمسح الرقم وتنساه؟
-لأ بس مش مصدق إنك متصله بعد اللي عملتيه
_اللي انا عملته!، وكلامك كان عادي؟
-عارف اني قولت كلام مينفعش و..
_طب تيجي نبدل؟
-مش فاهم
_يعني تخيل اجي اتوددلك وبعدين اقولك اصلي مخطوبه، هتشوفني ازاي؟
-الموضوع مختلف، انتِ ليه مصممه متسمعنيش!
_كلامك هيغير نظرتي ليك مثلًا؟
-اه هيغير
_سمعاك
-الكلام اللي هقوله مش هينفع في التليفون، انتي فعلًا مش فاهمه حاجه
_ اصلي ٣٠ سنه فـ تلاقي دماغي مش اد كده
-بصي انا عارف ان اللي قولته ده ميصحش وحاسس اد ايه انا زباله اني طلعت مني جمله زي دي بس انا عصبني انك مدتنيش اي فرصه اشرحلك وضعي عامل ازاي!
_وضعك وانت خاطب؟ انت مصدق نفسك، انا بعمل ايه بجد، احنا بنتناقش في ايه، هو ده موضوع نقاش اصلًا!!
-ياستي اديني فرصه اقولك ظروفي حتي!

قفلِت السكه وفضلِت تردد..
مكنش ده هدفي من المكالمه
مكنش ده هدفي من المكالمه
مكنش ده هدفي من المكالمه

"انا ازاي غبيه كده، مكنش المفروض اديله فرصه يتناقش، ده خاطب ياايلاف، خاطب، لو كان عايزك كان فركِش خطوبته عشانك، هو عايزك للتسليه، ليه قليت بنفسي كده ليه!"

دخلت مامتها وفي ايديها صنيه فيها اكل "عارفه انكم مكلتوش وانتِ متغدتيش فـ يعني حتي اتعشي!"

_ماشي ياماما سيبي الاكل وانا لما أجوع هاكُل
-احنا اتفقنا، مهما حصل الاكل مالوش علاقه بالزعل
_وانا عند اتفاقي ياماما متقلقيش
-ماشي الاكل اهو

بصِت للنوت بوك وابتسمِت باستهزاء، قطعت الورقه ورمتها فالباسكِت وقفلت النوت، فتحت الفون تشوف لو فيه شغل جديد ملقتش اي رسايل عالبيدج..

حسِت بالسقعه فـ دخلت وقفلت باب البلكونه والستاره وفتحت الدفايه، قعدت تتعشي وخلصِت وخدت المنوِم ونامت.

الساعه ١٢ الضهر، الجو جميل Reminder "سيشن عيدميلاد"
قامِت بسرعه ولبست النضاره ومسكت الفون "انا ازاي نسيت، يانهار ابيض، اعمل ايه"، قامت تجري عالحمام غسلت وشها وسنانها واتوضِت، طلعت بطارية الكاميرا تشحنها وحطت الحاجه فالشنطه، لبست الإسدال وفرشت المصليه، دخلت مامتها "في ايه يابت مالك"

_عندي سيشن ونسيته
-ايه يعني إلغيه قوليلهم فيه ظروف
_متعودتش اهرب من حاجه عليا، وبعدين ليه انكد عليهم فِ يوم جميل زي ده، البنت متفقه معايا عشان تعمل مفاجأه لأخوها اللي مسافر بقاله سنين يعني هبوظ يوم مهم بالنسبالها
-طب مش هتفطري
_مش هلحق ياماما
-هحطلك فطار ف لانش بوكس
_ايه جو العيال ده
-والله ماهتنزلي من غيره
_ياستي حاضر