مسلسل "إيلاف" 🤎

" الحلقه الـ ٢٨ "

الحلقه الـ ٢٨ من مسلسل "إيلاف"
اليوم الخامس "يوم الاربع" الساعه ٩ الصبح ..

قامِت من النوم لبست نضارتها وبعتت لشادي "صباح الخير، قولت لرضوي تيجي معانا؟ وقول لمامتك عشان متزعلش لو حابه"

وبعتت لرحمه "رحومتي ، ها فاضيه النهارده ولا ايه؟"
وقامِت من السرير ، دخلت غسلت وشها ، اتوضِت وصلِت ، طلعت شيت ماسك حطتُه ودخلت عملت قهوتها وهي بتدندن ، خدت قهوتها حطتها فالبلكونه ، حطِت طرحه علي شعرها وقعدت تشرب قهوتها بالماسك وهي بتتفرج عالشارع والناس ..

رد عليها شادي "صباح الخير ياحبيبي ، هما للاسف مصممين انها مناسبه خاصه والمفروض نكون انا وانتِ لوحدنا ، فـ شوفي حابه تجيبي مين معانا وهتنزلي امتي عشان اجي اخدكُم"

بعتت المسج لـ رحمه " تفتكري بيقول كده ليه؟ هما فعلًا ممكن يقولوا كده؟"

رحمه : ارحمي الواد ،هيموت من ظنونك المهببه!
إيلاف : امال يقصد ايه؟
رحمه : ميقصدش ، عندهم حق ، فستان انتِ هتلبسيه في مناسبه تخصك وتخصه ، هتمرمطي الناس معاكي ليه
إيلاف : ده معناه انك مش جايه ياهانم؟
رحمه : ولا انا ولا امك ، بطلي دلع وخدي خطيبك وروحوا جيبوا الفستان ياحبيبتي ، عيشوا ذكرياتكم في هدوء متصدعوش الناس معاكم
إيلاف : تصدقي انك كلبه 😂😂😂
رحمه : الله يسامحك 🤝🏻 ، يلا روحي اتبسطي وابعتيلي الصور لما ترجعي اتفقنا؟
رحمه : اتفقنا

قامِت شالت الماسك وحطِت مرطب و طلعت دريس شتوي لونه كافيه وطرحه بني وهاف بوت ابيض ، قعدت تكوي اللبس و حضرت الحاجه وحطتها علي جنب ..

طلعت مانيكير بني ، وقعدت تحط منه وهي بتتفرج علي كرتون سيمبا ، دخلت مامتها "انا دخلت اوضه غلط ولا ايه"

-في ايه؟
_ايلاف بتحط مانيكير وكاويه لبسها! هي الدنيا جرالها ايه!
-هتحرجيني هشيل المانيكير والله
_لا لا خلاص ، حلو يابت اللون ده ابقي هاتيلي منه
- خديه لو عايزاه
_لا خليه انا عايزه واحده ليا انا عشان اللون عجبني
-حاضر ، غريبه مسألتنيش يعني انا رايحه فين
_لا ما شادي قالي
-انا من ساعة ماعرفت شادي وانا بطلت اتسأل ف اي حاجه ، ماشاءالله الاخبار بتوصلك قبلي
_طبعًا ، ابني حبيبي
-ربنا يخليهولك ياختي
_خلي بالك منه يابت لاواحده تعاكسه كده ولا كده
-اه وهو حلو يتعاكس
_طبعا
-بصي كده ايه رايك؟
_حلو عليكِ ، مش هتفطري ؟
-لا مش جعانه ، كُلي انتِ
_انتِ شاربه قهوه يابنتي غلط كده!
-هفطر بره ياماما خلاص
_ماشي

خرجت مامتها ، وقامِت ايلاف صلِت الضهر ولبست وكلمِت شادي يجيلها علي البيت ..

وصل شادي واتصل بيها تنزِل ، نزلت ايلاف ، ركبت وهي ضامه ايديها الاتنين في بعض ..

-حلو اوي اللي في ضوافرك ده
_شوفته ازاي
-عيب عليكِ هو احنا بنهزر ولا ايه
_بقالي كتير اوي محطتش مانيكير ، حلو؟
-حلو جدا ، انتي بتحبيه بقي؟
_اه كان مُتعتي من بعد التخرج ، عندي الوان كتير بس اغلبهم باظوا عشان بقالي كتير مش بشتري لاني مش بستخدمهم
-هتحطي منه يوم كتب الكتاب
_اه طبعًا ، بس انا مش عايزه احط ميك اب ايه رايك؟
-مش محتاجه والله
_عارفه انها متاخره ،هو احنا ممكن نعمل كتب الكتاب في الجنينه عندكم؟
-ده ينفع جدًا ، تحبي نكلم ودينج بلانر تظبطلنا الدنيا،فيه واحده صاحبة رضوي نعرفها هتعملنا حاجه حلوه
_لا لا بلاش تكاليف ملهاش لازمه ، يعني نعمل ترابيزات ع اد العيلتين و كرسين لطاف لينا كده ووانا زي ستاره بيضه كده بلايت هادي ، ولو ضروري يعني ممكن موسيقي هاديه بلاش اغاني دوشه ، ايه رايك؟
-حلو جدًا ،هعملك اللي انتِ عايزاه