مسلسل "إيلاف" 🤎

" الحلقه الـ ٢٤ "

الحلقه الـ ٢٤ من مسلسل"إيلاف"

اليوم الأول "السبت" الساعه ٨ الصبح ..

المنبه بيرِن ، قامت من النوم ، بتبُص علي دبلتها ، واضح انه مكنش حلم وانها فعلًا اتخطبت ، قعدت تبص للدبله وتلف ايديها ، قامت من النوم ودخلت خدت شاور وصلِت الصبح ودخلت تعمل قهوه ،فتحت الراديو ولقِت اغنيه لام كلثوم لاول مره تركز في كلماتها "الف ليله وليله" ..

يا حبيبي
يا حبيبي
الليل وسماه ونجومه وقمره، قمره وسهره
وإنت وأنا يا حبيبي أنا يا حياتي أنا
كلنا، كلنا في الحب سوا ..

خدت قهوتها وخدت معاها الراديو ، وشغلته في اوضتها وقعدت في البلكونه ، الجو برد بس جميل، قعدت تشرب قهوتها وهي بتسمع ومستمتعه ومبسوطه ..

يا حبيبي يلا نعيش في عيون الليل
يلا نعيش في عيون الليل
ونقول للشمس تعالي، تعالي
بعد سنة، مش قبل سنة

خلصت القهوه وقعدت تسمع الاغنيه وهي بتبُص للشارع..

إزاي، إزاي، إزاي أوصف لك يا حبيبي إزاي
قبل ما أحبك كنت إزاي يا حبيبي
إزاي، إزاي، إزاي أوصف لك يا حبيبي إزاي
قبل ما أحبك كنت إزاي يا حبيبي

فعلًا الاحوال بتتبدل في لحظه، بعد ماكنت شايفاه أخويا ومستحيل أحس ناحيته حاجه، هيبقي جوزي بعد اسبوع واحد بس! الموضوع مُرعب ومريب بس فيه حاجه حلوه كده بتخلي الواحده قلبها بيرفرف من السعاده ، طول الوقت بدور علي نفسي ، بحب ايه ومبحبش ايه ، كنت طول الوقت متردده ومش عارفه انا مين ، لحد ماظهر شادي وبدأ يوريني نفسي أدامي ، ايلاف بتفرح ب ايه ، بتحب ايه ، مبتحبش ايه ..

اتصل شادي ..

-كنت لسه بفكر فيك
_استرها يارب، وبعدين صاحيه بدري ليه؟
-لا استني ،عرفت منين اني صاحيه بدري اصلا!
_ضرية حظ والله ، قولت ارن وزي ماتيجي
-اوعي تكون مراقبني ، او مثلا ..
_كفايه خيال اوفر ابوس ايدك ،والله ضربة حظ احلفلك ب ايه تاني!
-ماشي
_مش هتنزلي تجري؟
-ماليش مزاج اجري النهارده
_طيب ليكي مزاج لإيه؟
-مش عارفه ، انت ايه رأيك؟
_ايه ده ،اختارلك تعملي ايه؟
-اه
_بجد؟
-مالك في ايه!
_اول مره اختار خطط ليوم مش يومي
-طب يلا ابهرنا
_ايه اكتر فطار بتحبيه؟
-سندوتشات جبنه مع خيار
_شربتي قهوتك؟
-اه الحمدلله
_بتحبي ايه غير القهوه ؟
-مجربتش اشرب غيرها ، او بصراحه اقولك فيه عصير كده بس بلاش بقي عشان منتخانقش
_لا قولي
-اوعدني مش هتزعل
_اوعدك
-في مره كنت مع آسر
_يادي زفت
-خلاص مش قايله
_لا انا زفت ديمقراطي اتفضلي!
-ماشي ، المهم يعني شربت عصير هناك كان عاجبني اوي
_تعرفي اسمه؟
-بصراحه لا ، بس هو خاص بيه مش موجود في المنيو اعتقد
_ماشي ، البسي حاجه تقيله وكلميني اجي اخدك
-اوك سلام
_سلام

قامت لبست بلوفر بني وجيبه بيج وحجاب بيج وجاكيت من اللي شادي كان جايبُه ،ودخلت قالت لمامتها انها نازله ،بعتت لـ شادي وقعدت تقرا في كتاب لحد ما وصل،نزلت وركبت العربيه ..