مسلسل "إيلاف" 🤎

" الحلقه الـ ٢٣ "

الحلقه الـ ٢٣ من مسلسل "إيلاف"

مشيت مامتها وقامت ايلاف لبسِت معطف جلد اسود علي جيبة سوده وهاف بوت اسود وحجاب اسود، وطلعت السلسله ظهرتها ونزلت تركب عشان تروح اللوكيشن..

وصلت الكافيه ودخلت ملقِتش حد غير مامتها ورحمه واهل شادي واخته واتنين مصورين بيصوروها ، الكافيه هادي خالص ، ورد مجفف في كل مكان في الارض ، بلالين ملونه نازله من السقف، وكتب مرصوصه علي شكل Will you marry me ، خرج شادي من جوا وفي ايده فنجان قهوتها جواه دبله وقرب لـ ايلاف ..

شادي : مافيش اغاني عشان مبتحبيش الدوشه،كتب عشان بتحبي القرايه،ودبلتك في فنجانك اللي بتشربي فيه كل يوم ، انا عارف انك موافقه عليا ، بس انا جاي النهارده اقولك ادام اهلي واهلك اني مش لو لفيت العالم،انا سافرت ولفيت بالفعل ومحدش عارف يوقعني غيرك وبدون اي مجهود ،انا بحبك وعشان بحبك انا عايز اتجوزك، عايزك تبقي حلالي ياايلاف ونكمل عمرنا سوا،حتي لو نكتب الكتاب ولما تقرري نعيش سوا هعمل ده فورًا ، انا خايف تضيعي من إيدي في اي لحظه ،تتجوزيني ياإيلاف؟

كلهم واقفين ومستنين ردها ..

موقف ميتنسيش في حياة اي بنت، او بمعني اوضح اي بنت تتمناه ، لكن الحقيقه ان إيلاف مختلفه عن اي بنت تانيه،لانها مخدتش نصيبها من الامان والحنيه والسند،عاشت طول عمرها بتعافر وبتحارب عشان تعيش حياه طبيعيه او اقل من الطبيعيه كمان، شادي كان طوق النجاة اللي بينقذها من الغرق ، بس ياتري هل فعلا شادي يستحق انه يكون سند إيلاف؟

ايلاف واقفه قلبها بيدُق بسرعه ،عيونها كلها دموع بتحاول تحبسها بس مش عارفه ، مُبتسمه ابتسامة فرحه وراها خوف ورهبه ..

شادي : قولتي إيه ياإيلاف؟ تتجوزيني

شهيق ، زفير ، شهيق ، زفير "تنهيده"

إيلاف بإبتسامه : موافقه!

اداها الدبله ولبستها ، هيصوا كلهم واهل شادي حضنوه ورحمه ووالدة ايلاف حضنوا ايلاف وباركوا كلهم لبعض ، وبعدها رضوي حضنت إيلاف "انا مبسوطه ان ربنا عوضني بأخت جميله زيك"

شادي : يلا ياايلاف ناخد كام صوره للذكري
إيلاف : يلا بينا

قعدوا كلهم علي ترابيزه،ووقفت ايلاف مع شادي يتصوروا "هو انا احرجتك باللي عملته ده؟"
إيلاف : لا طبعا ليه بتقول كده؟
شادي : اصل انا حاسس انك مش مبسوطه
إيلاف : لا لا ..
شادي : إيلاف ، محدش فينا بيعرف يخبي علي التاني ولا حتي يكدب ، كلميني بصراحه ، انتِ عايزاني؟
إيلاف : انا عمري ماهلاقي زيك ، انا بس الموقف خضني ،وبعدين خايفه ، ده جواز ياشادي ، فاهم يعني ايه جواز؟
شادي : هنكتب الكتاب مش بقولك يلا نعيش مع بعض، بس عايز يعني مبقاش قلقان كده وانا بكلمك ، مش عايز يبقي فيه بينا حواجز
إيلاف : انا فاهماك ، ممكن بس نتبسط باليوم وبليل نتكلم،اتفقنا؟
شادي : بس اشوفك مبسوطه وهسكت
إيلاف : ياعم والله مبسوطه