My Green Forest ( Complete)

Episode (37)

Unicode

ထင့်နဖူးအပေါ် လက်ကိုတင်၍ အပူငွေ့ရှိ ၊ မရှိစမ်းကြည့်လိုက်တော့ ခပ်အေးအေးအထိအတွေ့က သူ့ကိုကြိုဆို၏ ။ ထိုအခါမှ သူလည်း ရဲရဲတင်းတင်း သက်ပြင်းချနိုင်သည် ။

တော်ပါသေးရဲ့ ။ ဖျားမနေလို့တော်ပါသေးရဲ့ ။ ထင် ညဘက်ကြီးဖျားနေရင် သူတစ်ယောက်တည်းဆိုတော့  ဘာလုပ်ပေးရမှန်းမသိဘူးလေ ။

အချိန်ကြာလာသည်နှင့်အမျှ အဲကွန်းမှထွက်လာသောအအေးဓာတ်မှာ ပိုအေးလာသကဲ့သို့ပင် ။ ဝတ်ထားသည့်အင်္ကျီကလည်းလက်တိုဖြစ်နေသဖြင့် လက်မောင်းနှင့်လက်ဖျံတစ်လျှောက်သည် ရေခဲရိုက်ထားသကဲ့သို့အေးစက်လာသောအခါ အလိုလိုနေရင်း အဲကွန်းတပ်ထားသည့်နေရာကိုလှမ်းကြည့်မိ၏ ။ အအေးကြိုက်သည့်ထင်က အဲကွန်းကိုအမြင့်ဆုံးထား၍ဖွင့်ထားသောကြောင့် အအေးမကြိုက်သည့်သူ့မှာ နေ၍ပင်မရတော့ ။ ထင့်ကိုကြည့်လိုက် ၊ အဲကွန်းကိုကြည့်လိုက်ဖြင့် တစ်ယောက်တည်းအတွေးများနေပြီးမှ

" ခဏပိတ်ထားလိုက်အုံးမယ် "

ဟု ရေရွတ်မိရင်း ခြေလှမ်းများကိုပါ အဲကွန်းရီမုထားသည့်နေရာကိုရွေ့မိ၏ ။

ထင်ကတော့ အပူအပင်ကင်းစွာအိပ်မောကျနေဆဲ ။ ညဘက်ဆေးသောက်ရန်အတွက် နှိုးမိတော့လည်း ထင်က သတိလစ်နေသူလိုမျိုး တုံ့ပြန်မှုမရှိပေ ။ သူ အိမ်သို့ မပြန်မိသည်မှာ မှန်သွား၏ ။

ခဏကြာတော့ ထင့်နဖူးစပ်နှင့် နှာတံဘေးဘက်တစ်ဝိုက်တွင်ချွေးများစို့လာ၏ ။ ထင်က တကယ်ကို အပူဒဏ်မခံနိုင်သူဖြစ်ပြီး သူကတော့ အအေးဒဏ်မခံနိုင်သူ ။ ထင်နှင့်သူက အရာရာတွင် ဆန့်ကျင်ဘက် ။

ပိတ်ထားသောအဲကွန်းကိုပြန်ဖွင့်လိုက်ရင်း စားပွဲခုံထက်တင်ထားသည့်တစ်ရှူးဘူးထဲမှ တစ်ရှူးတစ်ရွက်ကိုယူကာ ထင့်မျက်နှာအပေါ်ရှိချွေးများကို ညင်သာစွာသုတ်ပေးလိုက်သည် ။ နိုးသွားမည်ကိုလည်းစိတ်ပူသောကြောင့် သူ့မှာ မဝံ့မရဲ ။ နှာခေါင်းပတ်လည်ရှိချွေးများကိုသုတ်ပေးနေရင်း မှဲ့နက်ထင်းထင်းလေးကြောင့် ခန္ဓာကိုယ်ထဲတွင် ယားကျိကျိဖြစ်လာရသည် ။ ချွေးသုတ်လက်စတစ်ရှူးကို ဘယ်ဘက်လက်ဖြင့်ပြောင်းကိုင်လိုက်ကာ ညာဘက်လက်ညှိုးထိပ်လေးဖြင့် နှာတံမြင့်မြင့်ထက်တွင်နေရာယူထားသည့်မှဲ့နက်လေးကို ထိကြည့်မိတော့ ရင်ထဲတွင် လှိုင်းသေးသေးလေးများဖြစ်ထွန်းလာရပါသည် ။