-
اعتذر ع التأخير وشكراً لدعمكم //
-
رعد رجع الصورة مكانها وقلبه يدق بقوة ، كانت صورة عائلية تجمعه مع أبوه
و سلطان ، ابوه كان مشوه بالصورة من قلم مخطط عليه بلون أحمر و مكتوب
عليها كلمات .. أنا حيوان أنا خنزير أنا مغتصب أنا مسخ البنات ...
طلع بصدمة كبيرة امه تدري ؟؟ أجل ليش ساكته للحين ليش تسألني
ليش قالب على ابوي ؟ ليش تحسسني انها تعشقه وتحبه ..
جلسوا على طاولة الأكل وامه تسولف وتضحك وهو حتى اللقمة مو قادر يبلعها ..
أم رعد : إلا جد رعد ، عط ابوك فلوس ، هو قال لي اطلبك ..
رعد وهو للحين مو مستوعب اللي شافه : طيب ..
سلطان استغرب رضوخ رعد السريع وابتسم في وجه امه ، اللي يعرفه
من رعد أن ابوه خان امه مع مين ما قال له لذا هو قالب عليه ويكرهه ..
-
مشاري : طيب شفيك ؟
سالم ابتسم : ما فيني شي ..
مشاري : ليش كذا ذبلان طيب وصوتك رايح ..
سالم : متى بتجي امي ؟
مشاري : قالت لي نادية انهم في الطريق ..
سالم : ضل لما يجون ..
مشاري : بتنغث من كلامهم ..
سالم مسك يد مشاري وهو متسند : لا تمشي ..
مشاري : طيب ..
دخلت عليه امه وكالعادة قومت مناحة على سالم وليس منعوها منه
بعدين التفت لمشاري : وانت شتسوي هنا ؟
سالم بتعب : يمه خليه ..
أم سالم : مو جايك هالمرض إلا منه ومن امه ..
سالم : استغفرالله ..
مشاري وقف : بتمشى شوي برى وبرجع لك ..
طلع مشاري يتمشى ومسكه جلال لمكتبه ..
مشاري بخوف : سالم فيه شي ؟
جلال وهو يحك شعره : أممم شويه نفسيته تعبانه ، بس مو لهالسبب
ناديتك ..
مشاري : أجل ؟
جلال : أمممم شخبار أمك ؟
مشاري استغرب بس بحزن رد : الحمدلله على كل حال ..
جلال حس فيه : ابوك ضربها ؟
مشاري رفع راسه : آسف مقدر آخذ واعطي معاك على هالموضوع ..
جلال : براحتك ..
مشاري اعتذر مرة ثانيه وطلع وهو يمسح على وجهه ، أمه قالت له
أنها التقت بجلال قبل أبوه ، حست بمشاعر جلال بس كونه دكتور وابن
عايلة كبيرة ما حبت تآخذ أكل كبير فيه وتتحطم ورضت بالحب اللي
زيفه ابوه لها ، لو أن جلال اخذك يمه كان الحين انتي ملكة بين يدينه ،
بس لو يشم أبوي خبر عن هالشي راح يذبحها من دون سبب ..
فدوى : حبيبي أخوي في مشاري ولا فيك ..
سالم بحدة : ومشاري أخوك ولو تجيبون طاريهم من جديد لا تجون لي..
سكتوا وغيروا السالفة ..
دقايق ودق الباب ..
أم سالم تتحلطم : يا ذا النشبة لا تدخله ..
سالم طنش امه : أدخل ..
فتح الباب وانصدم فيهم وسالم انصدم فيه ..
علاء منحرج : آسف ما كنت عارف انو في احد ..
أم سالم وهي تخز علاء من فوق لتحت أناقته طاغيه ..
سالم دق قلبه وعيونه على علاء : علاء ..
علاء ابتسم له : اعتذر بجي بعدين ..
سكر علاء الباب وشاف ابوه في وجهه ..
جلال : توك ما راح تجي ومدري ايش مسرع خقيت ورجعت ..
علاء وهو يتلفت حولينه : شفيك تتكلم بصوت عالي ..
جلال : بإختصاراً لو بتغثه وتضايقه اطلع ..
