ملحوظة: الروايه والشخصيات والاماكن كلها من وحي الخيال وليس لها صلة بالواقع
5:30 pm
الخرطوم.. الرياض
في كافيه صغير وعلى الشارع كانو قاعدين في طاولة قصاد بعض ، كانت لابسه فستان ابيض مع حزام بني ورابطة شعرها الاسود وبتتخللو بعض الخصلات المصبوغه باللون الكبدي(كركداوي) ذيل حصان ، وشها كان محمر من اثر الصدمة وبتعاين للشخصية القدامها ، رياض كان متكل ايدينو على الطاولة وضاميهم وخاتي راسو عليهم ، كان لابس قميص اسود وبنطلون كحلي وساعه سوداء من ماركة dk..
اسيل وهي لسه في صدمتها: لا يعني ممكن تفهمني الحاصل شنو
رياض رفع راسو وظهرت ملامحو الباهتة : اسيل رجاءََ افهميني انا ما بقدر اقول ليك اكتر من كدا ، ارجوك اسمعي كلامي واعملي البقولوا ليك من دون اسئلة كتيرة
اسيل: ما هو ممكن يا رياض تختفي ١٠ ايام فجأة ولمن تظهر تجي تقول لي لازم تسافري خلال اليوم دا وريني على الاقل في شنو خلاك تتغير كدا وو.. (بصوت حزين) وحالتك تبقى بالشكل دا
رياض بنفاذ صبر: اسيل اسيل ، اذا عندي ذرة غلاوة عندك اسمعي كلامي
اسيل بانفعال : ما بسمع يا رياض وما متحركه من مكاني دا لأي حته غير لمّا افهم الحاصل عليك شنو (اتكلت على الكرسي وربعت ايدينها ورفعت حاجبها الايسر بتحدي)
رياض مسح وشو واتأفف: "هسي لو كلمتها حتذيد عناد ذيادة اعمل شنو ياربي.. مافي حل حاكلمها" طيب اسمعيني الفترة دي اي زول عندو علاقه بي ولا بقرب لي حيكون في خطر وانا ما عندي زول هنا غيرك فاهماني؟
اسيل عدلت قعدتها: ك..كيف يعني في خطر
رياض: حنبدا دوامة الاسئلة دي تاني؟
اسيل بخوف: طيب معناها انت برضو في خطر في شنو يا رياض الله يخليك ما تلعب باعصابي
رياض: يااا الله من...
قبل ما يكمل كلامو لاحظ للطاولة الفي نهاية الكافيه ،كان فيها راجل لابس كاب اسود منزلو لعينو لكن كان واضح انو مركز معاهم ، رياض قام على حيلو ومسك اسيل من ذراعها
رياض : قومي
اسيل قامت بدون اي سؤال وركبو عربية رياض ،اتحرك بسرعة لاحظ بالمرايا العربية الماشه وراهو وذاد السرعه
اسيل: ما عايزة اسأل سؤال تاني لأني عارفاك ما مستحمل بس خفف السرعه شوية... (فجأة صوتها عِلا وبخوف وتوتر) رياااض جنيت قلت ليك خففها ما تذيدها عايز تقتلنا انت.. انتبه في عربية قدامك.. رياااض
رياض كان بذيد في السرعه وبدخل في شوارع كتيرة عسى ولعل يزوغ منو بس لسه كان ملاحقو ، لاحظ انو صوت اسيل فجأة اختفى عاين لمقعدها لقاها بتتنفس بصعوبة وجسمها ماشي موية من العرق وفجأة وقف العربية وبقى بوعي فيها
رياض وهو بضربها: اسيل ،اسيل قومي، اسييل يا بت مالك اسييل
عاين للظل الظهر من جهة الشباك ورفع راسو باتجاهو، شاف الراجل الكان لابس كاب اسود وهو بأشر ليهو ينزل القزاز، رياض في اللحظه ديك كان مستسلم تماماً لأنو ماف حل غير الاستستلام، بس همو كلو في اسيل حيعمل ليها شنو؟ واصلا هم غايتهم اسيل ما هو، فجأة الراجل القدامو وقع على الارض، رياض اتصدم وعاين يمين وشمال شاف زول جاري من بعيد باتجاههم
رياض: جاد ؟؟
جاد بعد وصله فتح الباب الورا وركب: اتحرك سريع مرسلين باقي الرجال وراهو
رياض دور العربيه واتجه على المستشفى
جاد: دا شنو ماشي وين؟؟
رياض: المستشفى
جاد بانفعال: مستشفى شنو امشي المقر
رياض وهو بكورك: ما شايف حالة اسيل حنخليها كدا يعني؟
جاد : رياض اهدى وروق لو وديتها المستشفى ما حتستفيد شي بالعكس حيقدروا يصلو ليها وممكن تخسرها المرة دي بالجد
رياض مسح العرق المالي وشو وهو متوتر : اعمل شنو ياربي اعمل شنو
جاد: اسمعني امشي المقر وهناك اسيل بتبقى كويسه اصلا بكون اغمى عليها من الخوف بس ما فيها شي تاني
رياض: جاد قدامنا ساعتين ونص عشان نصل للمقر لو حصلت ليها حاجه
جاد : معاك مويه في العربيه؟
رياض: ما عارف ما عارف ( بقى بفتش لقا قارورة فاضيه قبضها بقوة ورماها وهو بصرخ) يااخ مااافي مافي
جاد: طيب طيب اهدا ما بحصل ليها شي،، وقفت مالك
رياض ما رد عليهو نزل البقاله بسرعه جاب قارورتين مويه وجا بقى برش فيها عشان تصحى
جاد: اديني اديني انت اتحرك قبل ما يلحقونا
سلمو ليها واتحرك..بعد دقيقتين اسيل فتحت عيونها ببطء وقامت
اسيل: في شنو؟ نحن وين
رياض وجاد ف نفس الوقت اتنهدوا
رياض: انتي كويسه؟
اسيل : انا كويسة لكن الحصل..
رياض عاين ليها بحده
اسيل: خلاص سكت
رياض: جاد
جاد: اها
رياض: قتلتو؟
اسيل ختت يدها ف شفايفها وعيونها اتسعت
جاد: لا ، دي حقنة مخدر
اسيل وهي بتغمض عيونها: اوووه، دقيقه دا منو هو
رياض حك فرامل ووقف ، قرب منها وبصوت واطي: قسماََ بالله سؤال واحد تاني برميك من العربيه دي
اسيل بلعت ريقها وبخوف: ت.. تمام
