الجمعة
7:00pm
مراد بانفعال: يخوانا حنفقعد كدا ونستنى؟؟ ابوي ما معروف حي ولا ميت ونحن قاعدين هنا مستنيين
وليد: مراد هدي اعصابك ، مافي شي في يدنا نعملوا
عمر: الرئيس متفق مع محمد، يعني حيكون كويس وحيجي خلال اليوم
مراد: على حسل الاتفاق كان مفروض يكون هنا هسي
وليد: ما معروف حصل شنو، لكن من ناحية امان ف هو حيكون في امان
مراد : لحدي الساعه ١٠ ابوي لو ما جا انا حامشي ابلغ
عمر: مراد انت جنيت؟؟ عايز تنهي ابوك بيدك؟؟
مراد: يكون في السجن احسن من يموت على يد الوسخين ديك
طلع من المكتب وقفل الباب بقوة ، بعد ٥ دقائق محمد جا داخل وقفل الباب
عمر قام بعد شافوا: محمد الحصل شنو ، قلت حيجي قبل الظهر
محمد قعد واشر ليهو عشان يقعد
وليد: مراد ما عايز يهدا واعصابنا كلنا تلفت
محمد: عايزين ترتاحوا من توفيق ولا لا؟
عمر ووليد عاينو لبعض وعاينو ليهو
محمد: ما نفسكم تتخلصوا من الكابوس دا والشركة دي تبقى حقتكم بالجد؟
وليد: كيف يعني قصدك شنو
محمد خلف رجولو واتكل على الكرسي: بعد الليله ما حيكون في حاجه اسمها توفيق
عمر: اتكلم زي الناس
محمد: اولاّ ادوني رايكم في الموضوع، عايزين تنهوا الكابوس دا ولا تعيشوا فيهو للابد؟... يعني معنى اخر عايزني اقتل توفيق ولا يرجع وترجعوا لنظام السيد وعبدو من جديد، هااا وعلى فكرة بعد دا كلو يعدي واساساً حيعدي احتمال ٩٠٪ توفيق يجدعكم الاتنين ويجيب غيركم ولا فاكرين حيشغلكم عندو بعد العملتوهو دا(عاين لي وليد واشر عليهو بسبابتو) خاصة انت حيحكم عليك بالاعدام ... وكدا يا اعزائي زي ما بقولو حتطلعو من المولد بلا حمص، وما اكذب عليكم انا برضو عايز اخلص منو لأنو توفيق بقى اكبر كابوس في حياتي
وليد وسع ربطة الكرفته بتاعتو وبلع ريقو
محمد وهو بشبك يدينو: القرار راجع ليكم
عمر: حتعمل كدا كيف
محمد ابتسم بخبث
وليد: عمر؟؟
عمر: مالك؟ عندك شك في كلام محمد؟ عايزنا بعد سنينا دي كلها نطلع منها ساي؟
وليد عاين ليهم وسكت
محمد: خلوني ابدا ليكم من الخطة الوضعتها ليهو ، اقصد الغشيتها بيهو ..
Flash back ..
