🌸
لمحة من الماضي..
ماجد: دعاء انا ما حاخليكي ، اثقي فيني شويه بس
دعاء: عايز مني شنو ، ما قدرت اجيب لي طفل ، وانت الحاربت اهلك كلهم عشاني
ماجد: الحاجه دي ما بيدك ولا بيدي انا املي في الله كبير ونحن قاعدين نعمل العلينا ان شاء الله ربنا ما حيخذلنا
دعاء: ١٥ سنه، ١٥ سنه بنجري من دكتور لي دكتور ومافي اي شي
ماجد: الله كريم
دعاء: ماجد خلينا نتبنى طفل، انا عايزه يكون في صوت طفل في البيت بدور اربيهو واشوفوا يكبر قدامي ما عايزه اموت قبل ما اعيش اللحظات دي
ماجد: دا كلام شنو يا دعاء
دعاء: كلامي فيهو شنو؟ انا جيت من وين؟ مش اهلي الربوني جابوني من هناك
ماجد: لا انا ما قصدي شي لكن..
دعاء دموعها بدت تنزل: الله يرضى عليك يا ماجد الله يرضى عليك
ماجد بعد اخد نفس طويل: ان شاء الله بكرا نمشي ونعمل الإجراءات، انا ما بهمني شي في الدنيا غير اشوفك مبسوطه
دعاء مسحت دموعها وختت راسها في كتفو..
دعاء وهي بتقوم: امي بتناديني هسي كان ما مشيت حتقول لي راجلك دا لمن تقعدي معاهو بتبقي صماء وعمياء
🌸
--------------------------------------------
بعد مرور ١٠ ايام من اختفاء رياض..
الاثنين.. 9:30am
اسيل دخلت العياده ولقت علي قاعد وشغال بالتلفون جات قعدت جمبو
اسيل: ما جا الليله برضو؟
علي هز راسو
اسيل اتنهدت وبقت سرحانه ، بعد شويتين: ما اتصل ليك بعد داك ولا رسل ولا قدرت تعرف عنو حاجه؟
علي: زي ما وريتك اخر مرة كانت قبل اسبوع وقال لي ما تقفل العياده انا برجع بعد فترة ممكن في اجي في اي لحظه .. بس تاني ما اتواصل معاي
اسيل: ليه ما قال لي حاجه ، انا ما مطمنه خالص
علي: بكون عايز يرتاح من ضغط الشغل شويه
اسيل: كان كلمني ، ما حصل اختفى كدا فجأة بدون ما اعرف.. حتى لمن شفتو اخر مرة ما كان كويس، قال لي كان شغال اليوم كلو
علي: متين يوم السبت؟
اسيل: اي
علي: يوم السبت ما جا اصلا
اسيل: كيف يعني، ما جا يوم الجمعة هنا وكان بايت في العياده؟
علي: لا
اسيل وهي بتقوم: معناها كذب علي، قلت ليك في حاجه لكن ما عايز يوريني
طلعت من العياده وشالت تلفونها من الشنطه عملت مكالمه
اسيل: الو السلام عليكم
-- وعليكم السلام
اسيل: فؤاد كيفك
-- الحمدلله تمام والله انتي اخبارك شنو وين مختفيه كدا
اسيل: كويسه والله بس مع الجامعه
-- ربنا يعين ياخ
اسيل: امين يارب جمعا، ااا عايزه اسألك يا فؤاد شفت رياض متين اخر مره
-- طول ياخ لي شهرين ما شفتو، ليه خير ان شاء الله
اسيل: ااا لا مافي حاجه يلا مع السلامه
-- الله يسلمك
اسيل: اااخ يا رياض مشيت وين
عاينت وراها لما سمعت صوت البوري ، اشرت للزول السايق "يعني قاصدني" اشر ليها بنعم مشت عليها
-- انتي اسيل صح؟
اسيل: ايوه منو انت
-- اركبي
اسيل: عفواً؟
-- بتفتشي في رياض؟
اسيل: انتو منو وبتعرفوا من وين
-- انا برضو بفتش فيهو
اسيل: ما فهمت
-- اركبي وحتفهمي اي حاجه
اسيل اترددت ووقفت مسافه لكن خوفها على رياض كان مخليها تعمل اي شي عشان تعرف حاصل عليهو شنو ، ركبت معاهو والطريق كلو كان ساكت لحدي ما وقفوا قدام بيت ، نزل وفتح ليها الباب ونزلت
اسيل: ممكن تفهمني في شنو؟ رياض هنا يعني؟
-- قلت ليك انا برضو بفتشوا يعني ما عارفو وين
اسيل: طيب عايز مني شنو وجبتني هنا ليه
-- اتفضلي يا استاذه حتعرفي اي شي بعد ندخل
اسيل: والضمني شنو انو ما عايز تعمل لي شي
-- استغفرك يا ربي، اسمعيني يا بت الناس انا جايبك هنا عشان تساعدينا نلقى رياض اذا ما عايزه ممكن ارجعك هسي من مكان ما جبتك
اسيل: ما عارفه لكن ما مطمنه ليك
وهو بفتح باب العربيه: طيب اتفضلي عشان نرجع
اسيل وهي بترفع يدها: خلاص خلاص ارح
مشت وراهو لحدي ما دخلوا البيت وصلوا الصاله ولقت ولد وبنتين قاعدين هناك ، سلمت وقعدت
اسيل : انتو منو وبتعرفوا رياض من وين؟
زين: اصبري نضيفك حاجه
اسيل عاينت ليهو مسافه: انا شايفاك في مكان .. انت صاحب رياض صح؟
مريام عاينت ليهو باستغراب
زين: اي
اسيل: عارفو وين؟
جاد كان واقف ومربع ايدينو: والله البت دي من شفتها لحدي ما جينا هنا ما بطلت اسئلة
اسيل : من حقي اعرف
مريام: طبعاً من حقك
ريا عاينت لجاد
جاد: مالك؟
ريا: اسكت خلاص
زين: للاسف ما عارفوا، وجبناك هنا عشان تساعدينا نلقاهو
اسيل: ما فاهمه
زين: حافهمك هسي .. عايزين نستخدمك عشان نلقى رياض (عاين لي جاد) رسلت ليهو الرساله ؟
جاد: لسه، قلت بعد كلنا نكون عارفين الخطه اكلموا
زين: تمام.. حيحصل كالآتي ، حنرسل لي رياض رساله انو انتي في خطر اذا ما ظهر في وقت قريب ممكن تروحي فيها
اسيل: اسفه على المقاطعه ، يعني انت عارف السبب المختفي عشانو رياض
