لمحه من الماضي..
قبل ١١ سنة..
🌸
سعاد: رائد اسمع الكلام انت لسه ما بقيت كويس
رائد: ماما عليييك الله خليني اطلع العب
سعاد: بعد تبقى كويس
زين: في شنو مالك يا رائد
زين: قلت لي ماما خليني العب مع اصحابي شوية واجي
زين: طيب نص ساعه بس وتعال راجع
سعاد: زين؟؟؟
زين: خلاص يا امي خليهو يلعب شوية انا بعد شويه بجيبوا
سعاد: زول خارب الولد دا غيرك مافي
بعد ساعه زين طلع الشارع فتش ب عيوني وسط اصحاب اخوهو ما لقاهو مشا عليهم وبقى بسأل فيهم لكن مافي زول عارف.. استمر البحث عشرة ايام ومافي نتيجه وبعد العشرة ايام جاتهم جنازة اخوهو ، الشرطة ما قدرت تعرف الخاطف كان منو ولا القتلو منو واتقفل الملف ضد مجهول ، بعد الحادثة بكم شهر ابوهو كان على السرير وحالتو صعبه زين كان ماشي على غرفة ابوهو وقبل ما يدخل سمع عمتو وابوهو بتكلمو
عمتو وهي بتبكي: لييه يا زاهر سكتنا ليييه ، انا ما حاقدر تاني ما حاقدر اسكت
زاهر وهو بتكلم ب صعوبة: اوعك يا وجدان ايااك ، لو اتكلمنا .. لو اتكلمنا يمكن نفقد زين برضو الناس ديل نحن ما قدرهم ، انا القتلت ولدي ب يدي.. انا القتلتو
-- حسبي الله ونعم الوكيل حسبي الله ونعم الوكيل
-- سعاد لسه في حالتها؟
-- لسه لسسه راقدة وحاضنه ملابس رياض الكان لابسها احييه يا سعاد ربنا يصبرك
🌸
---------------------------------------
الاربعاء
6:00 pm
طلع من المطار ورواهو حراسو الاتنين ختا ايدو على راسو من ضوء الشمس وطلع الفريم لبسو ، مشوا على العربية الكانت مستنياهم ركبوا واتجهو على الاوتيل .. وصلو واي واحد اتجه عل غرفتو، مراد دخل الغرفة اخد شاور ورقد نام
عمر: وصلو؟
وليد: ايوه
-- تمام، رسلتو رجالنا للمخزن؟
-- اي بس مستنين اشارتنا
-- كويس جداً ، العمليه دي لازم تتم الليلة والا ما حيكون عندنا فرصة تانيه
-- حتتم ان شاء الله
-- كلمهم يطلعوا مراد التمرين قبل ساعتين من العمليه
-- ساعتين؟
-- اي ساعتين، انت عارف رجال صلاح ما بالساهل نقدر عليهم
--لكن هو ما حيمشي معانا المخزن
-- وهم ما حيرسلوا رجالهم كلهم حيكون في جزء منهم في الشركة
-- مراد حيكون براهو في الشركه يعني
-- حنرسل معاهو اتنين ، نحن محتاجين لكل رجالنا في المخزن
-- صح كلامك
مراد قام بصوت التلفون شالو ورد عليهو
-- جهز نفسك للتمرين
مراد رجع التلفون عاين للساعه ورجعو: لسه الوقت بدري
-- الاوامر بتقول كدا
قفل وقام جهز نفسو شال شنطتو وطلع ، بعد خلص تمرينو اتجه مع حراسو للشركة عملوا ليهو الماسك و مشا غرفة عمر
عمر: جاهز
مراد: اي
عمر ناولو المسدس وطلع ومعاهو اتنين وصلو الشركة وكان فيها عدد بسيط الراجلين المعاهو دخلو بالباب الرئيسي ومراد دخل بالباب الخلفي بعد ما طلع بطاقتو وسلمها لحارس البوابة ، مشا كم خطوة ووقف فجأة رجع بخطوات بطيئة طلع مسدسو وضرب الحارس بطرف المسدس في راسو بعديها اخد بطاقتو وجرا الراجل لتحت تربيزة وتابع طريقو كان كل ما يشوف زول ماشي بتدسى في اقرب مكان لحدي ما وصل الغرفة الكان عايزها تاوق لقى المكان آمن دق الباب واول ما اتفتح ضرب الزول الفتح الباب برجلو والراجل وقع في الارض وبقى يتلوو قام على حيلو وبقو بتضاربو في النهاية مراد ضربو بالمسدس في راسو نفس ضربة الحارس والراجل فقد وعيو ، رجع قفل الباب بالمفتاح وقعد في اللابتوب وبقى شغال فيهو بسرعه.. بالجهة التانيه الراجلين المعاهو كانو بتضاربوا مع باقي الرحال الفي الشركة عشان يلهوهم ..
