مريام: سقت خديجه للمقابلة.. جيت البيت لقيت اسيل ماف والشقة مقلوبه
ريا: شنوو كيف وين يعني خطفوها؟
زين: خلال نص ساعه تكونوا عندي في البيت
قفلوا وريا جرت غرفتها شالت اقرب عبايه
ريا: معليش يا سيدرا مضطرة اطلع ضروري شديد
سيدرا: خير ان شاء الله في شنو؟
ريا: بكلمك بعدين
سيدرا وريا طلعوا
سيدرا: طيب تعالي نوصلك مكان ماشه
ريا وهي بتتجه ناحية التاكسي : لالا مافي داعي يلا
ركبت التاكسي ووصلت بيت زين بعد نص ساعه لقتهم كلهم هناك قعدت معاهم
جاد: دي مصيبة كبيرة
ريا : حنعمل شنو هسي، لو عملوا ليها حاجه
مريام: ما عارفه يا جماعه راسي ضارب
زين: اهدوا هسي عشان نعرف نفكر
جاد: البت اذا زروها واتكلمت حتكون مشكلة
ريا بحدة: دا كل همك يزروها وتتكلم ما هاميك لو عملوا ليها شي
جاد: ما بقدروا اصلا هي ما عارفه حاجه
مريام: حيصدقوها مثلاً ؟
ريا: رياض عارف
زين: لا طبعاً ولا حيعرف
مريام: كيف يعني لازم نكلموا
زين: عشان يمشي ليهم برجولوا صح؟؟
مريام: زين ، رياض لازم يعرف بغض النظر ردة فعلوا حتكون كيف ، اذا لا قدر الله عملوا ليها شي وعرف اننا ما كلمناهو حيخرب اي شي
جاد: واصلا احتمال كبير يهددوها بيهو يعني كدا كدا حيعرف ف الاحسن نكلموا نحن
ريا: صح
زين: اتصلوا ليهو
جاد بعد اتصل كم مرة : تلفونو مقفول ح امشي ليهو
مريام: ما تكلموا هناك بعد تصلوا هنا يعرف
جاد: تمام
فتحت عيونها ببطء رفعت راسها وهي خاته يدها فيهو من الصداع قامت من الكنبه الراقدة فيها وعاينت للشخصيه القاعده في الكرسي قدامها
اسيل: انا وين
توفيق: ارقدي ما تتعبي نفسك
قبل ما ترد اغمى عليها تاني
بعد ساعه ونص رياض وجاد وصلوا ورياض ما كان مطمن خالص ، بعد قعدوا زين قام قفل الباب ودخل المفتاح في جيبوا
رياض: في شنو يا جماعه
مريام: رياض ، اسيل اتخطفت
رياض قام على حيلو ومشى على الباب بس كان مقفول ، عاين لي زين: كيف يعني؟؟ كيف يعني اتخطفت؟ على اساس انو مراقبنها رجالك وانو ما بقدروا يصلوا ليها اتخطفت كيف ؟؟ انا ماشي ليهو الكلب دا ، ما حاخليهو يلمسها افتح لي الزفت دا
