بعد ٨ ايام
صباح الاحد 3:00am في المقر
كانو قاعدين حولين الطاولة وجاد شغال في اللابتوب
زين عاين لي مريام وريا: جبتو كل الحاجات المحتاجين ليها؟
مريام: ايوه
زين: ريا
ريا: نعم
زين: ادخلي الغرفه وابدي طوالي
ريا: تمام (وقامت)
زين: جاد لسه ما عرفت وقت الاجتماع؟
جاد وهو بقوم وبتجه على التلاجه الصغيرة: عرفتو ٨ونص
زين: معناها مفروض نطلع من هنا قبل ٦
جاد وهو بمد ليهو قارورة بيبسي: مفروض
زين: رياض زي ما قلت ليك انت حتكون مع ريا عشان لو حصل اي شي وحتركب الجهاز انت (وهو بمد ليهوجهاز التنصت ومعاهو مسدس) خلي دا معاك وما تطلعوا الا لو اضطريت شديد
رياض: فاضي
زين: ايوه فاضي ح تطلعوا بغرض التخويف بس
رياض: تمام
مريام جات قعدت في الطاولة قصادو: ونحن.. قصدي انا وانت
زين: انتي حتكوني مع جاد ، مسافة يلهيهم حتاخدي الاوراق من العربيه وتختي جهاز التنصت في المكان الوريتك ليهو و بحذر شديد
مريام: طيب
زين: انا حاكون جمب الشركه في حال حصل شي ما متوقع ح اتدخل
جاد دخل الغرفه لقا ريا قاعده قصاد المراية شغاله في وشها مدا ليها قارورة البيبسي
ريا: شايف دا وقتو
جاد جرا المقعد وقعد فتح القارورة وشرب منها: شكلك لسه زعلانه مني
ريا: شايفني مشغوله وما فاضيه للكلام دا ممكن تطلع وتخليني اخلص سريع لأنو ما عندنا وقت
جاد نزل راسو وعاين لوشها : سبحاان الله حاجه ما بتتصدق.. ياداب عرفت حالات الطلاق بتذيد ليه ، الواحد يشوف البت بشكل ويتصدم بعد الزواج بالشكل الحقيقي
ريا: في زول قال ليك قبل كدا انك ظريف؟
جاد وهو بقوم: لالا، ياريت لو الحساسيه دي تنتهي لأنو نحن هنا شغالين مع بعض فلو استمرينا كدا ما حيكون ل صالحنا
قبل ما يطلع ريا ختت الجل بتاع الحواجب وقامت : تراقبني تصورني في نص الليل تتجسس على تلفوني وعايزني اتعامل معاك عادي دي شنو الوقاحه دي
جاد قبل عليها: عارف نفسي غلطان عشان كدا جيت كلمتك واعتذرت ليك كان بامكاني ما اجيب ليك سيرة الموضوع
ريا: ههه فاكر نفسك بطل لأنك عملت كدا؟
جاد: مافي فايده (وطلع)
زين: لسه ما خلصت
جاد: لسه
زين: مريام ادخلي شوفيها
مريام دخلت وبعد ساعه ونص طلعو الاتنين وقعدو معاهم
رياض عاين للصورة الفي الطاوله وعاين لي ريا قعد يضحك وجاد ضحك وراهو
رياض: ما مصدق
جاد: البت زاتا لو شافتك حتتخلع
مريام: ههههه حرفياً
زين: سريع عندنا ساعه، جاد اديها اللابتوب خليها تراجع تفاصيل العقد
جاد مداهو قصادها وريا بدت تقراهو
زين قام باتجاه واحد من الرفوف شال منو ٥ سماعات ايربودز ومداهم ليهم
زين: دي حتكون معاكم اول ما نفترق ح تشغلوها حاقدر اسمع بيها الحاصل مع اي واحد فيكم .. جاد ومريام مافي خطورة في مهمتكم الخطر كلو حيكون عند ريا ورياض عشان كدا ما عايزكم تغفلو نهائي
ريا: ان شاء الله
زين: رياض زي ما قلت ليك انت حتكون خالد رجاءً خليكم حذرين
رياض: ما تخاف كلو حيكون تمام
زين: ان شاء الله
رياض: عندي احساس كبير انو واحده من الشركتين حتكون تبعو
جاد: لسه باقي ٣ شركات ، ديل الفي الخرطوم
ريا: ممكن تسكتو شويه؟
كلهم عاينو لبعض وسكتو
