"تلك اللحظه التي تدرك فيها انك لست انت، أن افعالك ليست وليدة افكارك انها وليدة اللحظة البائسة ، تلك الافعال التي جعلتك تبدو لست انت في عين نفسك قبلهم .. تلك اللحظه يا عزيزي اما ستكسرك كسراً لا يُجبر او ستجعلك اقوى لإثبات انك مسؤول عن كل افعالك ومُتحملاً لكل نتائجها "
اريج دخلت وهي بتعاين للمكان زين طلع المسدس بتاهو وضربها بيهو في رجلها ، اللحظه دي كلهم عيونهم اتسعت وهم بعاينو لي زين ريا وقعت في الكرسي الجمبها وختت ايدينها في راسها ، جاد كان بعاين لرجل اريج البتنزف، رياض كان بعاين لي زين مره ولاريج مرة ..كانت لحظة صادمه بالنسبه ليهم كلهم.. حتى مريام .. رجعو لوعيهم بصوت اريج البدت تصرخ مريام مشت بخطوات سريعه على الرف واخدت صندوق الاسعافات الاولية وكيس تاني جمبو، رياض شال اريج ودخلها الغرفه ومريام وريا دخلو وراهم
مريام: رياض ممكن تطلع
رياض: بتقدري..
مريام: اي بعرف..
اريج كانت بتتنفس بصعوبه وجسمها كلو برتعش
مريام: اهدي اهدي مافي حاجه بطلعها ليك هسي اخدي نفس ايوه اتنفسي شهيق زفير
اريج بدت تحاكيها في التنفس ورياض طلع من الغرفه
مريام: ريا مدي المقعد سريع
ريا شالت المقعد القصاد المرايه وختتو جمبها مريام رفعت لاريج رجلها
مريام: المقعد واطي جيبي كرسي من برا
ريا طلعت جابت الكرسي ورياض مشا على زين ومسكو من ياقة قميصو
رياض بعصبية وصوت عالي: دا شنو العملتو دا جنيت دا شنو دا .. (بصوت اعلى)اتكلم
زين نزل ليهو يدينو
جاد: زين ليه عملت كدا
زين: دي قرصة وِدان
رياض: هههههه تضربها بالمسدس وتقول قرصة وِدان زين انت مجنون ؟ وريني انت مجنون
جاد مشا على رياض ومسكو من كتفو: رياض اهدى
رياض نفض ليهو يدو ومدا لي زين سبابتو: قسماً بالله البت دي يحصل ليها حاجه ما بتشوف مني خير .. كلمتك
زين: جاد جيب ليهو مويه وخليهو يهدى
جاد مدا لي رياض قارورة مويه ورياض جدعها في الارض
رياض: انا حاسوقها واطلع من هنا
مشا على اتجاه الغرفه وجاد جا وقف قدامو
جاد: رياض قول بسم الله استنى اذا طلعنا بيها كدا حالتها حتبقى اكعب لحدي ما نصل لينا مستشفى
رياض مسح وشو وضرب الكرسي برجلو : يلعن ابو اليوم الجابني هنا
زين قعد في الكرسي بتاعو ،رياض كان ماشي وجاي وكل شويه يعاين لباب الغرفه.. جاد كان قاعد في الكرسي ومتكل بيدينو على الطاولة وكل شويه يعاين لي زين.. بعد ساعه جاد مشا على الغرفه ضرب الباب ريا قامت فتحتو ووقفت قدامو
زين : لسه؟
ريا: لسه
جاد رجع قعد مكانو وبعد مسافه مريام وريا جو طالعين ، مريام مشت على المغسله وبدت تغسل يدها
رياض مشا عليها: خلاص؟
مريام هزت راسها، زين قام ماشي على الغرفه ريا جات وقفت قدامو
ريا: ما حتمشي مكان لو ما قعدت هسي وفهمتنا الحصل دا شنو
زين قفل باب الغرفه ورجع مكانو مريام كانت لسه بتغسل يدها ورياض واقف جمبها ،ريا وجاد كانو واقفين قدامو
زين: زي ما قلت ليكم قرصة وِدان
جاد: زين ما تخلي الجو يكهرب اكتر من كدا
زين قام على حيلو وعاين ليهم كلهم: لو ما عملت كدا كنتو كلكم على وش الصبح حتكونوا مرميين في السجن
ريا: يعني العمله دي عشان تسكتها صح؟ ههه ما قادره اصدق
رياض: اكون في السجن ولا اقتل روح؟
زين: ماتت؟ لا
رياض وهو بمسح وشو: اللهم طولك يا روح
زين: انا ما مستعد اخسر اي شي واوقف البديتو عشان وحده متسلطه وحشريه
ريا: وانا ما مستعده انهي حياة زول عشان احقق الفي بالي
زين : ما مجبور اقنعكم اني ما عايز اقتلها، (علا صوتو وبدا يتكلم بيدو) كلمتكم كلكم بأي حاجه حتحصل في المقر دا ، وريتكم انو اي زول حيدخل هنا غيرنا حيلقى عقابو
جاد: بس ما وريتنا انو حتعمل كدا
زين: سألتني حاعمل شنو وما جاوبتك؟
ريا: ما كنا متوقعين ولا بنسبة ١٪ زول يدخل هنا
زين: دا ما غلطي
