الثلاثاء.. 8:30pm ، في المقر حولين الطاولة المستديرة
جاد: طيب يعني هسي مفروض نعمل شنو
ريا: نحن كنا مستنين اللحظه دي بفارغ الصبر ، بس ما خططنا ليها ولا جاهزين ليها
مريام: بالظبط كدا
زين: لازم نستغل الفرصة دي قبل ما يرجع
رياض: مافي زول سألني توفيق جا السودان ليه
مريام: لأنو كلنا عارفين ليه
رياض: عارفين.. طيب مافي زول فكر ح نحمي اسيل كيف
جاد: اصلا الحاجه دي عملناها من امس واتأكدنا انو اسيل في امان
ريا: و بيت مريام مُراقب أساساً
رياض: مادام جا لحدي هنا عشان الموضوع دا معناها حيقبضها حيقبضها
زين: طيب ادينا اقتراح ممكن نعمل بيهو عشان نأمنها اكتر من كدا
رياض: ما عندي اقتراح
زين: طيب بتنبح من قبيل لشنو اسيل اسيل خلاص مافي شي في يدنا نعملو ليها اكتر من كدا
مريام: زين
رياض قام على حيلو وبانفعال: بنبح لأنو ما هاميكم شي غير مصلحتكم كل العايزنو تقدروا تجيبو توفيق هنا ، ما سألتو لو قدر يوصل ليها حنتصرف كيف ولا لو قبضها حنخلصها منو كيف
زين : اقعد
رياض: ما قاعد ، اعملوا خططكم العايزين تعملوها ونفذوها وانا ما معاكم في شي تمام؟
مريام قامت ومشت عليهو مسكتو من كتفو: رياض ممكن تقعد وتهدا؟ لو سمحت
جرتو وقعد مكانو مسح وشو وفكا ربطة شعرو واتكل على الطاولة وهو شابك ايدينو وخاتيهم في وشو
جاد مدا ليهو قارورة مويه: اشرب
شالها شرب منها وختاها
مريام بهمس : زين حاول ما تكون قاسي شويه ف كلامك راعي لي وضعوا
زين عاين ليها بطرف عيونو وقام على حيلو: ريا
ريا: نعم
زين: علاقتك مع احمد كيف
ريا: تمام بس لسه
زين: لسه شنو؟ مش قلت ليك تنجزي سريع
ريا: عفواً بس الولد ما روبوت انا اتحكم فيهو قاعده اعمل البقدر عليهو
زين: عندك يومين عشان تعرفي منو مكان توفيق وين
ريا: واذا ما عارفو
زين: مستحيل يكون ما عارف
ريا: تمام بحاول
زين: وانت يا جاد، حتراقب احمد وتشوف اذا حيلاقيهو ولا لا
