عـتـاب

بارت ١

اسمي عشبه ، عمري ١٧ سنه و ملقبيني ب اسم : "عبده الكتب " لاني ٢٤ ساعه ماسكه كتاب و اتأثر ب شخصيات الروايات وايد ، كأني اجوف فلم بس بالكتب ، شعور ما بيحس فيه الا الي يقرون كتب وايد .

نشيت الصبح على زعيج اميه : يلا عشوبه الباص خاري ، دهديه تعالي بيسير عنج .

ركبت الباص و انا مبهدله ، قميصي عقمه مبطله ، و جوتيه مب مربوط لدرجه نشيت متأخر!! انا ولا مره تأخرت ف حياتي ، شو بلاني ؟ ، اوه صح تذكرت .. ، سهرت اقرا كتاب ما وراء الطبيعه ( و على فكره اول مره اقرا قصص جن ) ووو يتني كوابيس و ما رمت ارقد عدل ، غلطه و ما بكررها مره ثانيه..

وصلت المدرسه و كانت اول حصه علينا رياضيات اووووففف انا و الرياضيات ابدا مب صحبه ، و عندنا وحده فالصف ما تنشها ، الله وكيلكم تاكل الكتاب اكل ، و يوم تسألونها عن طريقه حل شئ تقول ، ليش ما انتبهتي هاي مشكلتج ، حشى عسب جي محد يواطنج ولا يدانيج  .

و مر اليوم بسرعه ما حسيت فيه .. احساس غريب .
رديت البيت و بدلت ثيابي و نزلت اتغدا ، طبعاً عندنا عاده نسويها على السفره ما نبدا ماكل لين ما الشخص الكبير يبدا ياكل اول ( كإحترام للكبير ) ، يلسنا نتريا ابويه عسب نبدا نتغدا ، لاكن مب من عوايده يتأخر هالكثر .

اميه تتصل : الو ، السلام عليك يابو سالم ، وينك يا ريال تأخرت علينا ؟ عيالك يواعه ، يالسين يتريونك عالسفره .

ابويه : هلا هلا ناعمه ، تغدوا انا مب ياي ، بتم عند الطراد ويا الرياييل .

اميه : نزين عاده ، لا تبطي علينا .

ابويه : فالج طيب يا ام سالم .

اميه : يا عيال تغدوا تغدوا ابوكم مب ياي .

اميه كان يبين على ملامح ويهها الزعل ، هالأيام هي و ابويه يتصرفون ب غرابه ، ابويه قام يتأخر مرات لين انصاف الليالي و مرات يرد الفجر ، و اميه حتى اميه مالها شغف تيلس ويانا او وياه يوم نكون فالبيت ، و حتى اخواني استوا تعاملهم ويا ابوي وايد بارد .

بسير اسال سلوم ، و حتى لو ما قالي بستوي المحقق كونان و بشبك الاحداث و الا اعرف شسالفه .