حب بعد الزواج

شريان (بدااايهه)

#حب بعد الزواج(1)
بقلمي :زينب أمير

زي العصريات كده كنت قاعده في البرنده قدامي صحن سلطه بقطع فيهو جات قعدت جنبي صحبتي وفي نفس الوقت زوجه اخوي اسمها رحمه قالت لي سرحانه وين؟ قلت ليها م عارفه اقول ليك شنو والله قالت لي احكي احكي قلت ليها منذر ي رحمه قال لي بديك وقت فكري فيهو ل بكره وانا ل أسي م عارفه ارد ليهو بشنو والمشكله انو الكلام ده قالو لي أمس يعني مفترض بعدين ارد عليهو واديهو ردي النهائي قالت لي انتي دايره شنو قلت ليها م عارفه قالت لي مش انتي عايزاهو؟ قلت ليها ودي كمان دايره ليها سؤال اكيد طبعا بس السؤال هو عايزني؟ قالت لي م هو لو م عايزك م كان جا وطلب ايدك،،، قلت ليها حاسه الموضوع غيرر.. تخيلي ي رحمه زول لا أنتي بتعرفيهو لا هو بعرفك وماف اصلا بينكم سابق معرفه شوفتو بعض في مناسبه تخريج،، وبعدو ب كم اسبوع امو جات خطبتك ليهوو ح توافقي ولا لأ؟ قالت لي م هسي انتي عايزاهو وبتحبيهو وموافقه عليهو طب هو مالو م يوافق وخلاص،، قلت ليها بالله!  كيف يعني يوافق ساي؟ سرحت مسافه وابتسمت بعدها قلتا ليها تتذكري اول مره شوفتو فيها كان عندكم في بيتكم،، ابتسمت كده وقالت لي تتذكري الموقف الختيتك فيهوو عاينت ليها وضربتها ع خفيف في كتفها قلت ليها م ناسيه ليك قالت لي هو صحي ود خالتي واي حاجه بس م محتكين مع بعض شديد كده،، اليوم داك لمن جانا يوم الخميس وقال فاطر معانا يوم الجمعه وانا الشليقهه اتظارفت وقلت ليهو خلاص لو كده الفطور علي،، قلت ليها وانتي اصلا وكت م بتعرفي تطبخي الخفه ليك شنو قالت لي بري،، ضحكت وقلت ليها وفي النهايه اتصلتي علي وجيتك وعملتوو انا تتذكري؟ قالت لي وهي بتضحك والأكل عجبهم قمت انا قلت ليهم دي انتي العملتيهوو وقتها هو زاتو منذر ده عاين ليك وابتسم وم تقولي لي عرفتي كيف  شوفتو بعيني دي عاينت ليها وقبلي م ارد عليها جات امي داخله اسمها سوسن قعدت عاينت لي  وقالت لسه؟ قلت ليها لالا خلاص انتهيت قمنا انا ورحمه دخلنا المطبخ رصينا الاكل وناديت ابوي( احمد) ورحمه مشت نادت راجلها اللي هو اخوي اسمو عمر 28 سنهه قعدنا اتغدينا مع بعض وونسه عاديه بعدها عملت ليهم شاي ودخلت غرفتي جوه اتوضيت صليت المغرب ومسكت تلفوني اشتغلت فيهو لحدي م سمعت اذان العشا صليتو ورقدت،،، كان اتصل لي منذر فرحت شديد  واتوترت قمت ع حيلي وقعدت وتاني وقفت فجأة الخط فصل قلت اووف ياخ علشان تاني م تتهابلي وتردي سريع بس خليهو يتصل طوالي برد عليهو،، و قبل م أتم كلامي رجع ضرب والحاله ديك رجعت لي تاني زفرت بعمق ورديت اول حاجه قالها لي لجين انتي كويسه؟؟ اخدت صنه كده َتاني قلت ليهو تمام الحمدلله انت كيف؟قال لي في نعمه الحمدلله سألني من ناس البيت قلت ليهو كلهم كويسين الحمدلله سكت شويه وقال لي آها فكرتي؟! غمضت عيوني والكلام حاسه بيهو طالع مني بعيد بعيد اتنحنحت وقلت ليهو ع بركه الله وقفلت الخط طوالي!! هسي يقول علي شنو؟ السبب الخلاني افصل الخط شنو!؟ واي ي لجين نهائي م بتخلي غبائك ده احسن ابطل التفكير في الموضوع ده واشوف لي حاجه تشغلني شلت لي توب من تياب امي مشيت الدكان جبت لي رصيد وحلاوه مصاصه عملت لي خدمه كويسه ودخلت اليوتيوب انا ك زوله زي م بقولو عليها طباخه ويدها طاعمه ف بحب دائما احضر فيديوهاات طبخ علشان اتعلم اكتر واكتشف ليهم حاجات جديده ل ناس البيت حضرت كده لمن م حسيت ونمت صحيت الصباح ع صوت زغاريد استغربت طبعا َومسكت التلفون اشوف الساعه لقيتها 10 امس شكلي نمت متأخر شديد جاتني رحمه داخله الغرفه قفلت المكيف وقعدت جنبي قالت لي يختي قوومي خلاص بعدين الخطوبه حقتك قالو،، قعدت في نص السرير وقلت ليها كيف كيف قالت لي امس اتكلمتي مع منذر صح؟!  قلت ليها ايوه قالت لي بس يلا هو امس لمن اتكلم معاك طوالي كلم امو وقال ليها ح نمش بكره نعمل الخطوبه وطلع طوالي بعدها خالتي مشت كلمت اخواتها كلهم انهم يجو ويجهزوا ل يوم الليله ده وامي اتصلت علي الصباحيه كلمتني مشيت ل خالتي سوسن لقيتها بتتكلم بالتلفون بعد خلصت قالت لي دي خديجه (ام منذر) قالت لي نفس كلام امي المهم الجيران عرفوا وشايفاهم أسي بره مع خالتي قاعدين،، قامت ع حيلها وقالت لي قوومي م عندك وقت كتير لازم تجهزي بدري وتظبطي امورك،، صحصحي كده وصلي صلاتك واشربي شايك ماشه اعمل لي كم حاجه كده وبجيك فاتت وخلتني في مكاني بحاول استوعب في الكلام القالتو لي ده....

يتبع....