حب بعد الزواج

#شريان (عقدناا)

#حب بعد الزواج (7)
#بقلمي :زينب أمير

قاعده قداام المرايه،، بهز في رجلي بتوتر، بين كل فتره والتانيه بمسك التلفون وبعاين  للساعه، وحده ضهرا، شويه والتلفون ضرب، لقيتها رحمه، مسكتا التلفون وجسمي كلو برجف، اطرافي بارده، حسي رايح، رديت وقلت الو، جاني صوتها بعيد أصوات الزغاريد، عاليه وقويه، صوت الرصاص، بدون م تتكلم فهمت الحاصل كلو، ف علي م يبدو عقدناا، كل السمعتو منها عقدو عقدو، مبروك حبيبي، رديت ليها بصوتي المبحوح، ودموعي الفي عيوني ربنا يبارك فيك، الحصل شنو تاني م عارفه لانو وقتها ريم كانت جات باركت لي ومسكت التلفون مني، لابسه توب ابيض واطرافو مطرزه بالأبيض، م هو ده توب حبوباتنا الزمان ديلك، سته غوايش دهب وخاتمين في اليمين، اسوره كبيره احفظ مالك ومعاها خاتم الخطوبه،، سلسل وسط طويل، وحلق دهب صغير، الحنه هنديه لونها اسود للكوع، ميكب م هو بخفيف وم هو بفبكتير، وياها ديك ليها نوره العروس،،

جا داخل لابس الجلاابيه العلي الله، اللونها كبدي، ساعه واسوره سوده، خاتم فضه كبير في اصبع البنصر، عطر رجولي فايح، خطوه خطوتين وبعدها طوالي لقيتو واقف قدامي، بقولو الزول البكون مبسوط تصرفاتو كلها عفويه وحلوه، ي ترى انا اتسرعت في رده فعلي ليهو، من شفتو قدامي تلقائيا لقيت نفسي ببتسم ليهو، كل العارفاهو اني كنت فرحانه شديد، وم منتبهه لتصرفاتي م هو في النهايه بقى راجلي وحلالي عادي صح؟ ابتسامتي اتلاشت ساعه لقيتو ختاا يدينو فوق ل اكتافي، وفجأه لقيت نفسي في حضنو،،الجو بارد ولا دي انا البردانه؟ضربات قلبو الأنا سامعاها وانا بين يدينو، شعور غريب حسيت بيهو، حاسه الأكسجين انعدم مني، زحاني منو، وباسني في جبيني، كل القالو مبروك لينا وربنا يحفظك، قلبي بضرب بسرعه مبالغه فيها، يديني عرقو وحسيت بيهم متلجات، قلتا ليهو بصوت خافت شديد، الله يبارك فيك، طلعنا بالممر، منذر شابك يدو مع يدي اليمين،،ريم وَمعاها البنات استقبلونا بالزغاريد، من طلعنا من ناس خالتو ندى،ودي كانت رغبتي اني اتجهز في البيت بس، بعدها ركبنا العربيه،قعدت بقدام  جنب منذر الكان سايق هو ، باقي البنات اتوزعو في العربيتين التانيات ومعاهم الشباب،،

هو ساكت وانا ساكته، بعد مسافه ربع ساعه كنا وصلنا بيت ناس خالتو خديجه، النسوان البزغرتو والشفع البتجارو، البنات الماسكات الدلوكه وبغنن، اصوات الرجال وهم بباركوا لينا، واخيرا دموع امي البتقش فيها بتوبها، واللي من شافتني ابتسمت لي وقعدت تزغرت،

سوره يس الكان بقراها لينا عم عبد الرحيم، بعدها جات الناس وبقت تبارك من جديد.. مراسم الجرتق الكانت جميله شديييد بكل تفاصيلها، ورش اللبن!! اخيرا وليس آخرا، الوداع والتمنى ل حياه سعيده، "بقولو اغلبيهو بالعيال ويغلبك بالمال"، اللهم بالشكل ده سمعتها من خشم حبوبه جات باركت،، ودعناهم وطلعنا،، دموع، ابتسامات، زغاريد، ديل اخر حاجه سمعناها او شوفناها.. وبعدها ح يحصل شنو؟؟!

#تعويض بسيط

يتبع..