حب بعد الزواج

#شريان (نزهه)

#حب بعد الزواج (12)
#بقلمي :زينب أمير

شايله صحن في يدي،، وجنبي منذر،، في بهو كبير في المطعم الموجودين فيهو،، بوفيه بكل الأنواع والاشكال، فيهو اطباق الاكل،، شلنا وقعدنا في كرسي تربيزتو طويله، رفعت راسي من الصحن ساعه سمعتو بقول لي،، "بابتسامه"في وشو، بتعرفي مكان اسمو  ساراندي؟ هزيت ليهو راسي بمعنى لا قال لي تمام رايك شنو نمشي؟ قلت ليهو تمام طيب، بعد خلصنا اكل، دخلنا الجناح...

برتب في ملابسي جوه الشنطه، مفترض نسافر الليله ع المكان القالو منذر ده، ساعه وصلنا الباب خلاص ونحنا طالعين، وقف وقال لي دقيقه بس في حاجه نسيتها. رجع دخل جوه تاني وجا راجع ب كاميرا، لبسها في رقبتو وقال ارح مشينا، كان لابس بنطال سماوي وقميص اسود،، نضاره شمسيه، وساعتو الفضيه،، اتقدمت قدامو خطوتين، ب فستان جنز كحلي ب ابيض..

*عند منذر*
لحظات الملل والزهج بتحصل كتير جدا، شفتها قاعده قدام الشاشه الصباح، بتقلب في القنوات بزهج واضح اقترحت عليها نفطر تحت في الفندق، وافقتني وقامت تتجهز،، الوكت داك كنت بفتش لي في أماكن ظريفه الزول يمشي ليها، ساعه لقيت الموضوع فيهو غطس وبحر وشاطئ قلت ليه لا؟ الزول يمش ليهو بس!،، بعد موضوع الفطور، قمنا رتبنا أمورنا،، المكان بقع جنوب ألبانيا، ح نقعد فيهو يومين ونشوف تاني الحاصل شنو!

التفت عليها لمن لقيتها بتكلز فيني من كتفي،، لقيت نفسي سرحان في عيونها العسليه!! ، انا ليه م لاحظت ليهم قبلي كده؟! كانوا سمحين بطريقه عجيبه، انتبهت معاها ساعه لقيتها مسكتني من يدي وبتجرني معاها، سمعتها بتقول لي،، "بحماس كده" تعال ياخي شوف الناس ديل جميلين وفرحانين كيف!! أصوات الناس وهي بتكورك بمرح ومبسووطهه شديييدد،، وهم في نص البحر،، لقيتها فجأه بترشني بالمويه، وبتضحك،، م لقيت نفسي الا وانا ببتسم ع ضحكتها،،، خلتني واقف في محلي ومشت،، بقيت اعاين في المكان المشت بيهو،، ابتسم ياخي وهاك الصوره دي، عاينت ليها ساعه سمعت صوتها، ختيت يدي في وشي نظام م عايز أتصور وكده، "بزعله كده" قالت لا عليك الله،، زح يدك دي، قبلي م ارد ليها مسكت يدي زحتها وقعدت تصور فيني،، بتجرني معاها تاني للمويه، "وبصوت ضاحك" ادخل طيب بعمل في فيديو،،، واقف ومصدوم بعاين ليها م كأنها دي البت زاتها القبلي كم ساعه كانت ساكته وحزينه!! بتتكلم بكل عفويه وبراءة وهي مبسوطه حاليا.. طلعت التلفون من جيبي، ومسكت النضاره، اديتهم ليها وقلت ليها صوري زي م عايزه لكن قبليها لازم اعمل ده،، بقت تعاين لي باستغراب، دنقرتا سريع وبيدي الاتنين شلت مويه وكبيتها فيها،، قعدت تجري، ساعه شافتني عايز اكب فيها تاني،، نسيت اني زول كبير،، عمرو 29 سنه جاري ورا بت،، الشمس في نص السما ونسمات الهوا في كل مكان،، أصوات ناس كتيره وفي نصها ضحكتهاا ..!!

يتبع....