حب بعد الزواج

#شريان (تحضيراات )

#حب بعد الزواج (5)
#بقلمي : زينب أمير

الليله من الصباح قمت رتبت البيت،، اصلا م كان محتاج كتير،، امي في المطبخ بتجهز في الفطور،، ورحمه بتفرش في الصالون جوه،، الساعه كانت  تسعه،، دخلت اتجهز،، لبست فستان كبدي ساده وعملت مرطب شفايف، وطلعت ليهم بره،، لقيتهم بتسالموا،، شكلهم ياداب واصلين،، خالتو خديجة،، وام رحمه سوسن،،، واختهم التالته مريم،، مشيت مكان واقفين وسلمت عليهم،، كيفك تمام الحمدلله بخير،، انتي كيفك وصحتك واخبارك،، الحمدلله الحمدلله،،قبلي م ندخل جوه جات مره،، رحمه لكزتني وقالت لي دي عمتهم ندى،، باعتبارها نسيبه مزن،، بعدها هم دخلوا جوه وانا دخلت المطبخ،، جبت ليهم مويه،، وقعدت شويه كده،، تاني قمنا انا ورحمه نجهز الفطور،،، رصيناهو في الصينيه وشالتو معاي فاطمه (الشغاله) علشان الصينيه تقيله شويه ع رحمه،، قعدنا كلنا نفطر،، الونسه كانوا مستلمنها النسوان الكبار،، انا ورحمه شغالين نعاين ل بعض ونوزع في الابتسامات ساي،،، بعدها جاا موضوع الجبنه والشاي،، الجهزتهم فاطمه من بدري وختتهم،، مشيت جبت العصير وهي شايله الكبابي وراي،،، الونسه كانت عاديه،، لحدي م تاني بقوا يتكلموا عن العرس وم العرس،، هنا الصراحهه خجلت ولو م شينه في حقي كان دخلت جوه،،، خالتو خديجه قالت م باقي كتير للعرس،، ردت ليها امي وقالت اي والله شهر بالكتير،، علشان كده بفكر نبدأ طوالي نعمل الريحه والخبائز،، عندي جارتنا هنا بتعمل البسكويت وخبائز المناسبات،، بكلمها تبدأ خلاص تجهز،،، خالتو سوسن قالت لي تجي تتحبسي عندي هناك،،لانو البيت هنا ح يكون ليك  م مريح مع الناس البجوكم والجوطه والازعاج  بيتي أقرب وأحسن ليك،، وامك لو دارتك البيت م بعيد ليها،، عمتهم قالت ليها اجي ي سوسن كدي كان سألتك مش انتو جيران؟ قالت ليها اي، الباب اللونو لبني ده،، خالتو ندى قالت ليها طيب مدام كده لو البيت هنا اتزاحم اكيد ح يجو عندك ناس،، لأنكم جيران وأهل كمان وانتو أقرب ليهم من اي بيت تاني يقعدوا فيهو الضيوف،،،، الناس دي اخدت صنه كده وبقت تفكر،، خالتو ندى طوالي قالت ليهم علشان كده تجي تتحبس عندي هناك،، لمن ماف زول رده،، قامت قالت أمكن دي اول مره تشوفوني فيها وم عندنا سابق معرفه لكن والله في قعدتنا دي يشهد الله حبيتكم واعتبرتكم من اهلي،، ومنذر ده معزتو عندي كبيره ودي ليها خديجه اسألوها، عداهو واحد من أولادي،،، وانتي خطيبتو ومرتو إن شاء الله،، ومعزتك من معزتو ده رأي طبعا ي جماعه،، شوفو رأيكم شنو وقولو لي،، خالتو مريم  قالت ليها عارفينك والله،، وعارفين غلاتو عندك،، م بتقصري انتي نهائي وكلامك في محلو،، عاينت ل خالتو خديجه وقالت ليها آها ي خديجه قلتي شنو؟ قبلت ع امي وقالت ليها ولا الكلام شنو ي سوسن؟ ردت ليها امي زي م قلتي كلامك صح ي اختي والله وانا م عندي مشكله عاينت لي،، قلت ليها تمام،، خالتو خديجه قالت لي ي بتي عادي لو عندك صحبتك ماشه تتحبسي عندها قولي، قلت ليها م عندي مشكله انا قالت لي تمام لو كده،، بعدها هم اتونسوا حبه وطلعوا...

*جانب منذر*
الايام بتجريي سريع ولا انا حاسي بيها كده؟ باقي شهر ع العرس!! حاسس باحاسيس قريبه،، كل م الموعد يقرب،، بقول هل انا اتسرعت؟ للأن بتذكر ساعه جيت ل امي،،، لقيتها قاعده بتشاهد في مسلسل مصري،، بستها في رأسها وقعدت جنبها،، في محاوله علشان احكي عن الموضوع الأساسي الجاي عشانو بقيت افتح في مواضيع جانبيه واقول ليها العايز اقولو حسيت اني مخدر وم قادر اطلع كلمتين زي بعض،، بعد مسافه عاينت لي وقالت لي دي منو ي منذر؟؟ رجعت تاني تشاهد،، عاينت ليها باستغراب، بدون م تعاين لي قالت لي احكي لي،، اخدت نفس عميق وقلت ليها في وحده كده، مسكت الريموت، قفلت الشاشه، وقبلت علي، ع وشها ابتسامه،، قبلي م اتكلم قالت لي انا بعرفها؟ قلت ليها بتعرفيها، قالت لي زميلتك؟ قلت ليها لا صحبت رحمه    واخت راجلها، لجين، ابتسمت اكتر وقالت لي البت سمحه وحلاتها وكويسه شديد،، وبعرفها حق المعرفه وخير م اخترت ي ولدي،، ربتت ع كتفي وقالت لي اخطبا ليك؟؟ عاينت ليها مخلوع ومتردد،، مسكت يدي وبقت منتظراني اتكلم،، ابتسمت وقلت ليها من بعد اذنك طبعا،، ضحكت وضربتني في يدي،، وقفت ع حيلي وقفت معاي وحضنتني،، بستها في يدها ومشيت،، خليتها فكرت شويه،، بعدها فتحت الشاشه وتمت مسلسلها.. انا للان م عارف كنت حاسي ب شنو،، حاسي اني اتسرعت،، حتي لمن مشيت ليها اليوم التاني من الصباح علشان اقول ليها كنسلت الموضوع،، لقيتها فرحانه وم خلت زول م كلمتو،، قعدت شويه مع نفسي وقلت مش قلت هي المناسبه ليك وع الأساس ده قلت عايزها؟ طيب اهوو ح تبقى ليك في شنو تاني؟ جاني صوت داخلي بقول لي بس انت م بتحبها؟ رديت ضروري يعني؟! رجعت ع واقعي بصوت صاحبي وهو مادي يدو بسلم علي..

بعد يومين من كلام المشي وم المشي،،
واقفه في الدولاب ومعاي رحمه،، بطلع في ملابس مناسبه ومحترمه، الحاجه ال عرفتها انو خالتو ندى،، راجلها متوفي وعندها ولد وبت ،، الاتنين متزوجين،، ولدها اسمو منتصر زوج مزن مغترب والبت ساره،،

العصر جا أحمد،، قال لي جاهزه؟ قلت ليهو ايوه،، شال الشنطه وطلع قدامي،، ودعت ناس البيت،، وقبلي م اطلع كنا واقفين في الباب انا ورحمه وامي شغاله تدي فيني في النصائح،، خليك واعيه،، اسمعي الكلام وبطلي حركاتك البتسويها لي هنا،، خليك نضيفه،، اتحبسي سمح،، واسمعي كلام خالتك البتقولو ليك،، اوعى تقولي م عايزه دي ولا دي م بتنفع معاي بس عشان تعملي الفي راسك،، خليك رزينه وعاقله،، انا بس شغاله اعاين ليها قلت ليها ي امي كلو بعملو وبعدين شنو قصدك خليك نضيفه وواعيه وغيرو،، وسخاانه ولا مجنونه؟ امي قبلت ع رحمه وقالت ليها البت دي الله يصبرني عليها بس، ورحمه شغاله تضحك بس،، بعدها قالت ع قول خالتو سوسن خليك عاقله و.. حمرت ليها قعدت تضحك زياده،، سمعنا صوت البوري،، قلت ليهم يلا سلامات، احمد ده ح يجيني هنا بعده،، ردو لي الله يسلمك،، وقالو بجوني يوم بعد يوم،، بعدها طلعت وركبت العربيه علشان ح ابدا اعمل حاجه حياتي ح تبدا بيها...

يتبع....